Yebo, Nkulunkulu ufuna kutsi bantfu bahlangane ndzawonye kuze bamkhonte. LiBhayibheli litsi: “Asinakaneni kuze sikhutsatane elutsandvweni nasemisebentini lemihle, singakuyekeli kuhlangana kwetfu ndzawonye.”​—KumaHebheru 10:24, 25, umbhalo longentansi.

 Jesu waveta kutsi balandzeli bakhe bekufanele bakhe inhlangano lehlelekile, ngesikhatsi atsi: “Nangabe nitsandzana, bonkhe batawukwati kutsi nibafundzi bami.” (Johane 13:35) Indlela leyinhloko yekukhombisa lutsandvo kutsi balandzeli baKhristu bahlangane ndzawonye nalabakholwa nabo. Bebatawuhlelwa ngemabandla lahlangana njalo kuze akhonte Nkulunkulu. (1 KubaseKhorinte 16:19) Ngisho nobe babazalwane labasemhlabeni wonkhe, kodvwa bamunye.​—1 Phetro 2:17.

Akukeneli kutsi umane nje ube lilunga lenkholo

 Ngisho nobe liBhayibheli likhombisa kutsi bantfu kufanele bahlangane ndzawonye kuze bakhonte Nkulunkulu, kodvwa alifundzisi kutsi kumane nje ube lilunga lenkholo kuyamjabulisa Nkulunkulu. Kuze umuntfu emukeleke kuNkulunkulu, kufanele inkholo lakiyo itsintse indlela laphila ngayo malanga onkhe. Sibonelo saloko kutsi liBhayibheli litsi: “Kukholwa lokuhlantekile nalokungakangcoli embikwaNkulunkulu longuBabe wetfu nguloku: Kunakekela tintsandzane nebafelokati elusizini lwabo, nekutsi umuntfu atigcine ete libala eveni.”—Jakobe 1:27, umbhalo longentansi.