IMitsetfo Lelishumi yimiyalo Nkulunkulu layinika sive sasendvulo saka-Israyeli. Lemiyalo iphindze yatiwe ngekutsi ngeMavi Lalishumi, lokukuhunyushwa lokucondzile kwemusho wesiHebheru lotsi ʽaseʹreth had·deva·rim. Lomusho uvela tikhatsi letintsatfu ku-Pentateuch (Torah), lokutincwadzi tekucala letisihlanu teliBhayibheli. (Eksodusi 34:28; Dutheronomi 4:13; 10:4) Umusho lofanako ngesiGriki, lotsi deʹka (lalishumi) loʹgous (emavi), wakha leligama lelitsi “Decalogue.”

 Nkulunkulu wabhala leMitsetfo Lelishumi etibhelekeceni letimbili tematje wase utinika umphrofethi wakhe Mosi eNtsabeni iSinayi. (Eksodusi 24:12-18) Luhla lwaleMitsetfo Lelishumi lutfolakala ku-Eksodusi 20:1-17 nakuDutheronomi 5:6-21.

•  Luhla lweMitsetfo Lelishumi

•  Kungani luhla lweMitsetfo Lelishumi lungafani?

•  Beyiyini injongo yeMitsetfo Lelishumi?

•  EmaKhristu kufanele yini ayigcine iMitsetfo Lelishumi?

•  Imitsetfo Lelishumi isasebenta yini esikhatsini setfu?

•  Timiso letisekelwe eMitsetfweni Lelishumi letivetwe eThestamenteni Lelisha

1.   Khulekela Nkulunkulu Jehova kuphela.—Eksodusi 20:3.

2.   Ungakhonti titfombe.—Eksodusi 20:4-6.

3.   Ungalisebentisi kabi libito laNkulunkulu.—Eksodusi 20:7.

4.   Ubogcina liSabatha.—Eksodusi 20:8-11.

5.   Hlonipha batali bakho.—Eksodusi 20:12.

6.   Ungabulali.—Eksodusi 20:13.

7.   Ungaphingi.—Eksodusi 20:14.

8.   Ungebi.—Eksodusi 20:15.

9.   Ungafakazi emanga.—Eksodusi 20:16.

10.   Ungahawukeli.—Eksodusi 20:17.

 LiBhayibheli aliyiniketi lemitsetfo tinombolo. Kungako imibono ingafani endleleni lemitsetfo lehlelwe ngayo. Loluhla lolungehla luyindlela lemiyalo levamise kuhlelwa ngayo. Noma kunjalo, labanye bayihlela ngendlela leyehlukile leMitsetfo Lelishumi. Umtsetfo wekucala, wesibili newekugcina uba nemtselela endleleni leMitsetfo Lelishumi lebhalwa ngayo. a

 IMitsetfo Lelishumi beyiyincenye yeMtsetfo waMosi. LoMtsetfo waMosi wawuhlanganisa imitsetfo lengetulu kwa-600 futsi wakha imibandzela yesivumelwano lesentiwa emkhatsini waNkulunkulu nesive saka-Israyeli wasendvulo. (Eksodusi 34:27) Nkulunkulu watsembisa bantfu baka-Israyeli kutsi bebatawuphumelela nabalalela uMtsetfo waMosi. (Dutheronomi 28:1-14) Noma kunjalo, injongo leyinhloko yaloMtsetfo beyikulungiselela sive saka-Israyeli kufika kwaMesiya, nome Khristu lobekatsenjisiwe.—Galathiya 3:24.

 Cha. Nkulunkulu waniketa uMtsetfo wakhe, lohlanganisa leMitsetfo Lelishumi, ngalokucondzile esiveni saka-Israyeli wasendvulo. (Dutheronomi 5:2, 3; Tihlabelelo 147:19, 20) UMtsetfo waMosi awuwabophi emaKhristu, ngisho nemaKhristu esive semaJuda ‘akhululwa eMtsetfweni.’ (Roma 7:6) b UMtsetfo waMosi wase utsatselwa yindzawo ‘ngumtsetfo waKhristu,’ lokuhlanganisa konkhe Jesu layala bafundzi bakhe kutsi bakwente.—Galathiya 6:2; Matewu 28:19, 20.

 Yebo. Ngenca yekutsi leMitsetfo Lelishumi iveta kucabanga kwaNkulunkulu, natsi singazuza nasiyitadisha. (2 Thimothi 3:16, 17) IMitsetfo Lelishumi isekelwe etimisweni letingeke tiphelelwe sikhatsi. (Tihlabelelo 111:7, 8) Ecinisweni, letinyenti taletimiso tisisekelo setimfundziso letitfolakala eThestamenteni Lelisha.—Fundza sihloko lesitsi “ Timiso letisekelwe eMitsetfweni Lelishumi letivetwe eThestamenteni Lelisha.”

 Jesu wafundzisa kutsi wonkhe uMtsetfo waMosi, lohlanganisa neMitsetfo Lelishumi, isekelwe emitsetfweni lemibili lemikhulu. Watsi: “Kufanele utsandze Jehova Nkulunkulu wakho ngayo yonkhe inhlitiyo yakho, nangawo wonkhe umphefumulo wakho, nangayo yonkhe ingcondvo yakho.’ Lona ngiwo umtsetfo lomkhulu newekucala. Wesibili lofana nawo utsi: ‘Kufanele utsandze makhelwane wakho njengobe utitsandza wena.’ Wonkhe uMtsetfo waMosi . . . . usekelwe kulemitsetfo lemibili.” (Matewu 22:34-40) Ngako-ke, nakuba emaKhristu kungakalindzeleki kutsi agcine uMtsetfo waMosi, ayalwa kutsi atsandze Nkulunkulu kanye nalabanye bantfu.—Johane 13:34; 1 Johane 4:20, 21.