Tulaga Tau Tupe
E toʻatele tagata ua mafai ona faaitiitia faafitauli tau tupe ona o le faatatauina o mataupu silisili faale-Tusi Paia.
IA IAI SE FUAFUAGA LELEI
MATAUPU SILISILI FAALE-TUSI PAIA: “O fuafuaga a le tagata toʻaga e manuia ai o ia, a o i latou e faataalise ona faia mea e iʻu ai i le mativa.”—Faataoto 21:5.
LE UIGA: E tatau ona iai se fuafuaga lelei ma ia faamautinoa o loo e mulimuli i ai. O lea, ia fuafua lelei tupe faaalu. Ia manatua, e lē mafai ona e faatauina mea uma e te manaʻo ai. O lea, ia faaaogā tatau au tupe.
MEA E MAFAI ONA E FAIA:
-
Ia fuafua lelei tupe faaalu. Ia fai se lisi o mea uma e te manaʻo e faaalu ai le tupe ma faatulaga i vaega e pei o meaʻai, ofu ma le fale. Ona mafaufau lea i le aofaʻiga o le tupe o le a e faaaluina i nei vaega taʻitasi. Pe afai e ova le tupe ua e faaaogāina mai i se tasi o nei vaega nai lo o le mea na faatulaga i ai, ia faaaogā le tupe mai i vaega e itiiti le aogā. O se faataʻitaʻiga, pe afai ua ova le tupe ua e faaaluina mo le penisini o le taavale, ia faaaogā le tupe ua faatulaga mo vaega e itiiti le aogā, e pei o le alu e ʻai i se faleʻaiga.
-
ʻAlofia aitalafu e lē manaʻomia. Pe a talafeagai, ʻalofia le faia o ni aitalafu. Nai lo o lea, ia sefe le tupe e faatau ai mea e manaʻomia. Pe afai e iai sau aitalafu, e tatau ona faia ni fuafuaga e totogi le aitalafu ma ia pipii i lenā fuafuaga.
O le tele e te aitalafu ai, o le telē foʻi lenā o le tupe o le a e totogiina. O lea, a o leʻi faia se aitalafu ia mafaufau muamua.
IA FAAETEETE I MASANIGA LEAGA
MATAUPU SILISILI FAALE-TUSI PAIA: “O le tagata paiē e na te lē suatia le fanua ona o le tau mālūlū; e ʻaisi o ia i le taimi o le seleselega, ae e lē maua se mea.”—Faataoto 20:4.
LE UIGA: O le paiē e iʻu ai i le mativa. O lea, ia avea oe o se tagata toʻaga ma taumafai e faasoasoa lelei au tupe, ina ia maua mea o loo e manaʻomia i le lumanaʻi.
MEA E MAFAI ONA E FAIA:
-
Ia galue mamafa. Pe a e galue mamafa ma avea o sē e maufaatuatuaina, o le a fiafia le pule iā te oe ma manaʻo e te faigaluega pea.
-
Ia faamaoni. Aua e te gaoi i le fale faigaluega. O le lē faamaoni o le a faaleagaina ai lou talaaga ma faigatā ai ona maua se isi au galuega mulimuli ane.
-
Ia ʻalofia le matapeʻapeʻa. Pe a e taumafai e maua le tele o tupe, o le a faaleagaina ai lou soifua mālōlōina ma lau faiā ma isi. Ia manatua, e iai se isi mea e sili atu nai lo o tupe.
ISI MATAUPU SILISILI FAALE-TUSI PAIA
Ia faitau i le Tusi Paia i le initaneti, ua maua i le faitau selau o gagana i le jw.org
AUA LE FAAMAʻIMAUINA LE TAIMI MA TUPE I MASANIGA LEAGA.
“O le a mativa lē e onā ma lē e soona ʻai tele, ma o le a ofu i ʻieʻie masaesae lē e matamoe pea.”—FAATAOTO 23:21.
ʻALOFIA LE SOONA POPOLE I TUPE.
“Aua tou te toe popole i o outou ola i mea tou te aai ai pe inu ai, po o outou tino i ofu tou te oofu ai.”—MATAIO 6:25.
ʻALOFIA LE MATAʻUA.
“O le tagata e matauʻa e tauivi malosi i le saʻilia o oloa tāua, ae e na te lē iloa o le a iʻu ina mativa lava o ia.”—FAATAOTO 28:22.
E te Ono Fiafia Foʻi
LE OLOMATAMATA
Fo‘ia o Aitalafu
LE OLOMATAMATA
Le Auala E Ola Ai E Tusa Ma Mea Ua Maua
ALA MAI!
Se Vaaiga Paleni e Faatatau i Tupe
O fesili e fitu e mafai ona e iloiloina ai oe lava ma fesoasoani e te iloa ai po o sesē lau vaaiga e faatatau i tupe.
ISI MATAUPU
Le Auala e Feagai ai ma le Utiuti o Tupe Maua
O le suia faafuaseʻi o tupe maua e lagona ai le popole. Ae e iai mea e mafai ona e faia, lea e faavae mai i fautuaga atamai o loo i le Tusi Paia e mafai ona fesoasoani iā te oe, e feagai ai ma le utiuti o tupe maua.
