MATAUPU SILISILI FAALE-TUSI PAIA: “E sili o lē e faagesegese lona ita nai lo o le toa.”​—Faataoto 16:32.

LE UIGA: O i tatou uma lava e iai taimi e tatou te feita ai ona o ni māfuaaga lelei, ae pe afai e lē pulea lo tatou ita, e ono iʻu ai i ni iʻuga leaga. Ua faapea mai tagata suʻesuʻe i aso nei, e lē mafai ona tatou mafaufau lelei pe a tatou feita ma e masani ona tatou faia se faamatalaga po o se gaoioiga e toe salamō mulimuli ane ai.

MEA E MAFAI ONA E FAIA: Ia taumafai e pulea lou ita a o leʻi pulea e le ita au gaoioiga. E manatu nisi tagata pe a ita se tasi ua faailoa mai ai o ia o se tagata malosi, ae o le mea moni o ia o se tagata vaivai. Ua faapea mai le Tusi Paia, “O le tagata e lē pulea o ia lava ua pei o se aai ua osofaʻia ma ua solofa le pā.” (Faataoto 25:28) O se tasi o auala e fesoasoani e pulea ai lou ita, o le taumafai e iloa le mea moni na tupu a o leʻi fai atu se tala po o se gaoioiga. Ua faapea mai le Tusi Paia, “O le tofā mamao o le tagata, e faagesegese ai lona ita.” (Faataoto 19:11) O se mea atamai le faalogo i itu uma e lua o se mataupu a o leʻi faia se faaiʻuga, o le a e malamalama ai i le mea moni na tupu ma toʻafilemu ai ou faalogona.

MATAUPU SILISILI FAALE-TUSI PAIA: “Ia faaalia foʻi lo outou loto faafetai.”​—Kolose 3:15.

LE UIGA: E iai le manatu e faapea, e na o le tagata lotofaafetai e maua le fiafia. E oo lava i tagata na feagai ma le maliu o se tasi e pele iā i latou po o se mea e tāua iā i latou ua faaleagaina, e talitonu i le moni o lenei faaupuga. Na latou faapea mai, o le mea na fesoasoani iā i latou e feagai ai ma o latou faalogona mafatia, o le talisapaia lea o le tulaga ua iai nai lo o le mafaufau i mea ua lē o toe iai.

MEA E MAFAI ONA E FAIA: I aso taʻitasi, ia fai se lisi o mea e te lotofaafetai ai. E lē tau tulia o ni  mea tetelē e tatou te lotofaafetai ai. Ia lotofaafetai mo mea lāiti e pei o le susulu manaia o le lā, talanoaga fiafia ma tauaiga vavalalata, po o se aso fou foʻi. Pe a faaalu le taimi e faaalia ai le lotofaafetai mo nei mea, o le a e maua ai le fiafia.

E fesoasoani iā te oe e mafaufau ai i le māfuaaga e te lotofaafetai ai i lou aiga ma au uō. Pe a e mātauina mea e te lotofaafetai ai e faatatau i isi tagata, ia faailoa i ai, a lē o le fai atu saʻo i le tagata, lafo i ai se tusi, imeli po o se feʻau tusitusia foʻi. O le faia faapea, o le a faamalosia ai le lua faiā, ma o le a e maua ai le fiafia ona o loo e faia se mea lelei mo isi tagata.​—Galuega 20:35.

IA SAVALI ESE MAI I SE FINAUGA.

“O le amataga o finauga e pei o le tatalaina o le vai e se tasi; o lea ia e tuua lea mea a o leʻi tetele le misa.”​—FAATAOTO 17:14.

IA ʻALOFIA LE POPOLE E FAATATAU I LE LUMANAʻI.

“Ia aua neʻi outou popole mo le aso a taeao, auā e iai foʻi popolega o le aso a taeao. Auā e tofu lava le aso ma mea leaga e tutupu ai.”​—MATAIO 6:34.

IA MAFAUFAU MUAMUA NAI LO O LE GAOIOI E TUSA MA OU FAALOGONA.

“E leoleoina oe e le mafaufau lelei, e malupuipuia foʻi oe i le faautaga loloto.”​—FAATAOTO 2:11.