Tulaga Faaleagaga
E pei ona taʻua i le amataga, e toʻatele tagata e manatu o le Tusi Paia o se tusi e paia. Ua latou iloa o le faitau i ai ma faatatauina ana taʻiala, o le a latou vavalalata ai i le Atua ma malamalama ai i le fuafuaga o le olaga.
O loo taʻua i le Tusi Paia o le tagata “faaleagaga” po o i latou e manatu mamafa i o latou faiā ma le Atua, e latou te faatāuaina ana tapulaa ma ola e ōgatusa ma na tapulaa. I se faaeseesega, e faalagolago tagata faaletino i o latou lava manatu ma mulimuli i o latou tuʻinanauga.—Iuta 18, 19; Efeso 5:1.
FAAMOEMOE
MATAUPU SILISILI FAALE-TUSI PAIA: “Po ua e lotovaivai ea i le aso o le puapuaga? O le a itiiti lou malosi.”—Faataoto 24:10.
LE UIGA: O le lotovaivai e mafai ona aveesea lo tatou malosi e onosaia ai faafitauli o le olaga. Ae i le isi itu, e mafai e le faamoemoe ona toe faafoʻisia lenā malosi. O le iai o se faamoemoe o le a tatou iloa ai e lē tumau ona iai o tatou faafitauli. O le mea moni, tatou te faatalitalia ni iʻuga lelei e oo i ai pe a tatou onosaia faafitauli i le olaga.
MEA E MAFAI ONA E FAIA: Taumafai ia iai sau vaaiga saʻo i le lumanaʻi. Nai lo o le popole i mea e ono tutupu po o le faatali foʻi i le taimi e fetaui lelei, ia fai ni galuega e ōgatusa ma ou sini. Ia faatalitalia e iai lava taimi e “tutupu faafuaseʻi ai mea.”(Failauga 9:11) O le tulaga masani lava e tutupu mea e sili atu nai lo o mea na tatou faatalitalia. Ina ia faataʻitaʻi, na faaaogā e le Tusi Paia le faataʻitaʻiga i se faifaatoʻaga, ina ua faapea mai: “Ia e lūlū fatu i le taeao ma aua neʻi mālōlō lou lima seʻia oo i le afiafi; auā e te lē iloa po o lē fea e taulau manuia, a lē o i inei po o i inā, pe tutusa ona lelei o ia mea e lua.”—Failauga 11:6.
TALI O FESILI TĀUA I LE OLAGA
MATAUPU SILISILI FAALE-TUSI PAIA: “E moni lava lau afioga.”—Salamo 119:160.
LE UIGA: Ua saunia mai e le Tusi Paia tali o fesili o loo tuufesili ai le toʻatele o tagata. Mo se faataʻitaʻiga, o loo taliina ai fesili nei
-
Na faapefea ona tatou iai?
-
Aiseā ua tatou iai i inei?
-
O le ā le mea e tupu i le tagata pe a oti?
-
Pe e na o le pau lea o le olaga?
E faitau miliona tagata i le lalolagi aoao ua mafai ona faaleleia o latou olaga, e ala i le suʻesuʻe i tali mai i le Tusi Paia i nei fesili ma isi fesili.
MEA E MAFAI ONA E FAIA: Ia suʻesuʻe po o ā aʻoaʻoga a le Tusi Paia. Ia fesili atu i se tasi o Molimau a Ieova mo se fesoasoani ina ia malamalama i le Tusi Paia. Asiasi i la matou tuatusi o le jw.org/sm, pe asiasi atu foʻi i se tasi o matou sauniga lea e faia e aunoa ma se totogi ma e valaaulia so o se tasi.
ISI MATAUPU SILISILI FAALE-TUSI PAIA
Tagaʻi i le vitiō Aiseā e Suʻesuʻe ai le Tusi Paia? i le jw.org/sm. Ua maua i gagana e silia ma le 880
IA AMANAʻIA OU MANAʻOGA FAALEAGAGA.
“E fiafia o ē e naunau i mea faaleagaga.”—MATAIO 5:3.
IA AʻOAʻO ATILI E FAATATAU I LE ATUA O LE TUSI PAIA.
“Saʻili i le Atua . . . ma maua o ia . . . [auā] e lē o mamao o ia mai iā i tatou taʻitoʻatasi.”—GALUEGA 17:27.
IA FAITAU MA MANATUNATU I LE FEʻAU O LOO I LE TUSI PAIA.
“E naunau o ia i le tulafono a Ieova, * e faitau lē leoa o ia i lana tulafono i le ao ma le pō. . . . E taulau manuia mea uma e na te faia.”—SALAMO 1:2, 3.
^ pala. 23 O Ieova o le suafa o le Atua e pei ona faailoa mai i le Tusi Paia.
E te Ono Fiafia Foʻi
TALIINA O FESILI FAALE-TUSI PAIA
O le ā e Uiga i ai le Faaleagaga? Pe e Mafai Ona Avea Aʻu ma Tagata Faaleagaga e Aunoa ma le Auai i se Lotu?
Ia mātau ni fautuaga se tolu i le auala e atiaʻe ai le itu faaleagaga, ma ia iloa ni faamatalaga sesē se fā e faatatau i le itu faaleagaga e ao ona ʻalofia.
LE OLOMATAMATA
E Faapefea Ona Faaleleia e le Tusi Paia Lo‘u Olaga?
O loo maua i lenei tusi mai anamua le tele o fautuaga atamai.
