E manatu le toʻatele o tagata e oo foʻi i nisi e faapea mai o Kerisiano, ua lē o toe aogā i aso nei tapulaa tauamio a le Tusi Paia i feusuaʻiga ma le faaipoipoga. Ua faia e nisi lotu suiga i a latou aʻoaʻoga i amioga saʻo ma amioga sesē, ina ia faafetaui ai ma manatu e taatele i tagata. Po o aogā pea tapulaa o le mea saʻo ma le mea sesē o loo i le Tusi Paia? Ioe. O māfuaaga nei e tatou te iloa ai le moni o lenā manatu.

 Na foafoaina le tagata ina ia faalagolago i Lē na foafoaina i tatou mo le taʻitaʻiga. Ua faapea mai le Tusi Paia: “E lē o i le tagata foʻi e savali, ona faatonuina le mea e ui ai o ia.” (Ieremia 10:23) E ui na foafoaina e Ieova a le Atua i tatou ma le tomai e faia ai filifiliga, ae e na te leʻi tuuina mai iā i tatou le pule po o le tomai e filifili ai e i tatou lava le mea saʻo ma le mea sesē. O lea la, e finagalo le Atua ia tatou faalagolago atu iā te ia.—Faataoto 3:5.

 E tatou te maua taʻiala tauamio a le Atua i le Tusi Paia. Mātau māfuaaga e lua e matuā tāua ai nei taʻiala.

•   Na foafoaina i tatou e le Atua. (Salamo 100:3) Talu ai o Ieova le Atua o Lē na foafoaina i tatou, e na te silafia lelei la mea e tatou te maua ai le soifua mālōlōina ma le fiafia i le itu faaletino, mafaufau ma faalogona. E na te silafia lelei foʻi iʻuga leaga e oo iā i tatou pe a teena ana taʻiala tauamio. (Kalatia 6:7) E finagalo foʻi Ieova ia tatou maua se olaga e sili ona lelei. O le māfuaaga lenā ua faamatalaina ai le Atua i le Tusi Paia, “o Lē o loo aʻoaʻo oe i mea e aogā iā te oe, o Lē e taʻitaʻiina oe i le ala e ao ona e ui ai.”—Isaia 48:17.

•   E mafai ona taʻitaʻisesēina i tatou e o tatou faanaunauga. E manatu le toʻatele o tagata e mafai ona latou filifili le mea saʻo ma le mea sesē, e ala i le mulimuli i o latou loto po o le faia o mea e faanaunau ma fiafia i ai. Peitaʻi, ua faapea mai le Tusi Paia “e sili ona faaʻoleʻole le loto nai lo o mea uma, ma e matuā leaga lava.” (Ieremia 17:9) Pe a lē taʻitaʻia o tatou loto i le atamai o le Atua, o le a iʻu ai i le faia o gaoioiga e tatou te salamō mulimuli ane ai.—Faataoto 28:26; Failauga 10:2.

 Leai! O loo iai i le Tusi Paia le upu moni e faatatau i le Atua ma le auala e finagalo e tatou te amioaʻi ai. (1 Korinito 6:9-11; Kalatia 5:19-23) E naunau o ia ina ia iloa e tagata lenei upu moni. (1 Timoteo 2:3, 4) O lea, e tatau i faifeʻau Kerisiano ona aʻoaʻoina le upu moni o loo i le Tusi Paia.—Tito 1:7-9.

 E toʻatele tagata e lē mananaʻo e usitaʻi i tapulaa tauamio a le Tusi Paia ua saʻili atu i taʻitaʻi lotu, o ē e taʻu atu iā i latou “mea e logolelei iā i latou lava.” (2 Timoteo 4:3) Peitaʻi, o loo taʻua i le Tusi Paia lenei lapataʻiga tāua: “Oi talofa iā i latou ua faapea mai e lelei le leaga, ma e leaga le lelei.” (Isaia 5:20) E manino mai, o le a faaumatia e le Atua taʻitaʻi lotu o ē e lē aʻoaʻo tonu tagata i le finagalo o le Atua i le mea saʻo ma le mea sesē.

 Leai. O i latou e mananaʻo e faafiafia le Atua e mulimuli i faaaʻoaʻoga ma aʻoaʻoga a Iesu Keriso. Na ia aʻoaʻoina ona soo e aua le faamasinosino i isi, ae ia faaalia le alofa ma le faaaloalo.—Mataio 5:43, 44; 7:1.

 Na aʻoaʻoina e Iesu ona soo ina ia tausisi i tapulaa tauamio a le Atua i o latou olaga atoa. Peitaʻi, na ia aʻoaʻoina foʻi i latou e talia le mea moni e ono filifili isi e mulimuli i se isi tapulaa. (Mataio 10:14) E leʻi faatagaina e Iesu ona soo e faaaogā faiga faapolotiki po so o se mea e faamalosia ai isi e usitaʻi i tapulaa a le Atua.—Ioane 17:14, 16; 18:36.

 O i latou e taumafai e usiusitaʻi i tapulaa a le Atua i le mea saʻo ma le mea sesē, e latou te maua aogā i le taimi lenei ma le lumanaʻi. (Salamo 19:8, 11) O na aogā e aofia ai le:

•   Faateleina o le olioli.—Faataoto 29:6.

•   Faiā māfana ma le Atua.—Faataoto 3:32.

•   Fesoasoani a le Atua i taimi faigatā.—Faataoto 11:8.

•   Avanoa e ola ai e faavavau i le lalolagi.—Salamo 37:29.