Qullaawu Maxaafi Taraawe Gudanno Dhibbi Daafira Mayyaanno?

FANI

Qullaawu Maxaafi mayyaanno?

Qullaawu Maxaafi goofimarchu yannara taraawe gudanno dhibbi daannota balaxe masaalino. (Luqaasi 21:11) Togoo dhibbi Maganu abbinoha diˈˈikkino. Isinni, Maganu muli yannara Gashshootisi widoonni dhiwana baalanka, taraawanno dhibbino gatikkinni uullate aaninni hunanno.

Qullaawu Maxaafi taraawe gudanno dhibbi daanno yee masaalinoni?

Qullaawu Maxaafi Koroonu dhibbi (COVID-19), Eedisi, woy furu dhibbi daanno yee suˈma bade dikulino. Ikkollana, taraawe gudanno ‘dhibbinna’ “shaanno qoomami” daannota masaalino. (Luqaasi 21:11; Yohaannisi Ajuuja 6:8, Haaro Alame Tiro) Togoo ikkito, ‘goofimarchu barri’ woy “diru goofimarchi” malaati widira kiirantanno.—2 Ximootewoosi 3:1; Maatewoosi 24:3.

Maganu konni albaanni manna dhibbunni qorichishe egennino?

Qullaawu Maxaafi, Maganu mito manna dhibbunni qorichishino woyiti noota kulanno. Lawishshaho, mito manna dhiigu (woy gogu dhibbi) amadanno gede assino. (Kiiro 12:1-16; 2 Mootoolla 5:20-27; 2 Duduwo 26:16-21) Ikkollana, Maganu togoo dhibbi kaiha baala amadanno gede diassino. Hatteentenni, isira finqiltinore calla bade qorichishino.

Xaa yannara noohu taraawanno dhibbi Maganu hanqooti?

Deeˈni. Mitootu yannankera taraawe gudanno dhibbanna wole hattoo fayya Maganu manna qorichishate abbino yitanno. Ikkollana, Qullaawu Maxaafi hatto diyaanno. Hiitto?

Umihunni, hundi yannarano ikko yannankera Maganu soqqamaasineno dhiwantino woyiti no. Lawishshaho, ammanamino mancho Ximootewoosi ‘godowu gajaajjo’ amaddinosi. (1 Ximootewoosi 5:23) Ikkirono, Qullaawu Maxaafi iso Maganu hanqinosi daafira dhiwamino diyaanno. Hatteente gede, yannankerano ammanantinori Maganu soqqamaano giddo mitootu dhiwantanno. Duucha woyite, insa dhiwanu amadannonsahu hedeweelcho tuncu yiinonsarinniiti.—Rosiisaancho 9:11.

Hakkiinni saeno, Qullaawu Maxaafi Maganu bushuulle qorichishanno yanna iillitinokkita kulanno. Hatteentenni, heeˈnoommohu “gatote barra” yinanni yannaraati; tenne yannara Maganu mannu baalunku isiwa shiqanno gedenna gato afiˈranno gede shaqqillunni koyisanni no. (2 Qorontoosi 6:2) Isi manna gato afiˈranno gede koyisanno doogo giddo mitte, alame woˈmate aana loonsanni heeˈnoonniho sabbakate loosooti; konni garinni ‘Maganu Gashshootiha Dancha Duduwo’ mannaho dudumbanni heeˈnoonni.—Maatewoosi 24:14.

Taraawe gudanno dhibbi heeˈrannokki yanna dagga ikka?

Ee dagganno. Qullaawu Maxaafi muli yannara mittu manchino dhiwamannokki yanna daggannota kulanno. Maganu Gashshootisi widoonni dhiwantinore baalanka hursanno. (Isayaasi 33:24; 35:5, 6) Isi qarra, shettonna reyo hunanno. (Yohaannisi Ajuuja 21:4) Qoleno isi reyitinori koye baattote aana guuta ordu fayyimma afidhe hagiidhitanni heedhanno gede reyotenni kayisannonsa.—Faarso 37:29; Soqqamaasinete Looso 24:15.

Dhiwanu daafira kultannota Qullaawu Maxaafi qummeeshshuwa

Maatewoosi 4:23: “Yesuusi Ayihudete xaadi mine rosiisanninna gordu Gashshootiha Dancha Duduwo kulanni, addi addi dhibbinni amadamino manna hursanni Galiilu gobba baala tuqi.”

Qummeeshshu tiro: Yesuusi loosino maalale, muli yannara Maganu Gashshooti mannu ooso baalantera assannore leellishanno lawishshaati.

Luqaasi 21:11: “Dhibbu [taraawe gudannohu] daanno.”

Qummeeshshu tiro: Goofimarchu barri malaati widira kiirantanno ikkito giddo mittu taraawanno dhibbaati.

Yohaannisi Ajuuja 6:8: “Boora farashsho afummo; gulufinohu suˈma Reyo yinanni; Jeennaatu hoodesi haˈranni no. Reyotenna jeennaateho . . . [dhibbunni] . . . guddanno gede roorre uyininsa.”

Qummeeshshu tiro: Ajuujate maxaafira kulloonniri shoole farashsho guluffinori daafira kultanno masaalo, yannankera taraawe gudanno dhibbi daannota leellishshanno.