Maganu Mangiste Maganu Yihowa xintino gashshooteeti. ‘Maganu Gashshooti’ iima heeˈre gashshanno daafira, ‘gordu Gashshooteno’ yinoonni. (Maarqoosi 1:14, 15; Maatewoosi 4:17) Maganu Mangiste duuchu garinni mannu gashshooti gedeeti; ikkollana Maganu gashshooti woˈmante doogonni uullate gashshootinni lowo geeshsha rooranno.

•   Gashshaasine. Maganu Mangistesira Yesuusi Kiristoosi Moote asse doorino; qoleno aye manchino afiˈrara dandaannokki silxaane uyinosi. (Maatewoosi 28:18) Yesuusi uullate aana noo yannara ammanaminohanna shaqqado Sooreessa ikkasi leellishino daafira, silxaanesi danchurira calla horoonsiˈrannota dihuluullammeemmo. (Maatewoosi 4:23; Maarqoosi 1:40, 41; 6:31-34; Luqaasi 7:11-17) Maganu uyinosi biddishshi garinni, Yesuusi duuchante gaˈre giddonni iima isi ledo ‘gobba gashshitannore’ doorino.—Yohaannisi Ajuuja 5:9, 10.

•   Gashshootu Keeshshanno Yanna. Mannu gashshooti geedo diafiˈrino; Maganu Gashshooti kayinni ‘horonta didiigamanno.’—Daanieeli 2:44.

•   Qansichoota. Maganu fajjo wonshannohu baalunku, aye gaˈre wido ikkirono woy ilamino bayichi baxiwano ikkiro Maganu Mangiste qansicha ikka dandaanno.—Soqqamaasinete Looso 10:34, 35.

•   Seera. Maganu Mangiste seeri (woy hajajo) bushare assa hoolannoha calla diˈˈikkino. Kuni seeri qansichootu dancha amanyoote afidhinore ikkitanno gede assanno. Lawishshaho Qullaawu Maxaafi togo yaanno: “‘Mooticha Maganokki woˈmu wodanikkinni, woˈma lubbokkinni, woˈma hedokkinni baxi!’ . . . Baalanta roortannotinna umi hajajo tenneeti. Tenne labbannoti layinki hajajo, ‘Olliichokki umikki gede assite baxi!’ yitannote.” (Maatewoosi 22:37-39) Maganu Mangiste qansichooti Maganonna olliichonsa baxxanno daafira, wolootaho kaaˈlannore assitanno.

•   Roso. Maganu Mangiste qansichootisera dancha seera fushshitannoha calla ikkikkinni, hakkonne seera agadhine heeˈra dandiinanni garano rosiissanno.—Isayaasi 48:17, 18.

•   Mixo. Maganu Mangiste qansichoota gadadisse gashshootu aana noore duroonsitannota diˈˈikkitino. Hatteentenni, tini Mangiste Maganu hedo woˈmitanno gede assitanno; Maganu hedo giddo mitte, iso baxxannori uullate aana gannatete hegerera heedhanno gedeeti.—Isayaasi 35:1, 5, 6; Maatewoosi 6:10; Yohaannisi Ajuuja 21:1-4.