“Keeru heeˈrannohu mimmito dandiine heeˈniro callaati.”—UNESCO Mimmito Dandee Heeˈrate Daafira Fushshitino Lallawa, 1995.

 Mimmito dandee heeˈra hoogguro kayinni mannu mimmito diayirrisanno; hakkiino sae mimmito giwanno. Wodanu giddo togoo hedo heedhuro, mannu duucha woyite busha qaale coyiˈranno, mallaadanno, hattono woloota gawajjannore assanno.

 Kayinni mimmito dandee heeˈrate daafira mannaho addi addi lao noonsa. Mitu manni mimmito dandee heeˈrate yaa wolootu assitannore baala woy ikkitonsa baala maahoyye yee adhate yee hedanno. Wolu kayinni, Qullaawu Maxaafi yaannonte gede, mimmito dandiine heeˈneemmo yaa wolootu doorshanna ammana sumuu yine adhineemmokkiha ikkiro nafa baxisinonsare doodhate qoossonsa ayirrinseemmo yaa ikkitinota huwatino.

 Qullaawu Maxaafi yannankera addinta mannu mimmito dandee heeˈranno gede kaaˈlanno?

Qullaawu Maxaafi kulannoha mimmito dandee heeˈrate kaaˈlanno coye

 Qullaawu Maxaafi mannu mimmito dandee heeˈranno gede kaaˈlanno. Togo yaanno: “Danchummaˈne manna baalaho leelto!” (Filiphisiyusi Sokka 4:5) Qullaawu Maxaafi mannaho shaqqadda, jooguullenna mararreemmore ikkineemmo gede jawaachishannonke. Tenne amaale harunsitannori wolootu doorsha sumuu yite adha hooggara dandiitanno; kayinni woloota doodhitino dilgonsa assidhara fajjitanno ikkinnina diokkitannonsa.

 Ikkollana, Qullaawu Maxaafi Maganu mannu oosora wodho uyinonsata xawise kulanno. Togo yaanno: “Danchu coyi maatiro Kaaliiqi [kulinohe].” (Mikiyaasi 6:8) Qullaawu Maxaafi Maganu mannu oosora uyino seera kulanno; Maganu konne seera uyinonkehu woyyitinota dancha heeshsho heeˈnammora yeeti.—Isayaasi 48:17, 18.

 Maganu wolu manni aana yoo yinammora roorre diuyinonke. Qullaawu Maxaafi yaanno garinni, “Seera aannohunna yoo yaannohu mitto Magano callaho; . . . Anfina, manna bushiishattora isi ati ayeti?” (Yaiqoobi 4:12) Maganu ninke mittu mittunku uminke doorsha doodhinammora fajjinonke; doodhineemmo coyira xaˈmammeemmorino ninkeentilla.—Marro 30:19.

Qullaawu Maxaafi manna ayirrisate daafira mayyaanno?

 Qullaawu Maxaafi, “Manna baala ayirrisse” yaannonke. (1 Pheexiroosi 2:17) Konni daafira, Qullaawu Maxaafi wodho garinni heeˈra doodhitannori, ammanansanna heeshshonsa gari ikkihano ikkiro manna baalanka ayirrissanno. (Luqaasi 6:31) Hatto yaa kayinni Qullaawu Maxaafi wodho harunsitannori, wolootu ammantannore baala ammantanno woy wolootu doorsha baala maahoyye yite adhitanno yaa diˈˈikkino. Hatteentenni, woloota woffi assantenni, Yesuusi lawishsha harunsate dandaaminsare baala assitanno.

 Lawishshaho, mitte hige Yesuusi isi harunsannokkita wole ammaˈno harunsitanno manchonni xaadino. Qoleno hatti mancho minaannase ikkinokki manchi ledo mitteenni heedhannote; tini ikkitoseno Yesuusi sumuu yaannota diˈˈikkitino. Ikkirono, Yesuusi hattee mancho ayirrinyunni hasaawisino.—Yohaannisi 4:9, 17-24.

 Yesuusi gede, Kiristaanu macciishshate maahoyye yaanno mannira ammanansa daafira xawisate qixxaawinoho; tenne assannohu kayinni ‘shaqqillunninna owaantetenniiti.’ (1 Pheexiroosi 3:15, 16) Qullaawu Maxaafi, Kiristaanu ninke yinummota calla macciishshe yee manna okkannokki gede rosiisanno. Kiristoosi soqqamaancho ikkinohu “baalanka [wole ammaˈno harunsannohano] mararannoha . . . ikka hasiissannosi ikkinnina giwama dihasiissannosi” yaanno.—2 Ximootewoosi 2:24.

Qullaawu Maxaafi manna giwate daafira kulannore

 Qullaawu Maxaafi “mannu baalu ledo keere heeˈrate” jawaanteemmo gede amaalannonke. (Ibiraawoota 12:14) Keere heeˈra hasiˈranno manchi manna digiwanno. Togoo manchi ammanasi lashshi assannokkiha ikkirono, wolootu ledo keere heeˈrate dandaamisire baala assanno. (Maatewoosi 5:9) Isinni Qullaawu Maxaafi Kiristaanu xiiwannonsa mannira danchare assatenni baarigaaransa baxanno gede nafa amaalanno.—Maatewoosi 5:44.

 Hige Qullaawu Maxaafi, Maganu manna shollishanno amanyoote woy woloota gawajjannore assinannita ‘tiyyire giwannota’ kulanno. (Lawishsha 6:16-19) Ikkollana Qullaawu Maxaafi “giwa” yaanno qaale horoonsiˈrinohu Maganu busha assoote effire giwannota kulateeti. Qoleno Qullaawu Maxaafi Maganu heeshshonsa biddi assidhe isi seerinni gala hasidhannore maarannota kulanno.—Isayaasi 55:7.

Mimmito dandee heeˈratenna ayirrisate daafira kultanno qummeeshshuwa

 Tiito 3:2: “Mannu ledo giwantannokkirenna arshoota, mannaho joongille leellishshannore ikkito.”

 Maatewoosi 7:12: “Mannu kiˈnera assaˈnera hasidhinannire baala kiˈneno insara assensa!”

 Iyyaasu 24:15: “Magansidhinanniha techo doodhe.”

 Soqqamaasinete Looso 10:34: “Maganu manna [dimallaadanno].”

 Imbaaqoomi 1:12, 13: ‘[Maganu] busha coye assinanna lae dicincanno.’

 Roomu Sokka 12:19: “Maganoho uyitine agurre ikkinnina kiˈne rabbisidhinoonte. Mootichu, ‘Rabba anete; rabba ani qoleemmo’ yaanno.”

 Maganu Yihowa a aye manchirano rabbisiˈranno gede silxaane diuyino. Isi yiino yannara taashsho abbanno. Ledde afate, “Mannu Taashsho Afiˈrate Raaranno Raare Macciishshannohu Heeˈra Ikka?” yaanno birxicho nabbawi.