Cuuame Yihowa Farciˈraasine ikkihu gedensaanni, sabbakanna ammanate roduuwinsa ledo gamba yaa agurino Kiristaana dibonkeemmo. Hatteentenni insa hanse wirro ayyaanaamittetenni jawaattanno gede kaaˈlineemmonsa.

 Mittu manchi jawa cubbo loosino daafira bayichonko dibonkanni. Ikkollana, mittu cuuamino Kiristaanchi Qullaawu Maxaafi seera diiga roso assiˈrironna maaro ea giwiro bonkanni. Qullaawu Maxaafi, “Busha mereeriˈnenni hunne” yee xawise kulanno.—1 Qorontoosi 5:13.

 Bohamino manchi minaamanna oososi Yihowa Farciˈraasinella ikkitu? Ayyaanaamittete aantensa gattanno; maalu fiixoominsa kayinni noowa heeˈranno. Adhamansanna maatete heeshshonsa noo gedeenni heedhanno.

 Bohantinori gambooshshenke daa dandiitanno. Qoleno hasidhuro, songote cimeeyye ayyaanaamittetenni kaaˈlitansara dandiitanno. Songote cimeeyye togoo manna kaaˈlitannohu wirro Yihowa Farciˈraasincho ikkate ikkado ikkanno gedeeti. Bohamino manchi busha amanyoote agure Qullaawu Maxaafi biddishshi garinni heeˈrate murciˈrinota heeshshosinni leellishiro, wirro Yihowa Farciˈraasincho ikka dandaanno.