හොෂෙයා 2:1-23
2 “ඔබේ සහෝදරයාට, ‘මගේ සෙනඟ’+ කියාද ඔබේ සහෝදරියට, ‘දයාව ලැබූ තැනැත්තිය’+ කියාද අමතන්න.
2 ඔබේ මවට විරුද්ධව නඩුවක් ඉදිරිපත් කරන්න.+ ඇයට විරුද්ධව පැමිණිලි කරන්න. මන්ද මෙතැන් පටන් ඇය මගේ භාර්යාව නොවෙයි.+ මම ඇගේ ස්වාමිපුරුෂයාද නොවෙමි.+ ඇය කරන වේශ්‍යාකම්ද වෙනත් පුරුෂයන්ව ළයට තුරුල් කරගනිමින් මට විරුද්ධව කරන ද්‍රෝහිකම්ද ඇය නතර කළ යුතුයි.+
3 ඇය එසේ නොකළොත් උපන් දා සිටියාක් මෙන්+ මම ඇයව නිරුවත් කරන්නෙමි.+ ඇයව පාළු කාන්තාරයක්+ හා වතුර නැති දේශයක්+ මෙන් වීමට සලස්වා ඇයට පිපාසයෙන් මැරෙන්න ඉඩහරින්නෙමි.+
4 ඇගේ දරුවන් වේශ්‍යාකමින් ඉපදුණු නිසා+ මම ඔවුන්ට කිසි දයාවක් නොපෙන්වන්නෙමි.+
5 ඔවුන්ගේ මව වේශ්‍යාකම් කළාය.+ ඔවුන්ව බිහි කළ ඇය කිසි ලැජ්ජාවක් නැති ස්ත්‍රියකි.+ මන්ද ඇය මෙසේ කියා තිබේ. ‘මගේ පෙම්වතුන් පිටුපස මම යන්නෙමි.+ මට කෑම, වතුර, තෙල්, බීම වර්ග, ලොම් හා ලිනන් රෙදි දෙන ඔවුන් පිටුපස මම යන්නෙමි.’+
6 “ඒ නිසා, ඇගේ ගමන් මඟ හරහා මම කටු වැටක්ද ගල් පවුරක්ද ඉදි කර+ ඇයව අතරමං කරන්නෙමි.+
7 ඇය තම පෙම්වතුන් පසුපස දිව්වද ඇයට ඔවුන් ළඟට යන්න ලැබෙන්නේ නැත.+ ඔවුන්ව සෙව්වද ඇයට ඔවුන්ව සම්බ වන්නේ නැත. එවිට ඇය මෙසේ කියනු ඇත. ‘මම නැවත මගේ පළමු පුරුෂයා+ ළඟට යමි.+ ඔහු සමඟ ගත කළ කාලය මීට වඩා කොපමණ හොඳද!’+
8 ඇයට ධාන්‍ය,+ අලුත් වයින් හා තෙල් දුන්නේ මමයි කියා ඇය තේරුම්ගත්තේ නැත.+ මම ඇයට ඇති තරම් රන් හා රිදී දුන්නෙමි. නමුත් ඇය ඒවා බාල් දෙවියාට නමස්කාර කිරීම සඳහා භාවිත කළාය.+
9 “‘එබැවින් අස්වැන්න නෙළන කාලයේදී ධාන්‍යවත් මිදි කපන කාලයේදී අලුත් වයින්වත් මම තවදුරටත් ඇයට නොදෙන්නෙමි.+ ඇගේ නිර්වස්ත්‍රකම වසාගැනීමට මා දුන් ලොම් හා ලිනන් රෙදි මම ඇගෙන් උදුරාගන්නෙමි.+
10 ඇගේ පෙම්වතුන් ඉදිරියේ ඇයව නිරුවත් කරන්නෙමි.+ කිසිවෙකුටවත් ඇයව මගේ අතින් ගලවාගන්න ලැබෙන්නේ නැත.+
11 ඇගේ ප්‍රීතියට හේතු වන සෑම දෙයක්ම මම නැති කර දමන්නෙමි.+ උත්සව දිනයන්ද+ නව සඳ පායන දවස්ද+ සබත් දවස්ද ඇතුළු ඇය සමරන සෑම උත්සවයක්ම මම නැති කර දමන්නෙමි.
12 “මේ සියල්ල මගේ පෙම්වතුන්ගෙන් මට ලැබුණු තෑගි” කියා ඇය තම මිදිවැල්+ ගැනත් අත්තික්කා ගස්+ ගැනත් පවසන්නීය. එහෙත් මම ඒ සියල්ල නැති නාස්ති කර දමන්නෙමි. මම ඇගේ වතු කැලෑවක් බවට පත් කරන්නෙමි.+ වනසත්තු ඇවිත් එහි ගස් වැල් සියල්ල කා දමනු ඇත.
13 ඇය බාල් දේවතා රූපවලට+ සුවඳ දුම් ඔප්පු කිරීම+ සඳහා දින වෙන් කරගත්තාය. ඇය මුදු මාල පැළඳගෙන+ ඇගේ පෙම්වතුන් පසුපස යමින්+ මාව අමතක කළාය.+ ඒ හැම දෙයක් වෙනුවෙන් ඇය මට ගණන් දිය යුතුයි.’+ එසේ පවසන්නේ යෙහෝවා දෙවිය.
14 “‘එබැවින් මම ඇයව පාළුකරයට යවන්නෙමි.+ එහෙත් මාගේ කැමැත්ත කිරීමට මම ඇයව පොලඹවන්නෙමි. ඇගේ හදවතට දැනෙන සේ මම ඇයට කතා කරන්නෙමි.+
15 ඉන්පසු ඇගේ මිදිවතු මම නැවත ඇයට දෙන්නෙමි.+ ඇය ආකොර් තැනිතලාව+ මැදින් ගමන් කර පැතූ දේ ලබාගන්නීය. ඒ දවසේදී ඇය මට උත්තර දෙනු ඇත. ඇය යෞවන කාලයේදී+ හා ඊජිප්තු දේශයෙන් පිටතට ආ කාලයේදී කළාක් මෙන් මට උත්තර දෙනු ඇත.+
16 ඒ දවසේදී ඇය තවදුරටත්, “මගේ ස්වාමියා”* කියා මට කියන්නේ නැත. ඒ වෙනුවට, “ඔබ මගේ ස්වාමිපුරුෂයා” කියා ඇය මාව අමතන්නීය.’+ එසේ පවසන්නේ යෙහෝවා දෙවිය.
17 “‘මම ඇගේ මුවින් බාල් දේවතා රූපවල නම් ඉවත් කරන්නෙමි.+ එවිට ඒ රූපවල නම් ඇයට තවදුරටත් මතක් වන්නේ නැත.+
18 ඒ දවසේදී මම මාගේ සෙනඟ වෙනුවෙන් වනමෘගයන්ද+ ආකාශයේ පක්ෂීන්ද බඩ ගා යන සතුන්ද සමඟ ගිවිසුමක් ඇති කරගන්නෙමි. ඒ දේශයෙන් දුන්නද කඩුවද යුද්ධයද පහ කර,+ ඔවුන්ට සුරක්ෂිතව ජීවත් වීමට සලස්වන්නෙමි.+
19 මම ඔබ සමඟ විවාහ වී සදහටම ඔබට බැඳී සිටින බවට දිවුරා පොරොන්දු වන්නෙමි.+ ඔබට ධර්මිෂ්ඨකමද යුක්තියද ප්‍රේමයද* දයාවද පෙන්වා+ ඔබ සමඟ විවාහයෙන් බැඳී සිටින බවට දිවුරා පොරොන්දු වන්නෙමි.
20 ඔබ සමඟ බැඳී සිට විශ්වාසවන්තකමින් ක්‍රියා කරන බවට දිවුරා පොරොන්දු වන්නෙමි. එවිට ඔබ යෙහෝවා දෙවි වන මාව සැබවින්ම හඳුනාගනු ඇත.’+
21 “යෙහෝවා දෙවි මෙසේද පවසන්නේය. ‘ඒ දවසේදී මම ඔබට පිළිතුරු දෙමි. අහසට අවශ්‍ය දේ මම අහසට දෙන්නෙමි. පොළොවට අවශ්‍ය දේ අහසෙන් ලැබෙනු ඇත.+
22 එවිට පොළොවෙන් ධාන්‍යද+ අලුත් වයින්ද තෙල්ද ලැබෙන්නේය. යෙෂ්‍රෙයෙල්ට* අවශ්‍ය දේ ලැබෙනු ඇත.+
23 මම ඇයව බීජ මෙන් පොළොව පුරා වපුරන්නෙමි.+ දයාව නොලැබූ තැනැත්තියට මම දයාව පෙන්වන්නෙමි.+ මට අයිති නැති සෙනඟකට මම, “මාගේ සෙනඟ” කියා අමතන්නෙමි.+ ඔවුහුද, “ඔබ අපේ දෙවි” කියා පවසන්නෝය.’”+
පාදසටහන්
^ හෝ, “මගේ බාල්.” මූ.අ., “මගේ අයිතිකරු.”
^ හෝ, “ළැදි ප්‍රේමය.”
^ තේරුම, “දෙවි බීජ වපුරනු ඇත.”
