Abantu benshi babona ko ukungana kw’amoko ari indoto nsa.

•   “Kwishimira amoko bibandanya kumera nk’ubumara bwonona amashirahamwe, ikibano be n’uburyo abantu babayeho mu buzima bwa misi yose. Birabandanya gutuma haguma ubutandukane bw’amoko.”​—Umunyamabanga mukuru wa ONU, António Guterres.

 Hoba hazokwigera habaho ukungana kw’amoko? Bibiliya ibivugako iki?

 Bibiliya iratwereka ukuntu Imana ibona ukungana kw’amoko.

•   “[Imana] yakoze amahanga yose y’abantu iyakuye mu muntu umwe, ngo babe ku buringanire bwose bw’isi.”​—Ivyakozwe 17:26.

•   “Imana [ntigira] nkunzi, mugabo mw’ihanga iryo ari ryo ryose umuntu ayitinya kandi agakora ivy’ubugororotsi iramwemera.”​—Ivyakozwe 10:34, 35.

 Bibiliya irerekana ko abantu bose bagize umuryango umwe kandi ko Imana yemera abantu bo mu moko yose.

 Ukungana kuzobaho ku ntwaro y’Ubwami bw’Imana, ikaba ari intwaro yo mw’ijuru. Iyo ntwaro izokwigisha abantu ukuntu bofata abandi mu buryo bwiza. Abantu bazokwiga ukuntu bokwikuramwo agatima kose k’amacakubiri boba bafise.

•   “Ubugororotsi ni bwo ababa ku butaka bwimbuka bazokwiga.”​—Yesaya 26:9.

•   “Igikorwa c’ubugororotsi nyakuri kizotegerezwa gucika amahoro; umurimo w’ubugororotsi nyakuri na wo ucike impore n’umutekano gushika igihe kitagira urugero.”​—Yesaya 32:17.

 Muri kino gihe, abantu amamiliyoni bariko bariga muri Bibiliya ukuntu bofatana abandi icubahiro n’iteka.

•   Ushaka kumenya vyinshi, nusome ikinyamakuru Be maso! gifise umutwe uvuga ngo “Hoba hari umuti w’ukwinubana?”

•   Nusome ikiganiro kivuga ngo “Comment parler de racisme à votre enfant” kugira ubone ukuntu abavyeyi bashobora kuganira ico ciyumviro mu muryango.