Mintizro ya Vapostola 15:1-41
15 Ku tlhase vavanuna va kukazri lava a va huma Yudeya va sungula ku dondzrisa vamakwezru va ku: “Loko mi nga wu landzri Nawu wa Moxe wa kuva mi sokisiwa, a mi nge huluxiwi.”
2 Kambe ntsrhaku ka loko Pawulo na Barnaba va hambane na vone hi mavonela va tlhela va kanetana na vone, vamakwezru va hlawule Pawulo na Barnaba ni van’wana leswaku va yisa mhaka leyo ka vapostola ni vakulu lava nga Yerusalema.
3 Xileswo ntsrhaku ka loko bandla dzri va hekete ku dzringana mpfhuka wa kukazri, vavanuna lava va ye mahlweni ni liyendzro va tsremakanya hi le Fenikiya ni Samariya, va dzrungulela vamakwezru wutsrhokotsrhoko bya ndlela leyi vamatiko va ndzrulukiki ha yone kutani vamakwezru hinkwavu va nyonxa ngopfu swinene.
4 Loko va tlhase a Yerusalema va yamukeliwe ha hombe hi bandla, vapostola ni vakulu, kutani va va dzrungulela mintxhumu ya yinyingi leyi Xikwembu Nkulukumba a yi yentxiki hi ku tizrisa vone.
5 Kambe van’we ka lava a va landzrela tidondzro ta Vafarisi, lava gamiki va ndzruluka vapfumeli, va sekeleka va yima va ku: “Swa vileleka kuva va sokisiwa ni ku byeliwa leswaku va yingiseta Nawu wa Moxe.”
6 Xileswo a vapostola ni vakulu va hlengeletana akuva va vonisana mhaka leyi.
7 Ntsrhaku ka loko ku ve ni ku vulavulisana lokukulu,* Petro a sekeleka a va byela a ku: “Vavanuna, vamakwezru, mi swi tiva ha hombe leswaku ku sukela khale Xikwembu Nkulukumba a ni hlawule makazri kwenu akuva hi nomu wanga vhanu va matiko va twa madzrungula lamanene kutani va va vapfumeli.
8 Nakone Xikwembu Nkulukumba lweyi a tivaka timbilu, a kombise leswaku awa va yamukela hi ku va nyika moya wa ku xwenga, hi lani a yentxiki ha kone ni kwezru.
9 A kombise leswaku hine na vone a hi vona hi ndlela leyi fanaka, hi ku basisa timbilu tavu hi kola ka lipfumelo dzravu.
10 Kutani ha yini mi dzringa Xikwembu Nkulukumba hi ku zrwexa vadondzrisiwa mintsrhwalu ya ku bindzra leyi nambi vakokwana vezru nambi ku li hine hi kalaka hi nga swi kotanga ku yi zrwala?
11 Ku hambana ni leswo, hi ni lipfumelo dzra leswaku hi huluxiwa hi kola ka timpswalu letikulu ta Hosi Yesu hi lani na vone swi nga ha kone.”
12 Xileswo a ntlawa hinkwawu wu miyela, kutani wu sungula ku yingiseta Barnaba na Pawulo loko va va tlhamuxela mahlolana manyingi ni swihlamaliso leswi Xikwembu Nkulukumba a swi yentxiki makazri ka vamatiko hi ku tizrisa vone.
13 Loko va game ku vulavula, Yakobe a hlamula a ku: “Vavanuna, vamakwezru, ni yingisetani.
14 Simiyoni a hi tlhamuxele ha hombe ndlela leyi Xikwembu Nkulukumba a va dzrimukiki ha yone vhanu va matiko ni leswaku a makazri kwavu a sungule ku hlawula vhanu lava taka vitaniwa hi vito dzrake.
15 Nakone a mazritu lawa ma pfumelelana ni leswi tsraliwiki hi vaprofeta, swa ku:
16 ‘Ntsrhaku ka mintxhumu leyi, ni ta buya ni ta pfuxa yindlu* ya Davhida leyi hohlokiki, ni ta lulamisa leswi hohlokeliki ni tlhela ni yi pfuxa,
17 akuva vhanu lava saliki va djula Yehovha hi timbilu tavu hinkwatu, kun’we ni vhanu va matiko hinkwawu, vhanu lava vitaniwaka hi vito dzranga, ku hlaya Yehovha, lweyi a nga yene a yentxaka mintxhumu leyi,
18 leyi tiviwaka ku sukela khale.’
19 Kutani hi mavonela yanga a swi ta va swi nga li swinene kuva hi bindzrisela vamatiko, lava djulaka ku tizrela Xikwembu Nkulukumba,
20 kambe hi va tsralela leswaku va tsrhika mintxhumu leyi fambisanaka ni ku gandzrela swithombe, swiyentxo swa tingana hi tlhelo dzra tinkuku,* swihazri leswi fiki hi ku tlimbiwa nkolo,* ni ngati.
21 Hikusa ku sukela minkameni ya khale, ku ni vhanu lava va zrezraka mazritu ya Moxe a madoropeni hinkwawu, hikusa hi masavata hinkwawu ku dondzriwa mabuku yake a masinagogeni akuva vhanu va ma yingiseta.
22 Kutani a vapostola ni vakulu xikan’we ni bandla hinkwadzru, va kunguhata ku zrumela vavanuna a Antiyokiya lava va va hlawuliki makazri kwavu, akuva va famba na Pawulo na Barnaba. Va zrume Yudasi lweyi a vitaniwaka Barsabasi kun’we na Silasi, lava a va zrangela xikazri ka vamakwavu.
23 Hi leswi va swi tsraliki va va nyika va famba na swone:
“Hine vamakwenu, vapostola ni vakulu, ha mi losa n’wine vamakwezru mi nga Antiyokiya, Siriya ni Kilikiya, n’wine lava mi humaka ka vamatiko.
24 Hi twe leswaku ku ni vhanu va sukiki halenu va tlhasa va mi bindzrisela hi leswi va swi hlayiki, va zama ku mi hambukisa, kambe a hi hine hi va zrumiki.
25 Xileswo hi kunguhate ntxhumu wun’we, ku nga ku hlawula vavanuna hi va zrumela kwenu xikan’we ni vavanuna va ku zrandzreka kwezru, Barnaba na Pawulo,
26 vavanuna lava nyikeliki wutomi byavu* hi kola ka vito dzra Hosi yezru Yesu Kriste.
27 Xileswo hi mi zrumela Yudasi na Silasi, akuva na vone va ta mi byela mintxhumu yoleyi ya yin’we hi nomu.
28 Hikusa a moya wa ku xwenga kun’we na hine, hi vone swi yampswa kuva hi nga mi yengeseleli ntsrhwalu handle ka leswi swi nga swone swi vilelekaka, ku nga leswi:
29 mi tsrhika mintxhumu leyi nyikeliwiki swithombe, ngati, swihazri leswi fiki hi ku tlimbiwa nkolo,* ni swiyentxo swa tingana hi tlhelo dzra tinkuku.* Loko mi ya mahlweni mi tivonela ka mintxhumu leyi, swi ta mi fambela ha hombe. Hi mi navelela wutomi byinene!”*
30 Xileswo loko vavanuna lavo va suka lanu, va fulamela va ya Antiyokiya, va tlhasa va hlengeleta ntlawa hinkwawu va wu nyiketa papela ledzro.
31 Ntsrhaku ka loko va dzri dondzrile, va nyonxa hi ndlela leyi dzri va tiyisiki ha yone.
32 Kutani leswi Yudasi na Silasi na vone a va li vaprofeta, va kutxe vamakwavu ni ku va tiyisa hi mazritu manyingi.
33 Ntsrhaku ka loko va tsrhame nkamanyana kolanu, vamakwavu va va tsrhike va famba hi ku zrula va tlhelela ka lava va va zrumiki.
34 *——
35 Kambe Pawulo na Barnaba va sale a Antiyokiya, va dondzrisa ni ku zrezra madzrungula lamanene ya zritu dzra Yehovha xikan’we ni vamakwavu van’wana va vanyingi.
36 Ntsrhaku ka masikunyana, Pawulo a byela Barnaba a ku: “Swoswi a hi tlheli, hi ya ka vamakwezru a madoropeni hinkwawu lawa hi ma zrezreliki zritu dzra Yehovha, hi ya va pfuxela akuva hi vona leswaku va le ka xiyimu muni.”
37 Barnaba a a tiyimisele kuva va famba na Yohane, lweyi a vitaniwaka Marka.
38 Nambitanu, Pawulo a a nga swi djuli kuva va famba na yene, hi mhaka ya leswi a nga sama a va siya Pamfiliya a nga fambi na vone a ntizrweni wa ku zrezra.
39 Xileswo va holovisana ngopfu swinene lakakuva va tsravukana, Barnaba a teka Marka a famba na yene va wela va ya Kipra.
40 Ntsrhaku ka loko vamakwavu va khongotelele Pawulo leswaku Yehovha a mu komba timpswalu letikulu, a hlawule Silasi a famba na yene.
41 A khalute hi Siriya ni le Kilikiya a tiyisa mabandla.
Tintlhamuxelo ta le hansi
^ Kumbe: “ku holovisana lokukulu”.
^ Kumbe: “tende; ntsronga”.
^ Hi Xigriki: porneía. Vona Ntlhamuxelo Wa Mazritu.
^ Kumbe: “leswi dlayiwiki kambe swi kalaka swi nga humesiwanga ngati”.
^ Kumbe: “mahika yavu”.
^ Kumbe: “leswi dlayiwiki kambe swi kalaka swi nga humesiwanga ngati”.
^ Hi Xigriki: porneía. Vona Ntlhamuxelo Wa Mazritu.
^ Kumbe: “Salani ha hombe”.
^ Mazritu ya ndzrimana leyi a ma kone ka matsralwa ya khale.
