Mintizro ya Vapostola 10:1-48
10 A Khezariya a ku ni wanuna wa kukazri lweyi a a vitaniwa Korneliyu, a a li muzrangeli wa masotxha* lawa a ma vitaniwa masotxha ya le Italiya.*
2 A a txhava Xikwembu Nkulukumba a tlhela a mu gandzrela yene ni ndangu wake hinkwawu, a a yentxela swisiwana mintxhumu yinyingi leyinene nakone a a khongota Xikwembu Nkulukumba minkama hinkwayu.
3 Kolomu ka ma 15 wora* a ve ni xivoniso lani a voniki ntsrumi ya Xikwembu Nkulukumba yi mu tela yi tlhasa yi ku: “Korneliyu!”
4 Korneliyu a yi lavisisa na a zruzrumela, a yi vutisa a ku: “U djula yini Hosi?” A ntsrumi yi ku: “Xikwembu Nkulukumba a swi vonile a tlhela a swi hlayisa miyanakanywini swikhongoto swaku ni mintizro leyi u yi yentxelaka swisiwana.
5 Kutani swoswi zruma vhanu va ya Yopa va ya vitana wanuna lweyi a vitaniwaka Simoni lweyi a tiviwaka hi vito dzra ku Petro.
6 Wanuna lweyi, a le kaya ka Simoni muzrungi wa swikhumba. A kaya kwake ku kumeka kusuhi ni lwandle.”
7 Loko ntsrumi leyi a yi vulavula na yene yi sukile, a tekela ku vitana vatizri vake vabidzri kun’we ni musotxha lweyi a a txhava Xikwembu Nkulukumba, lweyi a a li mun’we wa lava a va mu tizrela,
8 a va byela hinkwaswu leswi yentxekiki a gama a va zruma a Yopa.
9 Hi mundzruku ka kone na va ya mahlweni ni liyendzro dzravu nakone na va li kusuhi ni ku tlhasa ka doropa dzroledzro, Petro a khwela henhla ka yindlu kolomu ka ma 12* akuva a ya khongota.
10 Kambe a gama a twa ndlala ya yikulu swinene. Nkama lowu va lulamiselaka swakuda a tikuma ingiki o lozra,
11 a vona tilo na dzri pfulekile kutani ku xika ntxhumu wa* ku fana ni panu ya yikulu ya lisima* na wu xixiwa misaveni wu khomiwe hi mune wa tiponta ta wone;
12 a ndzreni ka wone a ku ni swihazri swa tinxaka hinkwatu swa mune wa minenge, swihazri swa ku famba hi khuzri* ni tinyanyana ta tilo.
13 Kutani ku twala zritu dzri ku: “Petro, sekeleka u dlaya u da!”
14 Petro a hlamula a ku: “Hosi, a ni nge swi yentxi, hikusa a ni ngi ngi da ntxhumu lowu nyamiki nakone wu kalaka wu nga basanga.”
15 A zritu dzri tlhela dzri mu byela hi khambi dzra wubidzri dzri ku: “Tsrhika ku hlaya mintxhumu leyi Xikwembu Nkulukumba a yi basisiki u ku yi nyamile.”
16 A zritu ledzro a dzri yingele makhambi mazrazru kutani a panu yi* tlheliseliwa tilweni hi nkama wolowo.
17 Na Petro a ha kazratekile mayelanu ni leswaku leswi a swi voniki swi nga va na swi tlhamuxela yini, vavanuna lava zrumiwiki hi Korneliyu va vutisa leswaku he kwini kaya ka Simoni va va va yima kolanu nyangweni.
18 Va huwelela va vitana mhunu wa kukazri a mutini wolowo va mu vutisa leswaku Simoni lweyi a vitaniwaka Petro a nga va a yendzrele kolahayani ke.
19 Na Petro a ha yanakanyisisa hi leswi a swi voniki a lozrweni, a moya wa ku xwenga wu ku: “Wa swi twa! Ku ni vavanuna vazrazru va ku djuletelaka.
20 Xileswo xika u famba na vone, u nga ganaganeki nikutsrongo, hikusa hi mine ni va zrumiki.”
21 Kutani Petro a xika a va yela a tlhasa a ku: “Hi mine lweyi mi mu djuletelaka. Ni nga mi pfuna hi yini?”
22 Vone va ku: “Korneliyu, muzrangeli wa kukazri wa masotxha, wanuna wa ku lulama lweyi a txhavaka Xikwembu Nkulukumba nakone a tiko hinkwadzru dzra Vayuda dzri khanelaka ha hombe ha yene, a byeliwe hi Xikwembu Nkulukumba hi ku tizrisa ntsrumi ya ku xwenga akuva hi ta ku vitana u ya kaya kwake a ta twa leswi u taka mu byela swone.”
23 Xileswo Petro a va byela va nghena va tsrhama swanga vayeni vake. Mundzruku ka kone a pfuka a famba na vone.
Nakone van’we va vamakwezru va le Yopa va fambe na yene.
24 Hi siku ledzri landzreliki a tlhasa Khezariya. Nakunene Korneliyu a a va yimelile, a a zrambe maxaka ni vanghanu vake lavakulu.
25 Loko Petro a nghena, Korneliyu a mu tlhangaveta a tlhasa a wa hansi a mu khinsamela.
26 Kambe Petro a mu sekelekisa a ku: “Sekeleka, hikusa na mine ni mhunu ku fana na wene.”
27 Na a li ku buleni na Korneliyu, a nghena ndlwini a kuma leswaku ku hlengeletane vhanu va vanyingi.
28 Petro a va byela a ku: “Ma swi tiva leswaku swa yila kuva Muyuda a tipatsra kumbe ku tsrhindzrekelela mhunu wa lixaka dzrimbeni, nambitanu Xikwembu Nkulukumba a ni kombile leswaku ni nga hlaye ni byela mhunu ni ku a nyamile kumbe a nga basanga.
29 Xileswo loko ni vitaniwile, a ni ganaganekanga ku buya. Nambitanu na vutisa, mi ni vitanela yini?”
30 Korneliyu a ku: “Ka mune wa masiku ntsrhaku, a ni le ku khongoteni a ndlwini hi nkama wolowu wa ma 15 wora;* hiloko ku humelela wanuna wa kukazri na a yambale mpahla ya ku phatima a yima mahlweni kwanga
31 a ku: ‘Korneliyu, Xikwembu Nkulukumba a xi twile xikhongoto xaku ni mintizro leyi u yi yentxelaka swisiwana a yi vonile a tlhela a yi hlayisa miyanakanywini.
32 Kutani zruma vhanu va ya Yopa va ya vitana Simoni lweyi a tiviwaka hi vito dzra ku Petro. Wanuna lweyi a yendzrele kaya ka Simoni muzrungi wa swikhumba, lweyi a tsrhamaka kusuhi ni lwandle.’
33 Kutani ni game ni tekela ku zruma vhanu va ya ku vitana, nakone u yentxe ha hombe ku va u tile. Xileswo hinkwezru hi lani mahlweni ka Xikwembu Nkulukumba akuva hi yingela hinkwaswu leswi Yehovha a ku leletiki akuva u ta hi byela swone.”
34 Hiloko Petro a sungula ku vulavula a ku: “Swoswi ni swi twisisa ha hombe leswaku Xikwembu Nkulukumba a nga na xihlawuhlawu,
35 kambe a matikweni hinkwawu mhunu mun’wana ni mun’wana lweyi a mu txhavaka nakone a yentxaka leswi lulamiki awa yamukeleka kwake.
36 A zrumele zritu ka vana va Israyele akuva dzri ya va byela madzrungula lamanene ya ku zrula hi ku tizrisa Yesu Kriste—lweyi a nga Hosi ya hinkwavu.
37 Ma yi tiva mhaka leyi hangalakiki a Yudeya hinkwaku ku sukela a Galileya, ntsrhaku ka loko Yohane a zrezre hi ta babatiso:
38 mayelanu na Yesu lweyi a a li wa le Nazareta, ndlela leyi Xikwembu Nkulukumba a mu hlawuliki ha yone hi moya wa ku xwenga a tlhela a mu nyika ntamu, ni leswaku a fambafambe a tikweni a yentxa leswinene ni ku hanyisa hinkwavu lava a va xanisiwa hi Diyavulosi, hikusa Xikwembu Nkulukumba a a li na yene.
39 Nakone hine hi timboni ta hinkwaswu leswi a swi yentxiki a mugangeni wa Vayuda ni le Yerusalema; kambe vone va mu dlayile hi ku mu hayeka a mhandzrini.*
40 Xikwembu Nkulukumba a mu pfuxile hi siku dzra wuzrazru a va a mu pfumelela leswaku a voniwa,
41 ku nga li hi vhanu hinkwavu, kambe hi timboni leti Xikwembu Nkulukumba a tihlawuliki khale, ku nga hine lava va diki va tlhela va nwa na yene ntsrhaku ka loko a pfuxiwile a ku feni.
42 A tlhele a hi zruma leswaku hi zrezrela vhanu ni ku nyikela wumboni hi ku helela bya leswaku hi yene lweyi Xikwembu Nkulukumba a mu hlawuliki akuva a va muyavanyisi wa lava hanyaka ni lava fiki.
43 A vaprofeta hinkwavu va nyikela wumboni mayelanu na yene, bya leswaku hi kola ka vito dzrake mun’wana ni mun’wana lweyi a kombisaka lipfumelo kwake a ta dzrivaleliwa swidoho.”
44 Na Petro a ha vulavula hi timhaka leti, a moya wa ku xwenga wu xikela hinkwavu lava a va yingiseta zritu dzra Xikwembu Nkulukumba.
45 Kutani a vapfumeli* lava a va sokile lava a va te na Petro va hlamala, hikusa a nyiko ya mahala ya moya wa ku xwenga a yi txhululiwa ni ka vhanu va matiko.
46 Hikusa a va va twa va vulavula hi tindzrimi timbeni va dzrumisa Xikwembu Nkulukumba. Kutani Petro a hlamula a ku:
47 “Vhanu lava va yamukeli moya wa ku xwenga ku fana na hine. Xana a kone mhunu lweyi a nga sivelaka akuva va babatisiwa hi mati?”
48 Xileswo a va byela leswaku va babatisiwa hi vito dzra Yesu Kriste. Ntsrhaku ka leswo, va mu kombela leswaku a tsrhama na vone ku dzringana masikunyana.
Tintlhamuxelo ta le hansi
^ Kumbe: “a a li muzrangeli wa dzana”. Leswi liki a a zrangela 100 wa masotxha.
^ Ku nga khandzra dzra 600 wa masotxha ya Varoma.
^ Hi ku kongoma: “Kolomu ka wora dzra wu 9”.
^ Hi ku kongoma: “kolomu ka wora dzra wu 6”.
^ Hi ku kongoma: “xibya xa”.
^ Kumbe: “panu ya yikulu ya linyu”.
^ Kumbe: “leswi kokovaka”.
^ Hi ku kongoma: “xibya xa”.
^ Hi ku kongoma: “hi wora dzra wu 9”.
^ Kumbe: “nsinyeni”.
^ Kumbe: “vhanu va ku dumbeka”.
