Matej 10:1-42
10 Palo adava, ov vikingja ple 12 apostolen hem dengja len mokj te šaj te palden e demonen hem te sasljaren bilo savo nasvalipe.
2 Akala tane o anava e 12 apostolengere: prvo o Simon kole so vikinena sine Petar hem o Andrej leskoro phral; o Jakov hem leskoro phral o Jovan, o čhave e Zevedeeskere;
3 o Filip hem o Vartolomej; o Toma hem o Matej so khedela sine danok; o Jakov o čhavo e Alfeeskoro hem o Tadej;
4 o Simon o Revno* hem o Juda Iskariot kova so pokasno predajngja le.
5 O Isus bičhalgja akale 12 apostolen hem zapovedingja lenge: „Ma džan ko javera narodija hem ma khuven ko samarijanska dizja,
6 nego džan hem roden e našavde bakhren taro e Izraeleskoro kher.
7 Džikote džana, propovedinen hem vakeren: ’O nebesno Carstvo tano paše‘.
8 Sasljaren e nasvalen, vazden e mulen, sasljaren okolen so isi len lepra hem palden e demonen. Dobingjen bizo pare, bizo pare den.
9 Ma len tumencar ko pojas ni zlato, ni srebro, ni bakari,
10 ni torba hajbaja bašo drumo, ni duj nametke, ni sandale, ni kaš, soske o rabotniko zaslužinela te dobinel plo hajbe.
11 Ki bilo savi diz ili gav te khuven, roden okole so ka prifatinel tumen hem tumaro haberi, hem ačhoven adathe džikote na džana javerthe.
12 Keda ka khuven ko kher, pozdravinen* e kherutnen.
13 Ako priminena tumen, neka avel ki lende tumaro mir, a ako na priminena tumen, tumaro mir neka iranel pe ki tumende.
14 Adathe kote so nikoj nane te priminel tumen hem nane te šunel tumare lafija, ikljoven taro adava kher ili tari adaja diz hem tresinen o pravo taro tumare pre.
15 Čače vakerava tumenge, polokho ka ovel e dizjenge Sodom hem Gomor ko dive keda o Devel ka sudinel e manušenge, nego adale dizjake.
16 Ake, bičhalava tumen sar bakhre maškar o ruva, adaleske oven pretpazliva sar o sapa, a bezopasna sar o gulubija.
17 Pazinen tumen taro manuša, soske ka ingaren tumen ko sudo hem ka maren tumen ko lengere sinagoge.*
18 Hem baši mande, ka ikalen tumen anglo upravitelija hem carija, te šaj te den svedoštvo lenge hem e javere narodonge.
19 A keda ka ikalen tumen anglo sudo, ma sekirinen tumen sar ili so ka vakeren, soske ko adava momenti ka džanen so te vakeren.
20 Soske nane te keren samo tumen lafi, nego i sila tumare Dadeskiri ka kerel lafi preku tumende.
21 A o phral ka predajnel ple phrale te ovel mudardo, o dad ple čhave hem o čhave ka oven protiv pumare roditelija hem ka predajnen len te oven mudarde.
22 Hem sarine ka mrzinen tumen bašo mlo anav. Ama koj ka istrajnel dži ko krajo, ov ka ovel spasimo.
23 Keda ka progoninen tumen ki jekh diz, našen ki javer. Soske čače vakerava tumenge kaj o manušikano Čhavo* ka avel angleder te završinen e propovedibaja ko dizja hem ko gava ko Izrael.
24 O učeniko nane pobaro taro plo učiteli hem o robo nane pobaro taro plo gospodari.
25 Dovolno tano o učeniko te ovel sar plo učiteli hem o robo sar plo gospodari. Ako e domakjine vikinena le Velzevul,* kobor poviše ka vikinen agjaar leskere kherutnen?
26 Adaleske ma daran lendar, soske sa soj tano garavdo ka otkrinel pe hem sa soj tano tajno ka doznajnel pe.
27 Adava so vakerava tumenge ki temnica, vakeren le ki svetlina hem adava so vakerava tumenge pohari ko kan, propovedinen le taro krovija.
28 Ma daran taro okola so mudarena o telo, ama našti te uništinen o životo.* Ama daran taro okova so šaj te uništinel hem o životo hem o telo ki geena.*
29 Na bikinena pe li duj čiriklja jekhe tikne parake?* Sepak ni jekh lendar na perela ki phuv bizo te džanel tumaro Dad.
30 A tumenge čak sekoja bal taro šero tani gejmi.
31 Adaleske, ma daran, tumen vredinena poviše taro but čiriklja.
32 Sekoj so ka priznajnel anglo manuša kaj verujnela ki mande, me da ka priznajnav anglo mlo Dad soj ko nebo kaj ov tano mlo učeniko.
33 Ama, sekoj so na priznajnela anglo manuša kaj verujnela ki mande, me da anglo mlo Dad soj ko nebo nane te priznajnav kaj tano mlo učeniko.
34 Ma mislinen kaj aljum te anav mir ki phuv. Na aljum te anav mir, nego mači.
35 Soske, aljum te odvojnav e čhave ple dadestar, e čhaja ple dajatar hem e bojra ple sasatar.
36 Čače, e manušeskere dušmanja ka oven leskere kherutne.
37 Koj mangela ple dade ili ple daja poviše mandar, ov na zaslužinela te ovel mlo učeniko. Hem koj mangela ple čhave ili ple čhaja poviše mandar, ov na zaslužinela te ovel mlo učeniko.
38 Koj na mangela te phiravel plo stubo mučibaske* hem na džala pali mande, na zaslužinela te ovel mlo učeniko.
39 Koj arakhela plo životo, ka našavel le, a koj našavela plo životo baši mange, ka arakhel le.
40 Koj priminela tumen, priminela man da, a koj priminela man, priminela okole da so bičhalgja man.
41 Koj priminela jekhe proroko adaleske soj tano proroko, ka dobinel nagrada so dobinela la jekh proroko. Koj priminela jekhe pravedno manuše adaleske soj tano pravedno, ka dobinel i nagrada so dobinela la jekh pravedno manuš.
42 Sekoj so ka del jekheske taro akala tikne samo jekh čaša šudro pani te piel adaleske soj tano mlo učeniko, čače vakerava tumenge, ov sigurno nane te našavel pli nagrada“.
Footnotes
^ Ili: „o Kananejco“.
^ O Evreija pozdravinena pe sine e lafencar: „O mir neka ovel tuja“.
^ Dikh ko rečniko bašo „Manušikano Čhavo“.
^ Ili: „Beng“.
^ Ili: „našti te len tumendar i nadež te živinen palem“.
^ Doslovno: „jekh as“. Adaja sine para so sine la but tikni vrednost.
^ Dikh ko rečniko bašo „Stubo mučibaske“.
