Hechos 7:1-60
7 Shinapash sacerdote principalca* cashna nishpami Estebandaca tapurca: “Paicuna ninajun shimicunaca ¿ciertochu can?”.
2 Chaimi Estebanga cashna nirca: “Huauquicuna, taitacuna uyapaichi. Ñucanchi punda taita Abrahán, nara Harán llactapi causangapaj rishpallata Mesopotamia llactapi cajpimi, Jatun Taita Diosca paiman ricurirca.
3 Taita Diosca paitaca nircami: ‘Canba llactata, canba familiacunata saquishpa, ñuca ricuchigrijushca llactaman ri’ nishpa.
4 Shina nijpimi Abrahanga Caldea shuti llactamanda llujshishpa Harán llactapi causai callarirca. Abrahandaca paipa taita huañushca jipami, Harán llactamanda llujshishpa ñucanchi causanajunchi cai llactapi causangapaj shamuchun Taita Diosca mandarca.
5 Shinapash cai alpapica ni shuj pedazo alpagutallapash Taita Diosca na Abrahanmanga cararcachu. Pero Taita Diosca cai alpatami Abrahanmanbash paipa huahuacunamanbash carasha nirca.
6 Ashtahuanbash Taita Diosca Abrahandaca nircami, canba huahuacunaca ajeno llactacunapimi causanga. Chai llactamanda gentecunami paicunataca esclavocunatashna charinga y 400 huatacunatapashmi paicunataca maltratanga nircami.
7 Shinallata Taita Diosca nircami: ‘Paicunata esclavotashna charishca llactataca ñucami juzgasha’ nishpa. Chai jipaca caitapashmi nirca: ‘Chai jipami paicunaca chai llactamanda llujshishpa cai pushtupi ñucataca adorahuanga’ nishpa.
8 ”Shinallata Taita Diosca Abrahán runaguhuanmi shuj tratota* rurarca. Chaimi Abrahanbash paipa huahuacunapash circuncisión* nishcata rurana carca. Chaimandami paipa churi Isaac ña 8 punllagucunata charijpica circuncisión nishcata rurarca. Isaacca Jacob shuti churigutami charirca. Y Jacobca 12 churicunatami charirca. Paicunami ñucanchipa punda taitacuna tucurca.
9 Ñucanchi punda taitacunaca, envidiamandami Josetaca Egipto llactaman jatushpa cacharca. Pero Taita Diosca paitaca ayudajurcami.
10 Tucuilla jatun llaquicunamandapashmi Josetaca salvarca. Shinallata Egipto llactapa rey faraonba ñaupapi cashpa ali ricurichun, ali yachajushca cachunbashmi ayudarca. Chaimi faraonga Egipto llactatapash, paipa tucuilla huasitapash mandachun Josetaca churarca.
11 Shinapash tucuilla Egipto llactapi, tucuilla Canaán llactapimi yarjai tiempo tiarca. Chai tiempoca ninan llaqui tiempomi carca. Ñucanchi punda taitacunaca micungapaca na imagutallapash charishcarcachu.
12 Pero Jacobca Egipto llactapi micuna* tiajta uyashpami, ñucanchi punda taitacunataca chaiman cacharca.
13 Paicuna cutinbash rijpimi Joseca, ñucami cangunapa huauqui cani nirca. Chaipimi faraonga José familiata charishcata yachaj chayarca.
14 Chaimi Joseca paipa taitata, paipa tucuilla familiatapash Canaán llactata saquishpa Egipto llactaman shamuichi nichun cacharca. Egiptomanga 75 gentecunami* rirca.
15 Chaimi Jacobca Egipto llactaman urai rirca, chaipimi huañurca. Ñucanchi punda taitacunapashmi chaipi huañurca.
16 Paicunapa tullucunataca Siquem llactaman apashpami shuj bovedapi churarca. Chai bovedataca Abrahanmi, Hamor shuti runagupa churicunata Siquem llactapi randishcarca.
17 ”Abrahanman Taita Dios nishca shimicuna ña pactarina tiempo chayamujujpipachami, ñucanchi llactaca mirashpa Egiptopica ashtacacunapacha tucurca.
18 Shinapash Egipto llactapica, Joseta na rijsij shuj reymi mandai callarirca.
19 Chai reymi ñucanchi punda taitacunata llaquichingapaj umachirca. Shinallata, paicunapa llullu huahuacuna huañuchunmi, paicunataca paicunapa huahuacunata jichushpa saquichun munai na munai obligarca.
20 Chai punllacunapimi Moisesca nacirirca. Paica juyaillagupachami carca.* Paitaca quimsa quillacunatami paipa taitapa huasipi viñachirca.
21 Pero Moisespa taitamamacunataca Moisesta jichushpa saquichunmi obligarca. Chaimi faraonba ushica Moisesta japishpa paipa huahuatashna viñachirca.
22 Chaimi Moisesca, Egipciocunapa yachachishcacunapica, tucuipi alipacha yachajushca carca. Ashtahuangarin, paipa parlocunapash, ruraicunapash alipachami carca.
23 ”Moisesca 40 huatacunata charishpami, israelita huauquicunata ricungapaj rirca.
24 Chaipimi shuj egipcio runa shuj israelitata macajujta ricurca. Chaimi Moisesca chai israelitata difindishpa, chai egipciotaca huañuchirca.
25 Moisesca pensarcami, israelita huauquicunaca paihuanmi Taita Diosca ñucanchitaca salvajun ningami nishpa. Shinapash israelitacunaca na chaitaca yarcachu.
26 Cayandi punllaca ishcaipura macanajunajujta ricushpami Moisesca paicunapaman quimirirca. Paicuna ali tucuchun munashpami paicunataca, ‘cangunaca huauquipuramari canguichi. ¿Imamandata macanajunajunguichiyari?’ nirca.
27 Shinapash cumba runaguta macajushca runaca, Moisestaca tangashpami cashna nirca: ‘¿Candaca pita ñucanchita mandachun y ñucanchipa juez cachun churashcayari?
28 ¿Caina egipcio runata huañuchishcashnallatachu ñucatapash huañuchingapaj munajungui?’ nircami.
29 Chaita uyashpami Moisesca Egipto llactamanda pacajushpa rishpa, Madián llactapi causagrirca. Chaipimi cazararca, ishcai huahuacunatapash charirca.
30 ”Ña 40 huatacuna jipami, Sinaí urcu desiertopica* ninashna rupajuj yurapi Moisesmanga shuj ángel ricurirca.
31 Chaimi Moisesca ninanda manllarishpa, ashtahuan ali ricungapaj munashpa quimirirca. Chaipimi Jehová* Dios cashna nijta uyarca:
32 ‘Ñucami canba punda taitacunapa Taita Dios cani. Abrahanba, Isaacpa y Jacobpa Taita Diosmi cani’ nishpa. Chaita uyashpami Moisesca manllaimanda chujchushpa, ashtahuan quimirishpa ricungapaca na munarca.
33 Chaimi Jehová* Diosca Moisestaca nirca: ‘Ñucaca caipimi cani. Chaimi cai pushtupi cashpaca canba sandaliacunata llujchina cangui.
34 Egipto llactapi ñuca llacta maltratai tucujushcataca ricujunimi. Paicuna ninanda llaquirishpa huacanajujtapash uyashcanimi. Ñucami paicunataca salvasha. Shamui, candami Egiptoman cachagrini’ nircami.
35 Chai Moisestami cangunaca rechazashpa nircanguichi: ‘¿Candaca pita ñucanchita mandachun y ñucanchipa juez cachun churashcayari?’ nishpa. Shinapash ninashna rupajuj yurapi shuj angelta parlachishpami Taita Diosca Moisestaca canmi ñuca llactataca mandangui y salvangui nirca.
36 Moisesmi Egipto llactapipash, Mar Rojopipash shuj shuj jatun milagrocunata rurashpa Egipto llactamanda israelitacunataca llujchirca. Israelitacuna desiertopi 40 huatacunata cajpipashmi, shuj shuj jatun milagrocunata rurarca.
37 ”Chai Moisesmi israelitacunamanga nirca: ‘Taita Diosca ñucashnalla shuj profetatami paipa llactapi gentecunapuramanda agllanga’ nishpa.
38 Moisesmi israelitacunahuanga desiertopi carca. Moisesllatami, shuj ángel Sinaí urcupi parlajpica chaipi carca. Moisesmi ñucanchi punda taitacunahuanbash parlarca. Paimi Taita Diospa unaicaman tiana shimicunata uyashpa ñucanchiman parlarca.
39 Ñucanchi punda taitacunaca paita cazungapaca na munarcachu. Chaipa randica, paita rechazashpami, paicunapa shungu ucupica Egipto llactaman tigrana munaihuan causanajurca.
40 Shina causanajushpami paicunaca Aarón shuti runagutaca nirca: ‘Egipto llactamanda ñucanchita llujchimushca Moisesca imachari tucurcapash na yachanchichu. Chaimi ñucanchita ñaupaman pushachunga, huaquin dioscunata rurachun munanchi’ nirca.
41 Shina nishpami chai punllacunapica shuj shicuta rurashpa, israelitacunaca shuj sacrificiota* ruranajurca. Paicuna imata rurashcamanda cushijushpami fiestatapash rurarca.
42 Chaimi Profetacunapa libropi nishcashna Taita Diosca paicunata jichurca. Shinallata jahua cielopi estrellacunatapash adorachunmi saquirca. Profetacunapa libropica nijurcami: ‘Israel llactamanda gentecunalla, canguna 40 huatacunata desiertopi cashpaca, na ñucamanga ofrendacunata cararcanguichichu.
43 Ashtahuangarin, Moloc diospa carpa huasita, Refán diospa estrellatami shuj shuj ladocunaman apanajurcanguichi. Chaicunataca adorangapami rurarcanchi. Chaimi cangunataca Babilonia llactatapash yalishpa carucunaman apachun saquisha’ nirca.
44 ”Desiertopi cashpami ñucanchi punda taitacunaca, Taita Dios paicunahuan cashcata ricuchij carpa huasita charirca. Chai carpa huasica Moisesman Taita Dios imashina rurachun ricuchishcashnami rurashca carca.
45 Jipamanga ñucanchi punda taitacunapa huahuacunami, chai carpa huasitaca herenciatashna chasquirca. Chai carpa huasitami shuj gentecunapa llactaman rinajushpaca, Josuehuan apashpa rinajurca. Chai carpa huasica Davidpa punllacunacamanmi chai pushtupi carca.
46 Taita Diosca ninandami Davidtaca juyarca. Paica Jacobpa Taita Diosmanmi shuj huasita rurangapaj munani nirca.
47 Shinapash Taita Diospa huasitaca na paica rurarcachu. Sino Salomonmi chai huasitaca rurarca.
48 Pero jahua cielopi Taita Diosca, gentecuna rurashca huasipica na causanllu. Shuj profetaca nircami:
49 ‘Jehová* Diosca nircami, cieloca ñuca mandashpa tiajuna pushtumi can. Cutin alpaca ñuca chaqui saruna pushtumi can. ¿Imashina huasitata ñucamanga ruragringuichi? ¿Maijan pushtupita ñucaca causaita ushani?
50 ¿Nachu ñucallata tucuita rurarcani?’ nircami.
51 ”Cangunaca na intindij, rumi shungu, na uyajcunami canguichi. Taita Diospa espíritu santotapash nunca na cazunata yachanguichichu. Cangunapa punda taitacuna imata rurashcatallatami cangunapash ruranajunguichi.
52 Cangunapa punda taitacunaca tucui profetacunatami catiriashpa llaquichirca. Paicunami, ima culpatapash na charij* runagumi shamunga nishpa pundata villajcunataca huañuchirca. Chai runagutami cangunapash traicionashpa huañuchircanguichi.
53 Taita Diosca angelcunata utilizashpami cangunamanga Leyta curca. Shinapash cangunaca, Leypi ima nijujtaca na cazurcanguichichu” nircami.
54 Esteban shina nijta uyashpami, paicunaca* ninanda culirashpa, quirucunatapash canirinajurca.
55 Shinapash Estebanga, Taita Diospa espíritu santota chasquishpa, jahua cielota ricushpami Taita Dios punchapamba brillajujta ricurca. Jesustapash Taita Diospa ali ladopi shayajujta ricushpami nirca:
56 “Ricuichi, jahua cielo pascarishca cajtami ricujuni. Runapa Churica* Taita Diospa ali ladopimi shayajun”.
57 Shina nijpimi paicunaca tucui fuerzahuan shinllita caparishpa, rinricunatapash maquihuan taparishpa, tucuicuna Estebandaca ñapash japirca.
58 Chai jipaca, llactamanda llujchishpami Estebandaca rumicunahuan pigai callarirca.* Llullacunata nishpa juchachishca runacunaca, Saulo shuti joven runagupa ñaupapimi paicunapa jahualla churajunataca churarca.
59 Rumicunahuan piganajujpica, Estebanga cashna nishpami Jesustaca rogarca: “Ñuca Señor Jesuslla, ñuca causaitaca quiquinba maquipimi saquipani”.
60 Chashna nishca jipaca cungurishpa y shinllita caparishpami nirca: “Jehová* Dios, paicuna cai pecadota rurashcamandaca ama paicunataca castigapanguichu”. Shina nishca jipami Estebanga huañurca.*
Notacuna
^ Glosariopi “sacerdote principal” shimita ricupangui.
^ Glosariopi “circuncisión” shimita ricupangui.
^ O “grano”.
^ O “Taita Diospa ñaupapica juyaillagupachami carca”.
^ Caipica “huaquin gentecunalla causaj, ima horapash na tarpushca, chaquishca, yacupash illa, yuracunapash huaquin huaquinlla viñashca pambatami” shina nijun.
^ Glosariopi “sacrificio” shimita ricupangui.
^ Paicuna nishpaca “Sanedrín nishcacunatami” shina nijun.
^ Glosariopi “Runapa Churi” shimita ricupangui.
^ O “rumicunahuan cui callarirca, macai callarirca”.
^ Griego shimipica “puñurca” nijunmi.
