Hechos 3:1-26
3 Pedro y Juanga, Taita Diosta mañana horaspimi, Taita Diospa templo huasiman vichai rinajurca. Chai horasca cazi las 3mi carca.
2 Chaipica, suchu nacirishca runagutami, Taita Diospa templo huasipi Juyailla Pungu nishcaman apanajurca. Taita Diospa templo huasiman yaicunajuj gentecunata caridadta mañachunmi, chai runagutaca cada punlla chaiman apan carca.
3 Pedrota y Juanda templo huasiman yaicugrinajujta ricushcandimi chai runaguca, paicunata caridadta mañai callarirca.
4 Shinapash Pedro y Juanga chai runaguta ali ali ricushpami, paitaca nirca: “Ñucanchita ricuhuai”.
5 Shina nijpimi chai runaguca imagutapash carahuangami yashpa paicunataca ali ali ricujurca.
6 Shinapash Pedroca paitaca nircami: “Ñucaca ni culquita, ni orotapash na charipanichu. Pero ñuca ima charishcagutami canmanga caragrini. Quiquindaca Nazaret llactamanda Jesuspa shutipimi jatarishpa puri nishpa mandani”.
7 Shina nishpami chai runagutaca ali lado maquimanda japishpa jatarichirca. Chai ratomi chai runagupa chaquicunaca ali tucurca.
8 Chaimi chai runaguca jaicata shayarishpa puri callarirca. Paica purishpa, brincashpa* Taita Diosta alabashpami, Pedrohuan y Juanhuan Taita Diospa templo huasiman yaicurca.
9 Tucuilla gentecunami chai runagu purijujta y Taita Diosta alabajujta ricurca.
10 Chaipimi chai gentecunaca, Taita Diospa templo huasipi Juyailla Pungu nishcapi caridadta mañashpa tiajuj runagu cashcata cuenta japirca. Chai runagu ali tucushcata ricushpami paicunaca shimi pascaria, ninanda manllarishca ricunajurca.
11 Chai runaguca Pedrota y Juandaca na cacharishpami charijurca. Paicunaca Salomonba Corredor* nishca pushtupimi carca. Chaimi gentecunaca paicunapaman calpashpa rinajurca. Chai gentecunaca ninanda manllarishcami carca.
12 Chaita ricushpami Pedroca chai gentecunataca nirca: “Israel llactamanda runacuna ¿imashpata shinapacha manllarinajunguichi? ¿Ñucanchi ushaihuanlla o Taita Diosta ñucanchi catimandalla chai runaguta purichishca yashpachu ricunajunguichi?
13 Abrahanba, Isaacpa, Jacobpa shinallata ñucanchi punda taitacunapa Taita Diosmi paita Sirvij Jesustaca causachishpa jahua cieloman aparca. Chai Jesustami cangunaca, Pilato libre saquingapaj munajpipash na ricunayachishpa paita huañuchichun gentecunapa maquipi saquircanguichi.
14 Quiquingunaca Taita Diospa agllashca y alita ruraj* runaguta na ricunayachishpami, huañuchij runatara libre saquichun mañarcanguichi.
15 Chashna rurashpami quiquingunaca, Causaiman Apaj Runaguta* huañuchircanguichi. Shinapash Taita Diosca huañushcacunapuramandami paitaca causachirca. Chaitaca ñucanchipashmi ricurcanchi.
16 Jesuspa shutimanda y ñucanchicuna paipa shutipi crishcamandami quiquinguna ricunajushca, quiquinguna rijsishca runagupa chaquicunaca ali tucushca. Ñucanchicuna Jesuspi crishcamandami cai runaguca tucuicunapa ñaupapi ali tucushca.
17 Huauquicuna, na yachaimandami quiquingunata mandaj gentecunashnallata rurashcanguichi.
18 Taita Diosca shina rurashpami tucuilla profetacunaman punda villashca shimicunataca cumplishca. Profetacunaca Cristoca sufringami nishcarcami.
19 ”Shinaca quiquingunapa pecadocunata perdonachunga arripintirishpami, Taita Diosman tigrana canguichi. Chaimi Jehová* Diosca tranquilo cana tiempoguta caramunga.
20 Shinallata cangunapaman cachamusha nishca Cristo Jesustami Taita Diosca cachamunga.
21 Taita Diosca, pundallatami paipa ali profetacunamanga nirca, shuj punllaca tucuitami mushujta rurasha nishpa. Chai tiempo chayamungacamanmi Jesusca jahua cielopi cana can.
22 Moisespashmi nirca: ‘Quiquingunapa Jehová* Diosca ñucashnalla shuj profetatami paipa llactapi gentecunapuramanda agllanga. Chai profetatami quiquingunapaman cachamunga. Paitami uyana canguichi. Pai tucui imata nishcatami rurana canguichi.
23 Ashtahuangarin, chai Profetapa nishcacunata na uyaj runataca* Taita Diosmi tucuchinga’ nircami.
24 Samuelmanda callarishpa, paipa jipa tiashca tucuilla profetacunapashmi cai punllacunamandaca villarca.
25 Quiquingunami profetacunapa huahuacuna canguichi. Shinallata, Taita Diosca cangunapa punda taitacunahuan shuj tratota* rurashpami Abrahanmanga cashna nirca: ‘Cai alpapi tucuilla familiacunami canba huahuacunamanda bendiciai tucunga’ nishpa. Chai tratomandami quiquingunaca bendiciai tucunguichi.
26 Cada uno paicunapa nali ruraicunata saquichun ayudangapami, Taita Diosca paita Sirvij Jesusta agllashca jipaca, paitaca cangunapaman cachamurca”.
Notacuna
^ O “fahuashpa”.
^ Glosariopi “Salomonba Corredor” shimita ricupangui.
^ O “Agente Principalta”. Glosariopi “Agente Principal” shimita ricupangui.
