Apocalipsis 20:1-15

  • Satanás waranqa watapaq watasqa kasqanmanta (1-3)

  • Cristowan kuska waranqa wata gobiernaqkunamanta (4-6)

  • Satanás librasqa kasqanmanta chinkachisqa kasqanmantawan (7-10)

  • Yuraq tronoq ñaupanpi wañusqakuna juzgasqa kasqankumanta (11-15)

20  Chayllamanmi rikuruni juj angelta chinkay-chinkay ukhuq llaven apaykusqa+ jatun cadena apaykusqa ima janaq pachamanta uraykamushaqta.  Jinan ñaupa mach’aqway+ nisqa dragonta jap’irqan,+ paymi Saqraqa+ Satanaspas,+ jinaspa waranqa watapaq watarqan.  Chaymantataq chinkay-chinkay ukhuman wijch’uykurqan,+ chaypi wisq’aspataq juj sellota churarqan, chhaynapi chay waranqa wata tukunankama amaña nacionkunata pantachinanpaq. Chay qhepamanmi ichaqa pisi tiempollapaq kacharisqa kanqa.+  Chaymantataq rikuni tronokunata, chaypi tiyaqkunamanmi juzganankupaq atiy qosqa karqan, arí, pikunachus Jesusmanta Diosmantawan willasqankurayku wañuchisqa* karqanku chaykunatan rikuni;* paykunaqa manan manchay phiña animalta ni rijch’aynintapas adorarqankuchu, nitaq mat’inkupipas ni makinkupipas chay manchay animalpa marcantaqa chaskirqankuchu.+ Paykunan kausarimuspa Cristowan kuska waranqa watantin reykuna jina kamachinqaku.+  Chaymi chay ñaupaq kaq kausarimpuyqa.+ (Wakin wañusqa kaqkunan+ ichaqa chay waranqa wata tukuytaña kausarimpunqaku).  Kusisqa kachun pipas ñaupaq kaq kausarimpuypi kausarimuqqa.+ Paykunataqa manan imananqapaschu+ iskay kaq wañuyqa,+ aswanmi paykunaqa Diospa sacerdotenkuna+ Cristoq sacerdotenkuna ima kanqaku, waranqa watataqmi kamachinqakupas.+  Chay waranqa wata tukuqtinmi Satanasqa maypichus preso kasqanmanta kacharisqa kanqa,  jinan lloqsimuspa jallp’a pachaq tawantin esquinakunapi kaq nacionkunata pantachinqa, arí, Gogta, Magogtawanmi pantachinqa, jinaspa guerrata ruwanankupaq juñunqa. Chay juñusqakunaqa lamar-qocha patapi aqo jinaraqmi kanqaku.  Chay nacionkunan jallp’a pachantinman ch’eqerispanku ch’uya runakunaq karpakusqankuta, munasqa llaqtata ima muyuykunqaku. Ichaqa janaq pachamantan nina lloqsimunqa jinaspa paykunata ruphapunqa.+ 10  Pantachiqninku Saqrataq azufreyoq nina qochaman wijch’uykusqa kanqa, chaypiñan kasharqanku manchay phiña animalpas+ falso profetapas;+ chaypin tuta-p’unchay wiñay-wiñaypaq carcelasqa* kanqaku. 11  Chaymantan rikullanitaq juj jatun yuraq tronota, chay tronopi tiyashaqtawan.+ Paypa ñaupanmantan jallp’a pachawan cielowan ima ayqekurqanku,+ manañan tarisqachu karqanku. 12  Chaymantan rikullanitaq wañusqakunata, juch’uykunata jatunkunatawan tronoq ñaupanpi sayashaqta, chaypin qelqa k’uyukuna kichasqa karqan. Chaymantan waj qelqañataq kichasqa karqan, chayqa kausay libron kasqa.+ Chay wañusqakunaqa imachus ruwasqankuman jina, qelqa k’uyukunapi imachus qelqasqa kasqanman jinan juzgasqa karqanku.+ 13  Lamar-qochapas chaypi wañusqa kaqkunatan entregarqan, wañuypas Sepulturapas* chaypi wañusqakuna kaqtan entregarqanku, jinan paykunaqa imachus ruwasqankuman jina sapankanku juzgasqa karqanku.+ 14  Chaymantataq wañuypas Sepulturapas nina rauray qochaman wijch’uykusqa karqanku,+ chay nina rauray qochaqa+ iskay kaq wañuywanmi tupan.+ 15  Chaymantapas piqpa sutinchus mana kanchu kausay libropi qelqasqa chay runapas+ nina rauray qochamanmi wijch’uykusqa karqan.+

Uraypi willakuykuna

Griego rimaypiqa “hachawan wañuchisqa” ninmi.
Chaypiqa “chaykunaq almantan rikuni” nillanmantaqmi. Qhaway Explicasqa simikuna nisqapi “Alma” nisqata.
Griego rimaypiqa “ñak’arichisqa” ninmi. Bibliapi ñak’ariymanta rimaspaqa mayninpin wisq’asqa kaymanta otaq carcelasqa kaymanta rimashan. Qhaway Mateo 8:29; Lucas 8:28, 31 textokunata.
Griego rimaypiqa “Hadespas” ninmi. Qhaway Explicasqa simikuna nisqapi “Sepultura” nisqata.