Isaías 43:1-28
43 Jacob, kamaqniyki Jehová Diosmi khaynata nin,Israel, ruwaqniyki Diosmi khaynata nisunki:+
“Ama manchakuychu, noqan rantirqayki.+
Sutiykimantan wajamurqayki,qanqa noqaqmi kanki.
2 Unuta chimpaqtiykiqa chaypin qanwan kashasaq,+mayuta pasaqtiykipas manan millp’usunkichu.+
Ninaq sonqonta puriqtiykipas manan ruphasunkichu,ninaqa manan imanasunkipaschu.
3 Noqan Diosniyki Jehová Diosqa kani,Israelpa ch’uya Diosninmi kani,salvaqniyki Diosmi kani.
Qanta libranaypaqmi Egiptota qorqani,qanraykun Etiopiata Sebatapas qorqani.
4 Qanqa sonqoypaq jinan kanki,+allin qhawarisqan kanki, maytan munakuyki.+
Qanraykun runakunata qosaq,vidaykiraykun nacionkunata entregasaq.
5 Ama manchakuychu, noqaqa qanwanmi kashani.+
Mirayniykitan inti lloqsimuy ladomanta pusamusaq,qantataq inti chinkaykuy ladomanta apakampusayki.+
6 Wichay ladotan nisaq: ¡Kutichimpuway!,+ nispa.
Uray ladotataq nisaq: ¡Ama jap’ikapuychu!
Churiykunata apampuway, kay pachaq cantonpi kaq ususiykunata pusampuway,+
7 llapa sutiyta apaqkunata kutichimpuway,+jatunchakunaypaq kamasqaykunata, ruwasqaykunata pusampuway,+ nispa.
8 Chay llaqtata lloqsichimuy,paykunaqa ñawiyoqña kanku chaypas manan rikunkuchu,ninriyoqña kanku chaypas manan uyarinkuchu.+
9 Llapa nacionkuna juj jawallaman juñukuchunku,llaqtakunapas llapanku juñukuchunku.+
¿Paykunamanta mayqenmi imachus pasananta willanman?
¿Mayqenninkun imachus pasananña kashan chayta willanman?+
Testigaqkunata pusamuchunku razontachus rimashanku manachus chayta yachakunanpaq,paykuna uyarichunku jinaspa cheqaqchus manachus chayta nichunku”,+ nispa.
10 Jehová Diosmi nin: “Qankunan testigoykunaqa kankichis,+ajllakusqay kamachiymi kankichis.+
Noqan ajllakurqaykichis reqsiwanaykichispaq, noqapi iñinaykichispaq,kaqllapuni kasqaytapas yachanaykichispaq.+
Noqallapunin Diosqa kani,manan jayk’aqpas juj Diosqa karqanchu, manataqmi kanqapaschu.+
11 Noqaqa Jehová Diosmi kani,+ noqallan libraqqa kani, manan jujqa kanchu”,+ nispa.
12 Jehová Diosqa nillantaqmi:
“Noqan willarqani, noqan salvarqani, noqan reqsichirqanipas,qankuna ukhupi manaraq ima diospas kashaqtinmi chaykunata ruwarqani.+
Chhaynaqa, qankunaqa testigoykunan kankichis, noqataq Diosniykichis kani.+
13 Noqaqa kaqllapunin kani,+manan pipas makiymantaqa imatapas qechuwanmanchu.+
¿Pin noqaq ima ruwasqaytapas qolluchinman?”,+ nispa.
14 Rantiqniykichis Jehová Diosmi,+ Israelpa ch’uya Diosninmi+ nin:
“Qankunaraykun Babiloniaman juj runata kachasaq,punku trancanakunatan pampaman wijch’usaq,+jinan Caldea runakunaqa barconkupi manchakuymanta qaparinqaku.+
15 Noqaqa Diosniykichis Jehová Diosmi kani, ch’uya Diosniykichismi kani,+Israelta kamaqmi kani,+ reyniykichismi kani”,+ nispa.
16 Jehová Diosmi, lamar-qochanta ñanta kichaq Diosmi,aytikushaq unuq chaupinta ñanta ruwaq Diosmi,+
17 guerrapaq carretakunata orqomuqmi, caballokunata phawachimuqmi,+ancha atiyniyoq soldadokunata lloqsichimuqmi nin:
“Mast’a pampan kanqaku, manan jatariyta atinqakuchu.+
Phukurparisqan kanqaku, mecheropi nina jinan phukusqa kanqaku”, nispa.
18 Diosmi nin: “Aman ñaupaqpi imapas kaqkunataqa yuyarinkichischu,aman chaykunamanqa yuyayta churankichischu.
19 Juj mosoq ruwaytan ruwasaq.+
¡Qhawariychis! Ñan qallarishaniña.
¿Manachu cuentata qokunkichis?
Ch’in ladontan ñanta kichasaq,+ch’in aqo ladopin unuta purichisaq.+
20 Salqa animalkunan jatunchawanqa,campopi monte alqokunan avestruzkunan alabawanqa,ch’in ladokunapi unuta purichisqaymantan alabawanqaku,ch’in aqo pampakunapi mayuta purichisqaymantan alabawanqaku,+llaqtayman, ajllakusqayman unuta ujachisqaymantan jatunchawanqaku;+
21 noqapaqmi chay llaqtataqa ruwakurqani,noqata jatunchawanankupaqmi ruwakurqani.+
22 Qanqa Jacob, manan wajakamuwarqankichu,+qanqa Israel, noqamantan sayk’upurqanki.+
23 Manan ruphachina ofrendapaq ovejata apamuwarqankichu,manan sacrificiota jaywamuwarqankichu.
Noqaqa manan mana munashaqtachu ima regalotapas mañakurqayki,manan mana munashaqtachu yuraq inciensotapas* qochikurqayki.+
24 Manan qolqeykiwanqa sumaq q’apaq plantataqa rantipuwarqankichu,manan wira sacrificiowanpas sajsachiwarqankichu.+
Chaykunata qowanaykimantaqa juchaykikunatan wijch’uykuwarqanki,pantasqaykikunawanpas sayk’upuniñan.+
25 Noqan juchaykikunata pichaqqa kani,+sutiyraykun juchaykikunata pichani,+manañan juchaykikunataqa yuyasaqñachu.+
26 Jaku juicioman jaykusun, imapas qonqasqayta yuyarichiway,imatachus rimanaykita rimay, razonniykita willakuy.
27 Ñaupa taytaykichisqa juchallikurqanmi,umalliykichis runakunapas noqa contran jatarirqanku.+
28 Chaymi templopi umallikunata qhellita jina qhawarisaq,Jacobtan ch’usaqman tukuchisaq,Israeltan lliuwan k’amichisaq.+
Uraypi willakuykuna
^ Chaypiqa “olibanotapas” nillanmantaqmi.