Gálatas 2:1-21
2 Chaymantataq chunka tawayoq wata qhepaman Jerusalén llaqtata rillarqanitaq Bernabewan+ kuska Titota pusarikuspa.+
2 Jerusalentaqa rirqani janaq pachamanta kamachisqa kasqayraykun, chaypin allin respetasqa iñiqmasikunaman sapaqllapi willarqani waj nacionkunaman allin willakuykuna willashasqaymanta, chaytaqa ruwarqani chaykama llank’ashasqay ñaupaq llank’asqaypas allinchus kasharqan icha yanqapaqchus kasharqan chayta yachanaypaqmi.
3 Ichaqa noqawan kashaq Titoqa+ griego runaña karqan chaypas, manan kamachisqachu karqan qhari kaynin qaracha kuchusqa kananpaqqa.+
4 Chay jawan iñiq t’aqapi rijuriq yanqa iñiqkunaqa mana allinta rimayta qallarirqanku, paykunan mana reparachikuspalla iñiq t’aqaman jaykumusqaku+ Cristo Jesusrayku libre kasqanchista qhawaq,+ chhaynapi kamachikuy simiman watawananchispaq.+
5 Noqaykuqa manapunin paykunataqa ni juj ratullapas kasurqaykuchu,+ chhaynapi cheqaq allin willakuykuna qankunallawanpuni kashananpaq.
6 Ichaqa chay allin qhawarisqa iñiqmasikunapas+ noqamanqa manan ima mosoq yachachikuytapas willawarqankuchu. (Paykuna ñaupaqpi imaynaña karqanku chaypas, noqapaqqa manan imananpaschu, Diospas manan runataqa rijch’ayninta qhawaspachu juzgan).
7 Aswanmi paykunaqa yacharqanku, imaynan Pedroqa qhari kayninku qaracha kuchusqa kaqkunaman allin willakuykunata willananpaq churasqa karqan, chhaynallataq noqapas qhari kayninku qaracha mana kuchusqa kaqkunaman allin willakuykunata willanaypaq churasqa kasqayta.+
8 Arí, Diosmi Pedroman atiyta qorqan qhari kayninku qaracha kuchusqa kaqkunapaq apóstol kananpaq, payllataqmi noqamanpas atiyta qowarqan waj nacionkunapaq apóstol kanaypaq.+
9 Jinan paykunaqa Dios ancha sumaq sonqo kayninta rikuchiwasqanta repararqanku,+ chaymi columna jina kaqkuna Santiago,+ Cefas,* Juan ima Bernabeta noqatawan paña makinkuwan jap’iykuspa+ niwarqanku: “Allinmi waj nacionkunata willaq rinkichis chayqa, noqaykutaq qhari kayninku qaracha kuchusqa kaqkunaman willasaqku”, nispa.
10 Chaymantataq niwarqanku: “Wajcha iñiqmasinchiskunataqa qhawarillankichispuni”, nispa, chayta ruwanaypaqmi noqaqa tukuy atisqayta kallpachakurqani.+
11 Chaymi noqaqa Antioquía llaqtata+ Cefas+ jamuqtin uyanpi anyarqani mana allin ruwashasqanmanta.
12 Santiagoq+ kachamusqan runakuna manaraq chayamushaqtinqa waj nacionkunamanta runakunawan kuskan payqa mijuq,+ paykuna chayamuqtinkun ichaqa phiñakunankuta manchakuspa manaña waj nacionkunamanta runakunawan kuskachu mijusharqan, chay chayamuqkuna qhari kayninku qaracha kuchusqa runakuna kasqankurayku.+
13 Wakin iñiq judiokunapas Pedroq iskay uya jina ruwasqantan qatikullarqankutaq, hasta Bernabewanpas chaytan ruwallarqantaq.
14 Chaymi noqaqa mana cheqaq yachachikuyman jinachu ruwashasqankuta reparaspa+ llapankuq ñaupanpi Cefasta nirqani: “Qanqa judío runaña kashaspapas waj nacionkunamanta runakuna jinataq kausashanki chayqa, ¿imaynapitaq waj nacionkunamanta runakunatari tanqashanki judío runakunaq costumbrenta ruwanankupaq?”,+ nispa.
15 Noqanchis judío runakunaqa manaña waj nacionkunamanta juchasapa runakuna jinachu kanchis chaypas,
16 allintan yachanchis runaqa mana kamachikuy simita junt’asqanraykuchu chaninpaq jap’isqa kananta, aswanpas Cristo Jesuspi+ iñisqanraykulla chaninpaq jap’isqa kananta.+ Chaymi Cristo Jesuspi iñinchis, chhaynapi Cristopi iñisqanchisrayku chaninpaq jap’isqa kananchispaq, manataq kamachikuy simita junt’asqanchisraykuchu. Arí, manan pipas kamachikuy simita junt’asqanraykuchu chaninpaqqa jap’isqa kanqa.+
17 Cristorayku chaninpaq jap’isqa kayta maskhasqanchisraykuchus jujkuna juchasapata jina qhawariwasunman chayqa, ¿nisunmanchu: “Criston juchaman tanqashawanchis”, nispa? ¡Manapunin!
18 Ñaupaq tiempopi thunisqay kaqkunatachus wajmanta jatarichishayman chayqa, kamachikuy simitan p’akishayman.
19 Noqaqa kamachikuy simiq yanapayninwanmi kamachikuy simipaq wañurqani,+ chhaynapi Diospaq kausanaypaq.
20 Chaymantapas Cristowan kuskan k’aspipi clavasqa kashani,+ chaymi manaña noqachu kausashani,+ aswanpas Criston noqapi kausashan. Chayraykun runa kayniypiqa Diospa Churinpi iñispa kausashani,+ paymi noqata munakuwaspa noqarayku wañurqan.+
21 Noqaqa manan Diospa ancha sumaq sonqo kaynintaqa wijch’uykukunichu.+ Kamachikuy simiwanchus pipas chaninpaq jap’isqa kanman chayqa, yanqapaqchá riki Cristoqa wañurqan.+
Uraypi willakuykuna
^ Paytaqa “Pedro” nikullantaqmi.
