Éxodo 6:1-30
6 Jinan Jehová Diosqa Moisesta nirqan: “Kunanmi rikunki faraonta* imachus ruwasqayta.+ Paytan mat’isaq, jinan kacharisunkichis. Atiyniytan rikuchisaq, jinan llaqtanmanta qarqosunkichis”,+ nispa.
2 Diosqa nillarqantaqmi: “Noqaqa Jehová Diosmi kani.
3 Noqan Abrahanmanpas, Isaacmanpas, Jacobmanpas rijuriq kani: Tukuy atiyniyoq Diosmi kani,+ nispa. Ichaqa manan paykunamanqa reqsichirqanichu Jehová sutiytaqa.+
4 Paykunawanmi noqaqa rimanakurqani Canaán jallp’ata qopunaypaq. Chay jallp’apin paykunaqa forastero jina tiyarqanku.+
5 Noqaqa allintan yachani Israel runakunaq khuyay waqasqankuta, Egipto runakuna sinchita llank’achisqankutapas. Yuyarinin ñaupa taytankuwan rimanakusqaytapas.+
6 ”Chayrayku Israel runakunata nimuy, Diosmi nin: Noqaqa Jehová Diosmi kani. Noqan kacharichisaykichis Egipto runakunamanta, esclavo kasqaykichismantapas.+ Egipto runakunata sinchita castigaspan atiyniywan librasaykichis.+
7 Qankunan llaqtay kankichis noqataq Diosniykichis kasaq.+ Chaymantapas qankunaqa allintan yachankichis noqa Jehová Diosniykichis kasqayta, Egipto runakunamanta esclavo kasqaykichismantapas libraqniykichis kasqaytawan.
8 Abrahanman, Isaacman, Jacobmanwan qonaypaq prometesqay jallp’amanmi pusasaykichis, chaytan qankunaman qopusaykichis.+ Noqaqa Jehová Diosmi kani,+ nispa”.
9 Chaymantataq Moisesqa Diospa imachus nisqanta Israel runakunaman willarqan, paykunan ichaqa mana uyarikurqankuchu. Chay runakunaqa mayta sufrisqankuwanmi sinchi llakisqa kasharqanku.+
10 Jehová Diosmi Moisesta nillarqantaq:
11 “Egipto rey faraonpa ñaupanman jaykuspa niy Israel runakunata kacharinanpaq”, nispa.
12 Moisesmi ichaqa Jehová Diosta nirqan: “Manan Israel runakunapas kasuwanchu,+ ¿chaychu kunan faraón kasuwanman sasachakuspa rimaq kashaqtiy?”,+ nispa.
13 Chaywanpas jujmantan Jehová Diosqa Moisesta Aarontawan kamachirqan Israel runakunata faraontapas imatachus ninankupaq, chhaynapi Egiptomanta Israel runakunata orqonankupaq.
14 Kaykunan karqan sapanka ayllukunapi umalli runakuna. Israelpa phiwi* wawan Rubenpa+ wawankunan karqan: Anok, Palú, Ezrón, Carmí ima.+ Paykunan karqanku Rubén ayllu familiamanta.
15 Simeonpa wawankunan karqan: Jemuel, Jamín, Oaj, Jakín, Zóar, Canaán warmipi wawan Shaúl ima.+ Paykunan karqanku Simeón ayllu familiamanta.
16 Levipa wawankunan+ karqan: Guersón, Cohat, Merarí ima.+ Paykunamantan jamun Leví ayllu runakuna. Leviqa pachaj kinsa chunka qanchisniyoq watatan kausarqan.
17 Guersonpa wawankunan karqan Lifniwan Simeipiwan.+ Paykunan karqanku familiankupi umallikuna.
18 Cohatpa wawankunan karqan: Amram, Izar, Hebrón, Uziel ima.+ Coajqa pachaj kinsa chunka kinsayoq watatan kausarqan.
19 Meraripa wawankunan karqan Maliwan Musipiwan.
Chaykunan karqanku Leví ayllumanta familiakuna, ima familiamantachus kasqankuman jina.+
20 Amramqa papanpa panan Jokebedwanmi casarakurqan.+ Paymi onqokurqan Aaronta Moisestawan.+ Amramqa pachaj kinsa chunka qanchisniyoq watatan kausarqan.
21 Izarpa wawankunan karqan: Coré,+ Néfeg, Zicrí ima.
22 Uzielpa wawankunan karqan: Misael, Elzafán,+ Sitrí ima.
23 Aaronmi casarakurqan Aminadabpa ususinwan, Nasonpa+ panan Elisebawan. Paymi onqokurqan Nadabta, Abiuta, Eleazarta, Itamartawan.+
24 Corepa wawankunan karqan: Asir, Elcaná, Abiasaf ima.+ Paykunan karqanku Coré familiamanta.+
25 Aaronpa wawan Eleazarmi+ Putielpa jujnin ususinwan casarakurqan. Paymi Finehasta+ onqokurqan.
Paykunan karqanku Leví ayllu familiakunapi umallikuna.+
26 Aaronta Moisestawanmi Jehová Dios nirqan: “Israel runakunata Egiptomanta orqomuychis ayllunkuman jina t’aqasqata”,+ nispa.
27 Paykunan Egipto rey faraonta rimapayarqanku Israel llaqtata chay nacionmanta orqomunankupaq. Aaronwan Moisespiwanmi+ chayta ruwarqanku.
28 Jehová Dios Egiptopi Moisesta rimapayasqan p’unchaymi
29 Jehová Diosqa Moisesta nirqan: “Noqaqa Jehová Diosmi kani. Egipto rey faraonman willamuy llapa imachus nisqayta”, nispa.
30 Moisesmi ichaqa Jehová Diosta nirqan: “Diosníy, noqaqa manan allin rimaqchu kani, ¿chaychu kunan noqata faraón uyariwanman?”,+ nispa.
Uraypi willakuykuna
^ Egipto reykunatan “faraón” nispa niqku.