Éxodo 3:1-22
3 Moisesqa suegron Jetroq uywa michiqninmi kapurqan,+ Jetroqa Madián runakunaq sacerdotenmi karqan. Juj kutinmi Moisesqa ovejakunata qatirqan inti jaykuy ch’inneq ladoman, jinaspa chayarqan cheqaq Diospa ajllakusqan Horeb orqoman.+
2 Chaypin kiskayoq sach’a sonqopi, juj nina rauraypi Jehová Diospa angelnin Moisesman rijurirqan.+ Moisespa qhawarinanpaqqa raurasharqanmi chay sach’aqa, ichaqa manan rupharqanchu.
3 Chaymi Moisesqa nirqan: “¡Imataq jaqayri! ¿Imaraykutaq chay sach’ari mana ruphanchu? Risaq, qhawaramusaq imachus pasashan chayta”, nispa.
4 Moisespa asuykusqanta rikuspan Jehová Diosqa chay raurashaq sach’amanta nimurqan: “¡Moisés! ¡Moisés!”, nispa. Paytaq nirqan: “Kaypin kashani”, nispa.
5 Jinan Diosqa nimurqan: “Amaña nishuta asuykamuychu. Usut’aykita ch’utikuy, chay sarusqayki pampaqa ch’uyan”, nispa.
6 Diosqa nimullarqantaqmi: “Noqan kani taytaykiq Diosnin, Abrahanpa Diosnin,+ Isaacpa Diosnin,+ Jacobpa Diosninpas”,+ nispa. Chayta uyarispan Moisesqa uyanta pakakurqan, payqa manchakurqanmi cheqaq Diosta rikuyta.
7 Chaymantan Jehová Diosqa nimullarqantaq: “Allintan rikuni Israel llaqtay Egipto jallp’api may sufrisqanta. Uyarinin sinchita llank’achisqanku jawa mañakamuwasqankutapas. Allintan yachani may llakipi tarikusqankutapas.+
8 Chaymi Egipto runakunaq makinmanta libraq uraykamusaq,+ jinaspa pusamusaq juj jatun jallp’aman, sumaq jallp’aman, maypichus lechepas mielpas askha kan chayman.+ Arí, Canaán runakunaq, Het runakunaq, amorreo runakunaq, perizita runakunaq, heveo runakunaq, Jebús runakunaq jallp’anmanmi pusasaq.+
9 Uyarinin Israel runakunaq khuyay waqasqankuta, rikunin Egipto runakuna mayta ñak’arichisqankutapas.+
10 Chayraykun qanta faraonman* kachasayki, qanmi Israel llaqtayta Egiptomanta orqomunki”,+ nispa.
11 Moisesmi ichaqa Diosta nirqan: “¿Pitaq noqari kani faraonpa ñaupanman rinaypaq, Israel runakunata Egiptomanta orqomunaypaqpas?”, nispa.
12 Jinan Diosqa nirqan: “Qanwanmi noqa kashasaq.+ Egiptomanta llaqtayta orqomuspan kaypi noqa cheqaq Diosta adorawankichis,+ chaymi señal kanqa noqapuni qanta kachasqaymanta”, nispa.
13 Moisesmi ichaqa nillarqantaq: “Israel runakunaman rispa nimusaq: Ñaupa taytaykichiskunaq Diosninmi kachamushawan, nispa chayqa, tapuwanqakuchá, ¿imataq sutinri?+ nispa, ¿imanisaqtaq paykunatari?”, nispa.
14 Jinan Diosqa nirqan: “Noqan Kasaq Imachus Munasqayman Jina”,*+ nispa. Nillarqantaqmi: “Israel runakunatan nimunki: Noqan Kasaq nisqan qankunaman kachamushawan,+ nispayki”, nispa.
15 Diosqa jujmantan Moisesta nillarqantaq:
“Israel runakunatan ninki: Ñaupa taytaykichis Abrahanpa Diosnin,+ Isaacpa Diosnin,+ Jacobpa Diosnin+ Jehová Diosmi qankunaman kachamushawan, nispayki. Chaymi sutiyqa, chay sutiwanmi wiñay-wiñaypaqpas+ yuyarisqa kasaq.
16 Chhaynaqa phaway, Israelpi umalliqkunata* juñuspa nimuy: Ñaupa taytaykichis Abrahanpa, Isaacpa, Jacobpa Diosnin Jehová Diosmi rijurimuwan, jinaspa nimuwan: Rikunin llaqtaypa sufrisqanta,+ Egipto runakuna imaymana ruwasqankutapas.
17 Chaymi prometeykichis: Egipto runakunaq ñak’arichisqanmanta libraspan+ Canaán runakunaq, Het runakunaq, amorreo runakunaq,+ perizita runakunaq, heveo runakunaq, Jebús runakunaq+ jallp’anman apasaykichis, maypichus lechepas mielpas askha kan chayman,+ nispa.
18 ”Paykunaqa creesunkikun.+ Chay umalliqkunawan kuskan Egipto reyman rinki, jinaspa ninkichis: Hebreo runakunaq Diosnin Jehová Diosmi+ noqaykuwan rimamun. Chaymi kunan valekuykiku ch’in ladota, kinsa p’unchay puriyta Jehová Diosniykuman sacrificio jaywaq rinaykupaq,+ nispaykichis.
19 Ichaqa allintan yachani: Egipto reyqa manan rinaykichista munanqachu imaymanata ruwaspa atiyniyta rikuchinaykama.+
20 Chaymi noqaqa makiyta oqarispa imaymanakunawan Egipto runakunata castigasaq, jinan paykunaqa ripunaykichispaq kacharipusunkichis.+
21 Noqan Israel runakunata Egipto runakunawan allinpaq qhawarichisaq. Chaymi ripuspaykichisqa mana ch’usaq makintinchu ripunkichis.+
22 Sapanka warmin wasimasinmanta jinallataq wasinpi tiyaq warmimanta qolqe cosaskunata, qori cosaskunata, p’achakunatawan mañakunqa. Chaykunatan churankichis qhari wawaykichiskunaman warmi wawaykichiskunamanwan. Egipto runakunataqa lliutan ch’utinkichis”,+ nispa.
Uraypi willakuykuna
^ Egipto reykunatan “faraón” nispa niqku.
^ Qhaway “Astawan yachanapaq A4” nisqata.
^ Chaypiqa “kuraq runakunata” nillanmantaqmi.
