Exodu 6:1-30
6 Tsënam Teyta Jehoväqa Moisesta nirqan: “Kananmi rikanki Egiptuchö gobernaqta imanö castiganqäta.+ Alläpa puëdeq kanqäta rikar-ran pëqa ëwakuyänëkita dejanqa. Y podernïta rikar-ran qarquyäshunki”.+
2 Tsëpitanam Teyta Diosqa Moisesta kënö nirqan: “Noqaqa Jehovämi kä.
3 Noqa Jehovämi Abrahanta, Isaacta y Jacobta atska kuti yuripurqä, y Alläpa Puëdeq Dios kanqätam musyatsirqä,+ tsënö kaptimpis, jutï ima ninan kanqantaqa+ manam willarqätsu.+
4 Pëkunaqa Canaan kinrë markakunachömi forastërulla kayarqan,+ peru tsë markakunata entreganäpaqmi pëkunawan juk acuerduta rurarqä.
5 Egipciukuna sufritsiyaptin israelïtakuna llakikur waqayanqantam wiyarqö, y unë kastëkikunawan ruranqä acuerdutam yarpärirqö.+
6 Tsëmi israelïtakunata këta ninëkita munä: ‘Noqaqa Jehovämi kä, y noqam egipciukunapa mandädunchö sufriyanqëkipita salvayashqëki.+ Egipciukunata castigar y puëdeq kanqäta rikätsikurmi salvayashqëki.+
7 Qamkunam akranqä sirwimaqnïkuna kayanki, noqam Diosnikikuna kashaq.+ Egipciukuna sufritsiyäshunqëkipita salvaptïmi* Jehovä Diosnikikuna kanqäta rikäyanki.
8 Unë kastëkikuna Abrahanta, Isaacta y Jacobta äninqä markakunamanmi pushayashqëki, tsë markakunapa duëñunmi kayanki.+ Tsëtaqa kikï Jehovämi nikä’”.+
9 Tsënam Moisesqa Teyta Dios ninqanta israelïtakunata willarqan, y pëkunaqa egipciukuna alläpa sufritsiyaptinmi, esclävu këta mana dejayänampaq kaqta pensar Moisesta creiyarqantsu.+
10 Y Teyta Jehoväqa Moisesta kënömi nirqan:
11 “Ëwar Egiptuchö gobernaqta israelïtakuna ëwakuyänanta dejanampaq nï”.
12 Tsënam Moisesqa Teyta Jehoväta nirqan: “Israelïtakunapis manataq cäsuyämashqatsu,+ ¿tsëtsuraq Egiptuchö gobernaq cäsumanqa? Noqaqa manam shumaq parlëllatapis yachätsu”.+
13 Tsënam Teyta Jehoväqa, israelïtakunata Egiptupita jipiyänampaq Moisestawan Aaronta yapë mandarqan, y tsë mandakunqanta israelïtakunata y Egiptuchö gobernaqta willayänampaqmi nirqan.
14 Kananqa familiankunachö dirigeq israelïtakunapaq parlarishun. Israelpa mayor kaq tsurin Rubenpaqa,+ kë tsurinkunam familiankunachö dirigeq kayarqan: Hanok, Palü, Hezron y Carmï.+
15 Simeonpaqa Jemuel, Jamin, Ohad, Jakin, Zöhar y Shaul tsurinkunam familiankunachö dirigeqkuna kayarqan. Y Shaulqa cananëa warmichö yurikoq tsurinmi karqan.+
16 Levïpaqa+ Guerson, Cohat y Merarï+ tsurinkunam familiankunachö dirigeqkuna kayarqan. Levïqa cientu treinta y siëti watam kawarqan.
17 Guersonpa tsurinkunam kayarqan Libnïwan Simeï,+ y pëkunapis familiankunachö dirigeqmi kayarqan.
18 Cohatpa tsurinkunam kayarqan Amram, Izhar, Hebron y Uziel.+ Cohatqa cientu treinta y tres watam kawarqan.
19 Merarïpa tsurinkunam kayarqan Mahlïwan Musï.
Pëkunam kayarqan Levïpa kastankuna, y atska grüpu familiankunam kayarqan.+
20 Amramqa, papänimpa kastanwanmi* casakurqan, y tsë warmipa jutinqa Jokëbedmi karqan.+ Amrampawan Jokëbedpa ollqu wamrankunaqa Aaronwan Moisesmi kayarqan.+ Amramqa cientu treinta y siëti watam kawarqan.
21 Izharpa tsurinkunam kayarqan Corë,+ Nëfeg y Zicrï.
22 Uzielpa tsurinkunam kayarqan Misael, Elizafan+ y Sitrï.
23 Aaronqa, Aminadabpa warmi tsurin Elisëbawanmi casakurqan. Elisëbaqa Nahsonpa paninmi karqan.+ Aaronpawan Elisëbapa wamrankunaqa kayarqan Nadab, Abihü, Eleazar y Itamarmi.+
24 Corëpa tsurinkunam kayarqan Asir, Elcanä y Abiasaf.+ Pëkunapa familiankunatam coreïta kastakuna+ nirnin reqiyarqan.
25 Aaronpa tsurin Eleazarqa,+ Putiel jutiyoq nunapa warmi tsurinwanmi casakurqan. Eleazarpawan warmimpaqa wamrankunam karqan, y tsë wamrampa jutinqa Finehasmi+ karqan.
Pëkunam kayarqan Levïpa kastankunachö dirigeqkuna, y atska grüpu familiakunam kayarqan.+
26 Tsë kastapitam Aaronwan Moisespis kayarqan, y pëkunatam Teyta Jehoväqa mandarqan israelïtakunata atska grüpuman rakirnin Egiptupita pushayänampaq.+
27 Awmi, Moiseswan Aaronmi+ israelïtakunata pushayänampaq Egiptuchö gobernaqwan parlaq ëwayarqan.
28 Moises Egiptuchö këkaptinmi, Teyta Jehoväqa imata ruranampaq kaqta nirqan.
29 Y Teyta Jehoväqa kënömi nirqan: “Noqaqa Jehovämi kä. Llapan ninqaqta Egiptuchö gobernaqta willë”.
30 Tsënam Moisesqa Teyta Jehoväta, “shumaq parlëta mana yachëkaptïqa, ¿imanöparaq Egiptuchö gobernaqqa cäsullämanqa?”+ nirqan.
