Colosensis 1:1-29
1 Teyta Dios munaptin Cristu Jesuspa apostolnin noqa Pablupita y wawqintsik Timoteupita,+
2 Colösaschö Cristu Jesuspa confiakuypaq qateqninkunapaq y limpiu wawqikunapaq y panikunapaq:
Teytantsik Dios qamkunawan alläpa alli këkutsun y yamë kayänëkipaq yanapëkuyäshuy.
3 Qamkunapaq mañakurqa Teyta Diosta, awmi, Señornintsik Jesucristupa Teytantam imëpis agradecikuyä.
4 Tsëtaqa rurayä Cristu Jesusman markäkuyanqëkita o yärakuyanqëkita y limpiu nunakunata kuyayanqëkita wiyashqa karmi.
5 Tsëtaqa rurëkäyanki qamkunapaq ciëluchö këkaq bendicionta shuyararmi.+ Qamkunaqa rasumpa kaq noticiakunawanmi, awmi, alli noticiakunawanmi tsëpaq wiyayarqëki,
6 tsë noticiakuna qamkunaman chämuptin. Alli noticiakuna mëtsëman y llapan nunakunaman chëkanqannöllam,+ Teyta Dios rasumpa alläpa alli kanqanta wiyayanqëki y alli musyayanqëki junaqpita, qamkunachöpis mëtsëman y llapan nunakunaman chëkan.
7 Tsëkunatam qamkunaqa kuyë sirwipakoq mayïkuna, y rantinnïkunachö Cristupa confiakuypaq sirweqnin Epafraspita+ yachakuyarqëki.
8 Pëqa santu espïritu yanapayäshuptiki kuyakoq kayanqëkitapis willayämashqam.
9 Tsëmi tsëta wiyayanqä junaqpita, qamkunapaq Teyta Diosman mañakur,+ imata munanqanta alli musyayänëkipaq,+ yachëyoq kayänëkipaq y Diospa kaqkunata alli entiendiyänëkipaq+ mañakuyta dejayarqötsu,
10 tsënöpa Teyta Jehovä* alabashqa kanampaqnö portakur, imëka allikunata rurar y Diospita rasumpa kaqta mas yachakur kushitsiyänëkipaq.+
11 Tsënöllam mañakuyä, chipapäkuykaq poderninwan mëtsika poderta chaskir,+ pacienciawan y kushikur imëkata aguantayänëkipaq,
12 Teytata agradecikur këkäyanqëkiyaq. Pëmi aktsichö purikaq limpiu nunakuna chaskiyanqan herenciata chaskiyänëkipaq alistayäshurqunki.+
13 Pëmi ampipa o tsakëpa* makinchö këkanqantsikpita salvamarquntsik,+ y kuyë Tsurimpa gobiernunman pushamarquntsik,
14 përëkurmi jutsapita* libramänapaq pagakunqanrëkur, jutsantsikkunapita perdonashqa kantsik.+
15 Pëqa mana rikakoq Dios niraqmi,+ llapan kamanqampita mas punta kaq.+
16 Pëwanmi ciëluchö y patsachö llapan wakin imëkapis, awmi, rikakoq y mana rikakoq kaqkunapis+ kamashqa kashqa, gobernaqkuna, mandakoqkuna, gobiernukuna o autoridäkunapis. Llapan wakin imëkaqa pëwan+ y pëpaqmi kamashqa kashqa.
17 Manam tsëllatsu, pëqa llapan wakin imëkapita mas punta kaqmi,+ y pëwanmi llapan wakin imëkapis rurakashqa,
18 y pëmi cuerpu cuenta congregacionchö kaqkunapa dirigeqnin.*+ Pëmi llapan wakin imëkapita mas punta kaq+ y wanushqakunapita puntata kawarimoq, tsënöpa llapanchö punta kaq kanampaq.
19 Awmi, Teyta Diosmi allitanö rikarqan llapan imëkachö pë alli* kananta,+
20 y sufrimientu qeruchö* pëpa yawarninrëkur llapan imëkata,+ patsachö kaqkunata y ciëluchö kaqkunata kikinwan* amishtatsita.+
21 Rasumpa kaqchöqa, juk tiempuqa Teyta Diospita karuchömi kayarqëki y mana alli rurëkunaman yarpararmi chikeqnin kayarqëki,
22 peru kananqa wanunampaq entregakoqpa cuerpunrëkurmi kikintawan amishtatsiyäshurqunki, tsënöpa pëpa puntanchö limpiu, imachöpis mana pishipaq y imapitapis mana culpayoq kayänëkipaq.+
23 Peru tsëpaqqa, Teyta Diosman markäkuyanqëkimannö o yärakuyanqëkimannö kawar,+ cimientu jananchö patsakashqa kar+ y alli aguantarmi kayänëki,+ y manam alli noticiakuna wiyakur shuyäyanqëki bendicionpita rakikäyänëkitsu. Tsë alli noticiakunataqa entëru patsachömi willakuyashqa.+ Noqa Pablum, tsë alli noticiakunata willakunäpaq carguta chaskirqö.+
24 Kananqa qamkunarëkur sufrikanqäpita,+ y Cristupa cuerpun cuenta congregacionchö kaqkunapa bienninrëkur,+ Cristu sufrinqannö manaraq sufrinqäkunata cuerpüchö sufrikanqäpitam+ kushikü.
25 Qamkunapa biennikikunapaq Diospa palabranta imëkanöpa willakunäpaq Teyta Diospita carguta chaskinqämannömi,+ kë congregacionchö kaqkunapa sirweqnin tikrarqö.
26 Kë munduchö nunakuna y unë witsan nunakunaqa, manam tsë pakarëkaq sagrädu noticiata+ musyayarqantsu.+ Peru kananqa rikëninchö limpiu këkaq nunakunatam musyatsishqa,+
27 awmi, Teyta Diosqa allitanömi rikashqa tsë alläpa väleq pakarëkaq sagrädu noticiata,+ juk nacionchö limpiu nunakuna musyayänanta. Tsë pakarëkaq sagrädu noticiaqa qamkunawan juknölla këkaq Cristum, tsëqa pëwan juntu puëdeq këta chaskiyänëkipaq kaqtam rikätsikun.+
28 Llapan nunakunata willar y alläpa yachëwan nunakunata yachatsirmi pëpita willakuykantsik, tsënöpa Teyta Diospa rikëninchö pëpa kaqchö alli këkaq* Cristupa qateqnin kayänampaq llapan nunakunata yanapanapaq.+
29 Tsërëkurmi alli trabajar, y pëpita chaskinqä poderwan kallpachakur këkä.+
Nötakuna
^ Kënöpis niyanmi: tutapëpa.
^ Kënöpis niyanmi: pecädupita.
^ Griëgu idiömachöqa “peqan o uman” ninmi.
^ O “complëtu”.
^ Rikäri “Bibliachö palabrakunata entiendinapaq” neqta.
^ Tsënö nirqa, Teyta Diospaqmi parlëkan.
^ O “poqu”.
