Apocalipsis 16:1-21
16 Tsëpitanam templupita* qanchis angelkunata fuertipa kënö neqta wiyarqä:+ “Ëwar qanchis tazonkunachö këkaq Diospa cöleranta patsaman jicharkuyë”.+
2 Tsënam punta kaq angel ëwar tazonninchö këkaqta patsaman jicharkurqan.+ Y alläpa nanaq y mana alliyaq qerim,+ mantsëpaq chukaru animalpa marcanta katseq+ y tsë animal niraq santuta adoraq nunakunata sufritsirqan.+
3 Ishkë kaq angelnam tazonninchö këkaqta lamarman jicharkurqan.+ Y lamarmi wanushqa nunapa yawarninnö tikrarqan,+ y lamarchö llapan kaqkunam wanuyarqan o wañuyarqan.+
4 Kima kaq angelnam tazonninchö këkaqta mayukunaman* y pukyukunaman* jicharkurqan,+ y yawarmanmi tikrariyarqan.+
5 Tsënam llapan yakuta autoridäninchö katseq angel kënö ninqanta wiyarqä: “Qam kanan këkaq y kashqa+ kaq Mana Dejakoq Teyta Diosqa,+ alli kaqta ruraq karmi tsë castïgukunata apamunëkipaq juzgar decidirqunki.+
6 Limpiu nunakunapa y willakoqkunapa yawarnimpita culpayoq kayaptinmi,+ yawarta uputsirqunki.+ Pëkunaqa tsëtam mereciyan”.+
7 Y altarpita kënö neqtam wiyarqä: “Awmi, Llapanta Puëdeq+ Jehovä* Dios, qam juzgar decidinqëkiqa rasumpa kaq y alli kaqmi”.+
8 Chusku kaq angelnam tazonninchö këkaqta intiman o rupayman jicharkurqan.+ Y intiqa nunakunata ninawan rupar ushanampaqmi permitishqa karqan.
9 Y alläpa achachëmi nunakunata rupar ushakätsirqan. Tsënö kaptimpis, tsë castïgukunata autoridäninchö katseq Teyta Diospa jutinta ofendirmi parlayarqan, y manam arrepentikuyarqantsu ni punta puntaman churayarqantsu.
10 Pitsqa kaq angelnam tazonninchö këkaqta mantsëpaq chukaru animalpa gobernar täkunanman jicharkurqan. Y llapan gobernanqanmi ampirqan o tsakarqan.*+ Nunakunaqa alläpa nanatsikurmi qallunkunata kachur qallëkuyarqan,
11 y nanatsikur y qerinkunarëkurmi Teyta Diosta ofendir parlayarqan, y manam rurayanqampita arrepentikuyarqantsu.
12 Joqta kaq angelnam tazonninchö këkaqta Eufratis jatun mayuman* jicharkurqan.+ Y inti o rupay yarqamunan lädupita shamoq gobernaqkunapaq näni listu kanampaqmi+ yakun tsakirirqan.+
13 Tsënam mantsëpaq jatun culebrapa shimimpita, mantsëpaq chukaru animalpa shimimpita+ y Diospa willakoqnin tukoqpa shimimpita, rachak* niraq kima mana limpiu noticiakuna yarqamunqanta rikarqä.
14 Tsë noticiakunaqa demoniukunapitam shamun, y milagrukunatam* rurayan. Llapanta Puëdeq Teyta Dios nunakunata juzganan+ tiempuchö guërraman juntakäyänampaqmi,+ tsëkunaqa entëru patsachö gobernaqkunaman chan.+
15 “¡Wiyaramë! Suwakoqnömi shamü.+ Kushikutsun alkäbu alkäbu këkaq,+ y qalapächu mana purinampaq y nunakuna rikar mana penqapäyänampaq, röpanta vistikushqa këkaq”.+
16 Y hebreu idiömachö Armagedon* niyanqan sitiumanmi gobernaqkunata juntayarqan.+
17 Qanchis kaq angelnam tazonninchö këkaqta vientuman jicharkurqan. Tsëllanam templupita,* awmi, gobernar täkunapita fuertipa kënö ninqan wiyakarqan:+ “¡Rurashqanam këkan!”.
18 Y räyukuna tillapyanqan, parlayanqan y räyunqanmi wiyakarqan, y patsachö nunakuna kawar qallayanqampita kananyaq mana imëpis pasanqannömi alläpa fuerti terremötu karqan.+ Awmi, alläpa fuerti mantsëpaq terremötum karqan.
19 Reqishqa markam kimaman rurakärirqan,+ y juk nacion nunakunapa markankunam ushakäyarqan; y alläpa cöleranwan junta këkaq vïnu cöpampita uputsinampaqmi,+ Teyta Diosqa Alläpa Puëdeq Babiloniata yarpärirqan.+
20 Manam tsëllatsu, llapan islakunam qeshpir ëwakuyarqan, y jirkakunam illakäriyarqan.+
21 Tsënam juk talentunö* lasaq alläpa jatun runtu tamya, ciëlupita nunakuna jananman jeqamurqan.+ Pëkunata castigar apamunqan runtu tamya imëkata ushakätsiptinmi,+ nunakunaqa Teyta Diosta ofendir parlayarqan.
Nötakuna
^ Tsënö nirqa, templuchö Alläpa Sagrädu Cuartupaqmi parlëkan.
^ O “yaku pashtaqkunaman”.
^ Kënöpis niyanmi: riukunaman.
^ Kënöpis niyanmi: tutaparqan.
^ Kënöpis niyanmi: riuman.
^ Kënöpis niyanmi: lachak; säpu.
^ Griëgu idiömachöqa “señalkunatam” ninmi.
^ Griëgu idiömachö: Har Maguedṓn. Tsëqa hebreu idiömachö “Meguidö jirka” ninan palabrapitam shamun.
^ Tsënö nirqa, templuchö Alläpa Sagrädu Cuartupaqmi parlëkan.
^ Griëgu qellë talentuqa 20,4 kïlusmi lasaq. Rikäri “Masllata musyanapaq” neqchö B14 kaqta.
