Gälatas 6:1-18
6 Wawqikuna, mana cuentata qokushpa juk nuna mana alliman chëkaptinqa, qamkuna, Diospa kaqchö alli këkaqkuna,* shumaq tratar* tsë nunata corregiyë.*+ Peru cada ünu alli cuidakuyë,+ tsënöpa qamkunapis mana tentashqa kayänëkipaq.+
2 Mana allita pasayanqëkichö jukniki jukniki yanapanakur këkäyë,+ tsënömi Cristupa leyninta cumpliyanki.+
3 Mana imapis këkar, imapis kanqanta pensaq nunaqa,+ kikintam engañakuykan.
4 Peru cada nuna imakunata ruranqanta rikätsun,+ tsëqa jukkunawan mana igualatsikurmi, kikin ruranqankunapita kushikunqa.+
5 Awmi, cada nunam ruranampaq kaqtaqa ruranan, manam juktsu.*+
6 Manam tsëllatsu, Teyta Diospa palabrampita yachakuykaq nunaqa, yachatseqnintam imëka allikunata qaranan.+
7 Ama engañakuyëtsu: manam Teyta Diospitaqa pï nunapis burlakuyta puëdintsu. Awmi, pï nunapis muruykanqantam cosechanqa.+
8 Jutsa* ruraq cuerpun munanqanman yarpëkur muroqqa, jutsa ruraq cuerpun munanqanta ruranqampitam imëka mana allikunata cosechanqa; peru santu espïritu munanqanman yarpëkur muroqqa, santu espïritupitam imëyaqpis kawëta cosechanqa.+
9 Tsëqa ama dejashuntsu alli kaqta rurëta, tsë rurëta mana dejarqa,* tiempunchömi cosechashun.+
10 Tsëmi rurëta puëdinqantsikyaqqa,* llapankunapaq alli kaqta rurashun, peru masqa creikunqantsikchö wawqintsikkunapaq y panintsikkunapaq.
11 Rikäyë imanö jatusaq letrakunawan makïwan qellqamunqäta.
12 Ishpakuyänëkipa puntanchö señalakuyänëkipaq obligayäshuynikita munaqkunaqa, wakinkunapa rikëninchömi alli këta munayan. Tsëtaqa rurayan sufrimientu qeruchö* wanoq Cristupa qateqninkuna kayanqanrëkur, imëkata rurar mana sufritsiyänampaqmi.
13 Rasumpa kaqchöqa, ishpakuyänampa puntanchö señalakoqkunapis manam Ley ninqanta cumpliyantsu,+ peru qamkunapita* alabakuyänampaqmi, ishpakuyänëkipa puntanchö señalakuyänëkita munayan.
14 Peru noqaqa manam imapitapis alabakuyta munätsu, sinöqa sufrimientu qeruchö wanoq Señornintsik Jesucristullapitam,+ përëkurmi kë munduchö nunakunaqa noqapaq wanuyashqa,* y noqanam pëkunapaq wanurqö.
15 Ishpakunantsikpa puntanchö señalashqa o mana señalashqa këqa manam välintsu,+ sinöqa mushoq kamashqa këmi välinqa.+
16 Tsëta cuentaman churar shumaq portakoqkuna, awmi, Teyta Diospa Israelnin kaqkuna, yamë kayë y Teyta Dios llakipëkuyäshuy.*+
17 Jesuspa sirweqnin kanqäta rikätsikoq señalkunatam cuerpüchö apä, tsëmi kanampitaqa ama pï nunapis qallapämätsuntsu.+
18 Wawqikuna y panikuna, qamkunawan alläpa alli karnin, imanö pensayanqëkichö Señornintsik Jesucristu bendicïkuyäshuy. Tsënö kallätsun.*
Nötakuna
^ O “alli kaqman kutitsiyë”.
^ O “pëwan yachanëpaq karnin”.
^ O “imanö kayanqëkichö alli këkaqkuna”.
^ O “cargunchö këkaq cargata apanan”.
^ Kënöpis niyanmi: Pecädu.
^ O “tsë rurëchö mana pishiparqa”.
^ O “alli tiempu kanqanyaqqa”.
^ Rikäri “Bibliachö palabrakunata entiendinapaq” neqta.
^ O “cuerpuykikunata rurayanqampita”.
^ O “qeruchö wanutsiyashqa”.
^ Kënöpis niyanmi: ankupëkuyäshuy; kuyapëkuyäshuy.
^ O “Amen”.
