Bestia Ta Bai Shelu?
Loke Beibel Ta Bisa
Beibel ta bisa ku di tur kriatura riba tera, solamente un kantidat limitá di hende lo bai shelu. (Revelashon 14:1, 3) Nan ta bai shelu pa goberná komo rei i saserdote huntu ku Hesus. Mayoria di hende lo ser resusitá pa biba den paradeis riba tera.—Salmo 37:11, 29.
Beibel no ta bisa ku tin shelu pa bestia di kas òf kachó—i ku bon motibu. Bestia no por tuma e pasonan nesesario pa risibí “e yamada selestial.” (Hebreonan 3:1) E pasonan ei ta inkluí konosementu, pone fe i obedesé Dios su mandamentunan. (Mateo 19:17; Huan 3:16; 17:3) Ta hende so a ser kreá ku e speransa pa biba pa semper.—Génesis 2:16, 17; 3:22, 23.
Pa bai shelu, e kriaturanan riba tera mester ser resusitá. (1 Korintionan 15:42) Beibel ta menshoná vários relato di resurekshon. (1 Reinan 17:17-24; 2 Reinan 4:32-37; 13:20, 21; Lukas 7:11-15; 8:41, 42, 49-56; Huan 11:38-44; Echonan 9:36-42; 20:7-12) Sinembargo, tur relato tabata di hende i no di bestia.
Bestia tin alma?
Nò. Beibel ta bisa ku tantu bestia komo hende ta alma. (Numbernan 31:28) Ora Dios a krea Adam, e promé hòmber, Dios no a duna Adam un alma. Mas bien, Adam “a bira un ser bibu.” (Génesis 2:7) Alma ta konsistí di dos kos: “stòf di tera” i “rosea di bida.”
Alma por muri?
Sí, Beibel ta bisa ku alma por muri. (Levítiko 21:11; Ezekiel 18:20) Bestia i hende a bini di stòf, pues ora nan muri tur ta bolbe na stòf di tera. Ku otro palabra, nan ta stòp di eksistí. a
Bestia por peka?
Nò. Pasobra peka ta enserá kualke echo, sintimentu òf pensamentu ku ta bai kontra e normanan di Dios. Pa un kriatura por peka, e mester por tuma un desishon moral, pero bestia no tin e kapasidat ei. Bestia ta sigui nan instinto. (2 Pedro 2:12) Na final di nan bida, nan ta muri, asta si nan no a kometé piká.
Maltrato di bestia ta aseptabel?
Nò. Dios a duna hende outoridat pa goberná riba bestia, pero no e derecho pa maltratá nan. (Génesis 1:28; Salmo 8:6-8) Dios ta interesá den e bienestar di tur bestia—asta di para chikitu. (Yonas 4:11; Mateo 10:29) Dios a ordená su sirbidónan pa trata bestia bon.—Éksodo 23:12; Deuteronomio 25:4; Proverbionan 12:10.
a Pa mas informashon, wak kapítulo 6 di e buki Kiko Beibel Ta Siña Realmente?
Otro Artíkulo Interesante
PREGUNTA KU BEIBEL TA KONTESTÁ
Ken Ta Bai Shelu?
Hopi hende tin e idea robes ku tur bon hende ta bai shelu. Kiko Beibel ta siña realmente?
E TOREN DI VIGILANSIA
“Mi No Ta Sinti Mas Ku Mi Tin Ku Kambia Mundu”
Kon estudio di Beibel a yuda un aktivista sosial haña e berdadero fuente ku lo kambia mundu?
TOKANTE NOS
Pidi un Bishita
Papia tokante un tópiko di Beibel òf haña sa mas tokante Testigunan di Yehova.