For di tempu mi tabata mucha, mi tabata stima naturalesa. Komo famia, nos tabata bai pasa dia den e mondinan fasinante i na e lagonan bunita ku ta keda den bisindario di mi stat natal Jyväskylä, den kurason di Finlandia. Mi stima bestia tambe; komo mucha, tur pushi i kachó ku mi a topa mi kier a brasa! Segun ku mi tabata krese, mi a kuminsá haña asko di e manera ku hende a maltratá bestia. P’esei, despues mi a djòin un organisashon ku ta sali na defensa di derecho di bestia, kaminda mi a konosé otro hende ku tin e mesun pensamentunan ku mi.

Nos a hiba un kampaña ferviente na fabor di derecho di bestia. Nos tabata repartí informashon i organisá marcha di protesta i tambe manifestashon kontra lugánan ku a bende lana di bestia i laboratorionan ku a hasi tèst riba bestia. Asta nos a forma un organisashon nobo pa protehá bestia. Pa motibu ku nos a tuma medidanan ekstremo pa purba promové nos kousa, hopi biaha nos tabatin problema ku outoridatnan. Diferente biaha nan a yega di arestá mi i hiba mi korte.

Ademas di mi preokupashon pa bestia, e problemanan ku tin rònt mundu tabatin mi hopi molestiá. Ku tempu, mi a drenta vários organisashon, manera Amnesty International i Greenpeace. Mi a usa tur mi energia pa apoyá nan aktividatnan. Mi a hiba un lucha na fabor di hende pober, esnan ku a pasa hamber i otronan ku tabata ménos afortuná.

Pokopoko pero sigur mi a bin realisá ku mi no por kambia e mundu akí. Aunke e organisashonnan ei a logra solushoná algun problema chikitu, e problemanan grandi sí tabata bira pió so. Ta manera kos ku henter e mundu akí ta den gara di e forsanan di maldat i ku ningun hende no tin kunes ku nada. Mi tabata sinti mi gewon impotente.

E sintimentu di no por hasi nada, kombiná ku un gran desepshon, a pone mi kuminsá pensa riba Dios i riba Beibel. Un tempu mi tabata studia Beibel ku Testigunan di Yehova. Aunke e Testigunan tabata amabel i a mustra interes personal den mi, mi no tabata prepará pa kambia mi estilo di bida. E biaha aki sí tabata diferente.

Mi a kue mi Beibel i a kuminsá les’é. E tabata un berdadero konsuelo pa mi. Mi a haña hopi teksto di Beibel ku ta siña hende kon pa trata bestia na un manera drechi. Por ehèmpel, Proverbionan 12:10 ta bisa ku “un hende hustu ta kuida bida di su bestia.” Mi a siña tambe ku no ta Dios ta kousa e problemanan di mundu. Mas bien, nos problemanan a bira pió pasobra e gran mayoria no ta sigui su guia. I ora mi a siña di Yehova su amor i su pasenshi, esei a hasi un impreshon profundo riba mi.—Salmo 103:8-14.

Den e mesun tempu ei mi a haña un kupòn pa pidi e buki Kiko Beibel Ta Siña Realmente? i mi a mand’é. Poko tempu despues un pareha Testigu a bishitá mi i a ofresé mi un estudio di Beibel, lokual mi a aseptá. Tambe mi a kuminsá asistí na e reunionnan di Testigunan di Yehova na nan Salòn di Reino. Komo resultado di esei, e bèrdatnan di Beibel a kuminsá saka rais den mi kurason.

Beibel a yuda mi hasi hopi kambio den mi bida. Mi a stòp di huma i bebe di mas. Mi a traha riba mi aparensia i manera di papia, i mi a kambia mi aktitut pa ku outoridat den e mundu akí. (Romanonan 13:1) Tambe mi a bandoná mi bida inmoral, un área den kua mi tabata bastante liberal.

E kambio di mas difísil pa mi tabata pa haña e punto di bista korekto relashoná ku e organisashonnan pa derecho humano i di bestia. Esei no a bini di un dia pa otro. Na prinsipio mi tabata sinti ku si mi a hala atras, lo mi a traishoná e organisashonnan akí. Pero mi a bin komprondé ku e Reino di Dios ta e úniko speransa pa humanidat. Mi a disidí di usa tur mi energia pa apoyá e Reino ei i yuda otro hende siña di dje.—Mateo 6:33.

Komo aktivista, semper mi a konsiderá ku hende ta sea bon òf malu—i mi tabata kla pa aktua kontra esnan ku mi tabata mira komo malu. Ma Beibel a yuda mi vense e odio ei kontra mal hende. Mas bien, mi ta purba kultivá amor pa tur hende. (Mateo 5:44) Entre otro, mi ta mustra e amor akí pa medio di mi esfuersonan pa kompartí e bon notisia di e Reino di Dios. Mi ta kontentu pa mira kon e obra di bondat akí ta promové pas i felisidat, i ta duna hende berdadero speransa.

Komo ku mi a laga tur kos den man di Yehova, mi a logra di haña pas mental. Mi ta konvensí ku e, komo Kreador, lo no laga bestia i hende ser maltratá pa semper ni laga nos bunita tera kaba na nada. Al kontrario, pa medio di su Reino lo e drecha tur e daño ku hende a kousa riba e planeta akí. (Isaías 11:1-9) E echo ku no solamente mi sa e bèrdatnan akí sino tambe ku mi por yuda otronan pone fe den dje ta duna mi un goso grandi. Mi no ta sinti mas ku mi tin ku kambia mundu.