Ken Ta Bai Shelu?
E kontesta ku Beibel ta duna
Dios a skohe un kantidat limitá di kristiannan fiel ku, despues di nan morto, lo resusitá pa biba den shelu. (1 Pedro 1:3, 4) Unabes ku nan ta skohé, nan mester sigui mantené nan fe fuerte i sigui obedesé Dios pa e no deskualifiká nan di risibí nan herensia spiritual.—Efesionan 5:5; Filipensenan 3:12-14.
Kiko nan lo hasi einan?
Nan lo sirbi komo rei i saserdote huntu ku Hesus pa 1.000 aña. (Revelashon 5:9, 10; 20:6) Nan lo forma e “shelunan nobo,” òf un gobièrnu selestial, ku lo goberná riba e “tera nobo,” òf un sosiedat humano. E reinan ei den shelu lo yuda humanidat yega na perfekshon manera Dios tabata ke for di prinsipio.—Isaías 65:17; 2 Pedro 3:13.
Kuantu hende lo bai shelu?
Den Beibel nos por lesa ku ta 144.000 hende lo resusitá pa biba den shelu. (Revelashon 7:4) Den e vishon na Revelashon 14:1-3, apòstel Huan a mira “e Lamchi pará riba Seru di Sion, i huntu kuné 144.000.” Den e vishon akí, “e Lamchi” ta representá Hesus resusitá. (Huan 1:29; 1 Pedro 1:19) “Seru di Sion” ta representá e posishon elevá di Hesus i e 144.000 ku ta goberná kuné den shelu.—Salmo 2:6; Hebreonan 12:22.
“Esnan ku Dios a yama i skohe” pa goberná huntu ku Kristu den e Reino ta ser yamá tambe un “tou chikitu.” (Revelashon 17:14; Lukas 12:32) Esaki ta mustra ku nan lo ta relativamente ménos na komparashon ku e kantidat total di Hesus su karnénan.—Huan 10:16.
Ideanan robes tokante esnan ku ta bai shelu
Idea robes: Tur bon hende ta bai shelu.
Echo: Segun e promesa di Dios, mayoria di bon hende lo biba pa semper riba tera.—Salmo 37:11, 29, 34.
Hesus a bisa: “Ningun hende no a subi na shelu.” (Huan 3:13) Pues, ku e palabranan akí el a mustra ku e bon hendenan ku a muri promé kuné, manera Abraham, Moises, Yòb i David, no a bai shelu. (Echonan 2:29, 34) Na lugá di esei, nan tin e speransa pa resusitá akí riba tera.—Yòb 14:13-15.
E resurekshon pa bida den shelu ta ser yamá “e promé resurekshon.” (Revelashon 20:6) Esaki ta mustra ku lo bai tin un otro resurekshon. Esei lo ta un resurekshon riba tera.
Beibel ta siña nos ku bou di e gobernashon di e Reino di Dios “lo no tin morto mas.” (Revelashon 21:3, 4) E promesa akí mester ta apliká na tera pasobra nunka no tabatin morto den shelu.
Idea robes: Kada persona mes ta disidí si e ke haña bida den shelu òf riba tera.
Echo: Dios ta determiná kua fiel kristian lo risibí “e premio di Dios su yamada selestial,” esta, e speransa pa bida den shelu. (Filipensenan 3:14) E echo ku un persona ke bai shelu, no ke men ku Dios ta skoh’é pa bai shelu.—Mateo 20:20-23.
Idea robes: E speransa di biba pa semper riba tera ta solamente pa esnan ku no ta digno di risibí e privilegio di biba den shelu.
Echo: Dios ta yama esnan ku ta risibí bida pa semper riba tera “mi pueblo,” “mi skohínan” i “esnan ku SEÑOR a bendishoná.” (Isaías 65:21-23, Beibel Santu) Nan lo tin e oportunidat maravioso di kumpli ku e propósito original di Dios pa humanidat, esta, bida eterno den paradeis riba tera den un estado perfekto.—Génesis 1:28; Salmo 115:16; Isaías 45:18.
Idea robes: E number 144.000 ku e buki di Revelashon ta menshoná no ta literal pero simbóliko.
Echo: Aunke e buki di Revelashon sa usa numbernan simbóliko, algun di e numbernan ku e ta usa sí ta literal. Por ehèmpel, e ta menshoná “e 12 nòmbernan di e 12 apòstelnan di e Lamchi.” (Revelashon 21:14) Laga nos wak sierto evidensia ku ta mustra ku e number 144.000 ta literal.
Revelashon 7:4 ta bisa ku ‘esnan ku a risibí e seyo [es desir, aprobá pa biba den shelu] ta 144.000.’ Den e konteksto tin un di dos grupo ku na kontraste ta “un multitut grandi ku ningun hende no por a konta,” ku tambe ta risibí salbashon di Dios. (Revelashon 7:9, 10) Si e sifra 144.000 ta algu simbóliko i ta referí na un grupo ku en realidat ta indefiní, e efekto di e kontraste entre e dos gruponan ei lo bai pèrdí. a
Ademas, Beibel ta deskribí ku e 144.000 tabata “kumprá for di entre humanidat komo e promé frutanan.” (Revelashon 14:4) E ekspreshon “promé frutanan” ta referí na un grupo chikitu ku ta selektá for di un kantidat total. E ta apliká na esnan ku lo goberná den shelu ku Kristu riba un kantidat no-determiná di hende riba tera.—Revelashon 5:10.
a Profèser Robert L. Thomas a skirbi lo siguiente tokante e number 144.000 menshoná na Revelashon 7:4: “Ta un kantidat definí na kontraste ku e kantidat indefiní na 7:9. Si mir’é komo algu simbóliko, anto no por mira ningun otro sifra den e buki akí komo algu literal.”—Revelation 1-7: An Exegetical Commentary, página 474.
Otro Artíkulo Interesante
PREGUNTA KU BEIBEL TA KONTESTÁ
Kiko Ta Shelu?
Segun Beibel, e palabra akí tin tres nifikashon básiko.
SIÑANSA DI BEIBEL
Kiko e Reino di Dios Ta?
Tempu Hesus tabata riba tera, el a papia mas tantu tokante e Reino di Dios ku kualke otro kos. Pa hopi siglo su siguidónan a pidi den orashon pa e Reino ei bini.
SIÑANSA DI BEIBEL
Nos Ta Animá Bo pa Sigui un Kurso di Beibel ku Nos
Sigui un kurso di Beibel interaktivo grátis ku un maestro.