Kiko bo ta pensa di e fecha di 21 di desèmber 2012, e dia riba kalènder di e indjannan maya ku segun hopi hende lo trese kambionan mundial? Dependiendo di kiko bo tabata spera, kisas bo ta sinti bo aliviá, òf yùist desapuntá, òf kisas bo no ta preokupá bo kabes mes ku esei. Akaso esaki tabata djis un otro mal kalkulashon di fin di mundu?

Pero kiko di e “fin di mundu” profetisá den Beibel? (Mateo 24:3, E Testement Nobo di Nos Señor y Salbador Jesu-Christo) Algun hende tin miedu ku mundu lo kaba na kandela. Otronan tin masha gana di wak kiko lo sosodé ora fin di mundu yega. Di otro banda, hopi hende a kansa di tende ku fin di mundu ta serka. Pero, e reakshonnan ei ta basá riba echo, òf mas bien riba spekulashon?

Lo bo keda sorprendí ora bo haña sa kiko Beibel ta bisa realmente tokante fin di mundu. No solamente e ta duna nos bon motibu pa anhelá e fin, ma e ta mustra tambe kon frustrá hende por sinti nan ora ku e fin ta parse di tarda. Nos ta animá bo pa konsiderá algun pregunta ku hende sa hasi tokante fin di mundu i e kontesta ku Beibel ta duna.

MIRA KIKO BEIBEL TA BISA: “[Dios] a establesé tera riba su fundeshinan, pa asina esei no kita for di su lugá nunka mas.”—SALMO 104:5.

Planeta Tera lo no ser destruí, ni ku kandela ni ku nada otro. Mas bien, Beibel ta bisa ku e planeta akí ta hende su hogar eterno. Salmo 37:29 ta bisa: “E hustunan lo heredá e tera, i lo biba den dje pa semper.”—Salmo 115:16; Isaías 45:18.

Despues ku Dios a krea e tera, el a bisa ku e “tabata masha bon,” i su pensamentu no a kambia. (Génesis 1:31) Su propósito no ta pa kaba ku e tera, sino “ku esnan ku ta kaba ku e tera” i pa proteh’é di daño permanente.—Revelashon 11:18.

Pero kisas bo ta pensa, ata e teksto di 2 Pedro 3:7 ta bisa ku “e shelu i tera ku ta eksistí awor ta reservá pa kandela”? Pues, no ta Beibel mes ta mustra ku tera lo kaba na kandela? Ta bon pa tene kuenta ku tin biaha Beibel ta usa palabra manera “shelu,” “tera” i “kandela” den un sentido figurativo. Por ehèmpel, Génesis 11:1 ta bisa: “Awor henter tera tabatin e mesun idioma.” Aki e palabra “tera” ta referí na hende.

E konteksto di 2 Pedro 3:7 ta yuda nos komprondé ku tantu e shelu, tera komo kandela menshoná den e teksto akí tambe ta figurativo. Versíkulo 5 i 6 ta hasi un komparashon ku e Diluvio di e dianan di Noe. Na e okashon ei, Dios a destruí un mundu antiguo, pero e planeta mes a keda eksistí. Pues e “tera” ku e Diluvio a destruí ta representá e hendenan malbado di e tempu ei, i e “shelu” ku e Diluvio a destruí ta representá esnan ku a goberná riba e hendenan di e tempu ei. (Génesis 6:11) Ta den e mesun manera ei 2 Pedro 3:7 ta bisa ku hende malbado i nan gobernantenan korupto lo ser destruí pa semper, komo si fuera kimá ku kandela.

MIRA KIKO BEIBEL TA BISA: “Mundu ta pasa bai i tambe su deseonan, ma esun ku ta hasi e boluntat di Dios ta keda pa semper.”—1 HUAN 2:17.

E “mundu” ku ta pasa bai lo no ta planeta tera, sino hende ku no ta biba di akuerdo ku e boluntat di Dios. Meskos ku un siruhano ta saka un tumor kanseroso pa skapa bida di un pashènt, asina tambe Dios lo eliminá e malbadonan pa asina  bon hende por disfrutá realmente di bida riba tera. (Salmo 37:9) Den e sentido ei, “fin di mundu” ta algu ku nos mester anhelá.

Esei ta e sintimentu ku traduktornan di Beibel a reflehá den e manera ku nan a tradusí e ekspreshon “fin di mundu.” Nan ta papia di e ‘konklushon di un era,’ òf “fin di tempu.” (Mateo 24:3; BPK) Komo ku tantu humanidat i tera lo sobrebibí e fin, no ta rasonabel pa kere ku despues di e fin lo bini un tempu nobo, òf un era nobo? Beibel ta bisa ku sí, pasobra e ta papia di “e era ku ta bini.”—Lukas 18:30.

Hesus a bisa ku na e tempu ei “tur kos [lo] bira nobo.” Sí, Hesus lo restorá humanidat na e kondishon original ku hende lo mester tabatin, segun e propósito di Dios. (Mateo 19:28) E ora ei nos lo haña:

• Un paradeis riba tera, ku siguridat i prosperidat pa tur hende.—Isaías 35:1; Mikéas 4:4.

• Trabou ku ta duna berdadero sentido i satisfakshon. —Isaías 65:21-23.

• Kurashon di tur malesa.—Isaías 33:24.

• Vigor hubenil, pasobra hende lo bolbe bira yòn.—Yòb 33:25.

• E goso di mira e resurekshon di e mortonan.—Huan 5:28, 29.

Si nos hasi “e boluntat di Dios,” esta loke é ta pidi nos, nos no tin nodi di tin miedu di fin di mundu. Al kontrario, nos mester ta ansioso pa e bini.

MIRA KIKO BEIBEL TA BISA: “Ora boso mira e kosnan akí sosodé, boso por ta sigur ku e Reino di Dios ta serka.”—LUKAS 21:31.

Profesor Richard Kyle a skirbi den su buki The Last Days Are Here Again ku “kambionan inesperá i káos sosial ta krea un ambiente ku ta pone hende kuminsá hasi pronóstiko enkuanto fin di mundu.” Esei ta netamente e kaso ora hende no por splika e kambionan i káos ku mundu ta pasando aden.

Sinembargo, e profetanan di Beibel no a skirbi tokante e fin pa splika dikon kos malu tabata sosodé den nan tempu. Mas bien, ta Dios a inspirá nan pa skirbi di susesonan ku lo indiká ku fin di mundu ta serka. Konsiderá algun di e profesianan akí i wak pa bo mes si nan no ta kumpliendo den nos tempu.

•   Guera, hamber, temblor i epidemia di malesa mortal.—Mateo 24:7; Lukas 21:11.

• Oumento konsiderabel di krímen.—Mateo 24:12.

• Hende ku ta ruiná e tera.—Revelashon 11:18.

• Hende ku ta stima nan mes, stima plaka i plaser, pero ku no ta stima Dios.—2 Timoteo 3:2, 4.

• Desintegrashon di famia.—2 Timoteo 3:2, 3.

• Indiferensia pa ku e evidensia ku e fin ta serka.—Mateo 24:37-39.

• Predikashon rònt mundu di e bon notisia di e Reino di Dios.—Mateo 24:14.

Manera Hesus a bisa, ora nos mira “tur e kosnan akí,” nos sa ku fin di mundu ta serka. (Mateo 24:33) Testigunan di Yehova ta kere ku e evidensia ta konvinsente, i p’esei den 236 pais nan ta kompartí nan kreensianan ku otro hende.

MIRA KIKO BEIBEL TA BISA: “Ora nan ta bisa: ‘Pas i siguridat!,’ e ora ei diripiente destrukshon lo bini riba nan instantáneamente, meskos ku doló di parto di un muhé na estado; i nan lo no skapa di ningun manera.”—1 TESALONISENSENAN 5:3.

Beibel ta kompará destrukshon di mundu ku doló di parto. Esei ta un doló ku ta bini sigur i diripiente. Tambe por kompará e tempu di fin ku ora un hende muhé ta na estado. Segun ku e futuro mama ta mira kon su kurpa ta kambia, e ta realisá ku su yu ta na kaminda. Asta si e fecha ku su dòkter a kalkulá pa e yu nase a pasa, e mama ei lo no duda niun ora so ku pronto su yu lo nase. Asina tambe, kualke ekspektativa robes enkuanto e fin no ta kita nada for di e echo ku esakinan ta “e último dianan.”—2 Timoteo 3:1.

Pero kisas bo ta pensa: ‘Si e señal ku e fin ta serka ta asina bisto, dikon hopi hende no ta mir’é?’ Beibel ta mustra ku ora e fin ta serka hopi ta esnan ku lo no hasi kaso di e señal. En bes di rekonosé e kambionan drástiko ku ta tumando lugá den e último dianan, nan lo bisa den forma di chèrchi: “For di dia ku nos antepasadonan a bai sosegá, tur kos ta sigui eksaktamente manera nan tabata for di kuminsamentu di kreashon.” (2 Pedro 3:3, 4) Ku otro palabra, aunke e señal di e último  dianan ta bisto, hopi hende lo no preokupá nan kabes kuné.—Mateo 24:38, 39.

E artíkulo akí a trata djis algun di e evidensianan bíbliko pa proba ku e fin ta serka. * Bo tin gana di sa mas? Si ta asina, tuma kontakto ku Testigunan di Yehova i pidi nan un estudio di Beibel. Nan por duna bo un estudio di Beibel na bo kas, na kualke kaminda ku ta kumbiniente pa bo òf asta via telefòn. E úniko kos ku lo e kosta bo ta un poko di bo tempu, pero e benefisionan ku lo bo haña lo ta impagabel.