Kico Ta un Profecia?
E contesta cu Bijbel ta duna
Un profecia ta un mensahe cu Dios a inspira, un revelacion divino. Bijbel ta bisa cu profetanan “a papia di parti di Dios segun cu spirito santo tabata guia nan.” (2 Pedro 1:20, 21) Pues, un profeta ta un persona cu a haya e mensahe di Dios y ta pasa esaki pa otronan.—Echonan 3:18.
Con Dios tabata papia cu e profetanan?
Dios a uza diferente manera pa pasa su ideanan over na su profetanan:
Den forma skirbi. Dios a uza e metodo aki por lo menos na un ocasion, ora el a duna Moises e Dies Mandamentonan den forma skirbi.—Exodo 31:18.
Mensahe pa medio di angel. Por ehempel, Dios a uza un angel pa instrui Moises kico e mester a bisa Farao di Egipto. (Exodo 3:2-4, 10) Ora tabata importante pa uza palabra specifico, Dios tabata manda e angelnan dicta su mensahe palabra pa palabra manera el a haci ora el a bisa Moises: “Skirbi e palabranan aki, pasobra conforme e palabranan aki mi a cera un alianza cu bo y cu Israel.”—Exodo 34:27, Beibel Santu. a
Pa medio di vision. Na algun ocasion un profeta tabata haya vision ora e tabata lanta y na tino. (Isaias 1:1; Habacuk 1:1) Algun vision tabata asina real cu e profeta cu a haya esaki a participa den nan. (Lucas 9:28-36; Revelacion 1:10-17) Na otro ocasion, e profeta a haya cierto visionnan ora e tabata den un trans. (Echonan 10:10, 11; 22:17-21) Tambe Dios a uza soñonan pa transmiti su mensahe.—Daniel 7:1; Echonan 16:9, 10.
Guia mental. Pa transmiti Su mensahe Dios a guia pensamento di su profetanan. Esaki ta e nificacion di loke Bijbel ta bisa: “Henter e Scritura ta inspira di Dios.” E expresion “inspira di Dios” ta nifica literalmente “pa medio di e rosea di Dios.” (2 Timoteo 3:16) Pues, Dios a uza su spirito santo of forsa activo pa transmiti su ideanan den e mente di su sirbidornan. E mensahe tabata di Dios pero e profetanan a skirbie den nan mes palabra.—2 Samuel 23:1, 2.
Profecianan semper ta pronostica futuro?
No, no ta tur profecia di Bijbel tin e proposito di pronostica futuro. Sin embargo, mayoria mensahe ta relaciona cu futuro aunke ta indirecto. Por ehempel, e profetanan di Dios a adverti e Israelitanan di antiguedad bes tras bes tocante nan mal conducta. E advertencianan ey a laga e pueblo compronde kico tabata e bendicionnan si nan a obedece pero tambe e consecuencianan si nan no a haci caso. (Jeremias 25:4-6) E resultado lo a depende di loke e Israelitanan a scoge pa haci.—Deuteronomio 30:19, 20.
Ehempel di algun profecia di Bijbel cu no ta pronostica futuro
Na un ocasion ora e Israelitanan a pidi Dios yudansa, el a manda un profeta pa splica nan cu pasobra nan a nenga di obedece e mandamentonan di Dios, e no a yuda nan.—Huesnan 6:6-10.
Ora Hesus a papia cu un muher Samaritano, el bisa cosnan di su pasado cu e lo por a sa solamente pa medio di revelacion divino. E muher a reconoce cu Hesus tabata un profeta aunke Hesus no a pronostica nada tocante futuro.—Juan 4:17-19.
Durante Hesus su caso hudicial, su enemigonan a tapa su cara, dal e y bis’e: “Profetisa no? Bisa nos ta ken a dal bo!” Nan no tabata pidi pa Hesus pronostica e futuro pero pa e bisa pa medio di poder di Dios ken ta esun cu a dal e.—Lucas 22:63, 64.
a Aunke cu na prome instante den e ehempel aki ta parce cu Dios a papia directamente cu Moises, Bijbel ta mustra cu Dios a uza angel pa transmiti e pacto di Ley di Moises.—Echonan 7:53; Galationan 3:19.