1, 2. Con mundo a cambia despues di tempo di Noe, y con esey a afecta Abraham?

ABRAHAM a tende grito. * El a hisa cara wak e toren di su stad natal Ur. Huma tabata sali for di e toren halto ey cu tabatin forma di piramid. E sacerdotenan di e dios di luna tabata ofreciendo sacrificio atrobe. Abraham a sigui cana, sacudiendo su cabes tur disgusta. Riba caminda pa cas, el a pasa cantidad di hende riba caya y a keda pensa riba e idolatria repugnante cu tabata reina na Ur. Despues di Diluvio, adoracion di dios falso a plama rond mundo!

² Noe a muri apenas dos aña prome cu Abraham a nace. Ora Noe cu su famia a sali for di e arca despues di Diluvio, el a ofrece un sacrificio na Jehova Dios, kende na su turno a laga un regenboog sali. (Gen. 8:20; 9:12-14) E tempo ey e adoracion puro di Jehova tabata e unico adoracion cu a existi na mundo. Pero dies generacion despues, casi niun hende no tabata practica adoracion puro mas; na tur parti nan tabata adora dios pagano. Esaki tabata e caso tambe cu Tare, tata di Abraham. Kisas e tabata hasta traha imagen di dios falso.—Jos. 24:2.

3. Ki cualidad di Abraham a hacie diferente, y kico nos por siña for di esey?

³ Pero Abraham tabata diferente. Segun cu tempo a pasa, su fe den Dios a cuminsa resalta mas y mas. De echo, mas despues Dios a inspira apostel Pablo pa yama Abraham e “tata di tur ku tin fe.” (Rom. 4:11, BPK) Laga nos ban wak kico a yuda Abraham cultiva un fe fuerte asina. Nos por siña for di esey con pa fortalece nos fe.

4, 5. Ta ken kisas a siña Abraham tocante Jehova, y ki base nos tin pa pensa asina?

⁴ Con Abraham a siña conoce Jehova Dios? Wel, nos sa cu e tempo ey Jehova tabatin sirbidor fiel riba Tera. Un di nan tabata Sem. E no tabata e yiu mayo di Noe, pero toch Bijbel hopi biaha ta menciona e prome, probablemente pasobra e tabata un homber cu un fe sobresaliente. * Poco despues di Diluvio, Noe a referi na Jehova como “e Dios di Sem.” (Gen. 9:26) Sem a demostra respet pa Jehova y pa adoracion puro.

⁵ Abraham lo tabata conoce Sem? Probablemente. Purba di imagina Abraham ora e tabata mucha. Lo e mester a keda fascina ora el a haya sa cu e tabatin un antepasado di tanto edad asina! Sem tabata testigo di 400 aña di historia humano: e maldad di tempo di e gigantenan, e gran Diluvio, aumento di hende riba Tera, formacion di e prome nacionnan y trahamento di e Toren di Babel. Por cierto, Sem fielmente a keda leu di e rebelion ey di Nimrod. Pesey ora Jehova a bruha lenga di e hendenan cu tabata traha e toren, Sem cu su famia si a sigui papia e idioma original di hende, e idioma di Noe. Abraham tabata famia di Sem. Pues, Abraham siguramente a lanta cu hopi respet pa Sem. Ademas, Sem tabata na bida durante gran parti di e bida di Abraham. Pues ta posibel cu ta Sem a siña Abraham tocante Jehova.

6. (a) Con Abraham a demostra cu el a saca un bon les for di e Diluvio? (b) Con e bida di Abraham cu Sara tabata?

⁶ En todo caso, Abraham a saca un bon les for di e Diluvio y a haci esfuerso pa cana cu Dios mescos cu Noe. Pesey el a rechasa idolatria, y tur hende na Ur por a mira cu e tabata diferente. Kisas hasta su famia pega a nota esey. Pero el a haya un bon compañera pa apoy’e. El a casa cu Sara, un muher notabel no solamente pasobra e tabata hopi bunita, sino tambe pasobra e tabatin hopi fe den Jehova. * E pareha ey no tabatin yiu, pero sin duda nan tabata hopi feliz cu nan por a sirbi Jehova hunto. Ademas, nan a cria Lot, un subrino di Abraham cu tabata huerfano.

7. Con siguidor di Hesus mester imita Abraham?

 ⁷ Abraham nunca a bandona Jehova pa bay adora e diosnan falso di Ur. E y Sara tabata dispuesto pa laga e comunidad pagano ey mira cu nan tabata diferente. Pa nos por cultiva berdadero fe, nos tambe mester tin un actitud asina. Nos mester ta dispuesto pa ta diferente. Hesus a bisa cu su siguidornan lo “no ta parti di mundo” y cu pa e motibo ey mundo lo odia nan. (Lesa Juan 15:19.) Si un dia bo famia of e hendenan di bo comunidad rechasa bo pasobra bo a dicidi di sirbi Jehova, corda cu bo no ta e unico. Mas bien bo ta imitando e bon ehempel di Abraham y Sara kendenan tambe a sirbi Dios fielmente.

8, 9. (a) Ki experencia inolvidabel Abraham tabatin? (b) Ki mensahe Jehova a duna Abraham?

⁸ Un dia, Abraham tabatin un experencia inolvidabel. El a ricibi un mensahe for di Jehova Dios! Bijbel no ta bisa specificamente con el a haya e mensahe, pero si e ta bisa cu “e Dios di gloria” a aparece na e homber fiel ey. (Lesa Echonan 7:2, 3.) Kisas ta mediante un angel Abraham a haya un bista di e gloria impresionante di e Soberano di universo. Abraham lo mester a keda hopi contento di mira e contraste entre e Dios bibo y e idolonan sin bida cu e hendenan di su tempo tabata adora.

⁹ Kico tabata e mensahe cu Jehova a duna Abraham? “Sali for di bo tera, laga bo famia atras y bay na e tera cu lo mi mustra bo.” Jehova no a bis’e cua tera e mester a bay; el a djis bis’e cu lo e mustr’e e tera. Pero prome, Abraham tabatin cu bay for di su tera y su famia. Den e culturanan di Medio Oriente di antiguedad, famia tabata hopi importante. Pa nan, laga bo famia atras y bay biba na un luga leu tabata algo teribel. Tabatin hende cu a considera esey pio cu morto!

10. Dicon lo e tabata un sacrificio pa Abraham y Sara bay laga nan cas na Ur?

¹⁰ E echo cu Abraham mester a bay for di su tera lo tabata un sacrificio p’e. Tin evidencia cu Ur tabata un stad rico y cu hopi actividad. (Wak e cuadro “ E Stad Cu Abraham y Sara A Laga Atras.”) Cobamento arkeologico a revela cu den Ur di antiguedad tabatin cas hopi comodo. Algun di e casnan tabatin 12 camber of mas pa hospeda famia y cria, y tur tabata construi rond di un patio cu tabatin vloer di piedra of klinker. Servicionan manera awa di cranchi, toilet y sistema di riolering tabata comun. Corda tambe cu Abraham y Sara no tabata jong; Abraham probablemente tabata riba 70 aña y Sara, riba 60. Manera tur bon esposo, Abraham lo tabata kier pa Sara tin un bida rasonablemente comodo y pa e no  falta nada. Pues, nos por imagina cuanto nan a combersa tocante e asignacion aki y tocante tur e pregunta- y preocupacionnan cu nan lo tabatin. Abraham lo mester a keda hopi contento ora cu Sara a acepta e reto! E tambe tabata dispuesto pa bay laga tur e comodidadnan di su cas.

11, 12. (a) Cua tabata e preparacionnan cu mester a haci y e decisionnan cu mester a tuma prome cu Abraham y su famia por a sali for di Ur? (b) Con lo bo describi loke a pasa riba e dia cu nan a bay?

¹¹ Despues cu Abraham y Sara a tuma e decision, nan tabatin hopi cos di haci. Nan mester a paketa y regla basta cos. Kico nan lo a laga atras y kico nan lo a bay cu ne riba e biahe aki pa un luga desconoci? Pero, mas importante ainda, nan mester a dicidi kico pa haci cu nan hendenan y nan crianan. Por ehempel, Abraham su tata, Tare, tabata di edad avansa. Nan a dicidi di bay cu ne pa nan por a sigui cuid’e. Tare lo mester tabata di acuerdo cu e decision ey, pasobra Bijbel ta bisa cu ta e, como cabes di e famia, tabata esun cu a tuma su famia y sali bay for di Ur. Aparentemente el a bandona idolatria. Lot, subrino di Abraham, tambe lo a compaña nan riba e biahe.—Gen. 11:31.

¹² Por fin, e dia di bay a yega. Bo por mira e caravana para pafo di e murayanan di Ur? El a consisti di camel y burico carga. * Tambe tabatin tur e otro bestianan cu nan tabata bay cu ne. E famia y crianan tabata cla pa bay y yen di expectativa. Kisas tur bista tabata riba Abraham, wardando p’e duna e señal pa nan bay. Finalmente, e momento a yega, y nan a cuminsa cana, lagando Ur atras pa semper.

13. Con hopi sirbidor di Jehova awe ta demostra e mesun actitud cu Abraham y Sara?

¹³ Awe, hopi sirbidor di Jehova ta dicidi di bay biba caminda tin mester di mas hende pa predica e Reino. Otronan ta dicidi di siña un idioma nobo pa nan por expande nan sirbishi. Of nan ta purba diferente metodo di predica cu nan no ta sinti nan mucho comodo cu ne. Por lo general, un hende mester ta dispuesto di haci sacrificio ora e tuma e tipo di decisionnan ey, kisas lo e tin cu renuncia un cierto grado di comodidad. Sirbidornan di Jehova cu ta demostra e actitud ey ta merece elogio, ya cu nan ta imita Abraham cu Sara. Si nos demostra e tipo di fe ey, nos por ta sigur cu Jehova semper lo duna nos mucho mas di loke nos ta dun’e. Hamas lo e keda sin recompensa fe. (Heb. 6:10; 11:6) El a recompensa Abraham su fe?

14, 15. Con e biahe di Ur pa Haran a bay, y dicon Abraham a dicidi di keda Haran pa un tempo?

¹⁴ Gradualmente e caravana a custumbra cu e rutina di biahe. Kisas Abraham y Sara tabata cana un rato, y despues core un rato riba burico of camel. Nan lo tabata combersa cu otro meymey di zonido di e belnan cu tabata colga na garganta di nan bestianan. Pocopoco, hasta e biaheronan cu menos experencia a bira habil den arma y desarma e campamento y den yuda Tare sinta comodamente riba un camel of burico. Nan a bay den direccion noordwest, canando banda di Riu Eufrates. Dia tras dia y siman tras di siman nan a sigui biaha, y pocopoco e paisahe a sigui cambia.

¹⁵ Finalmente, despues di a biaha 960 kilometer, nan a yega Haran, un stad prospero cu tabata situa caminda rutanan comercial di Oriente y Occidente a crusa otro. E casnan di e stad ey tabatin forma di neishi di abeha, y e famia a keda eynan pa un tempo. Kisas Tare tabata mucho debil pa sigui biaha.

16, 17. (a) Cua pacto a anima Abraham pa sigui riba su biahe? (b) Con Jehova a bendiciona Abraham durante su estadia na Haran?

¹⁶ Despues di poco tempo, Tare a muri na edad di 205 aña. (Gen. 11:32) Durante e periodo dificil aki, Abraham a haya un gran  consuelo ora Jehova a bolbe tuma contacto cu ne. Jehova a ripiti e instruccionnan cu el a duna Abraham tempo cu e tabata na Ur y tambe a cont’e mas tocante loke el a primintie. Abraham lo a bira “un nacion grandi”, y pa su motibo bendicion lo a bira disponibel pa tur famia na mundo. (Lesa Genesis 12:2, 3.) E echo cu Jehova a bolbe tuma contacto cu Abraham encuanto e pacto cu el a cera cu ne lo mester a anim’e pa e sigui cu su biahe.

¹⁷ Pero e biaha aki tabatin mas cos pa paketa, pasobra Jehova a bendiciona Abraham cu hopi cos durante su estadia na Haran. Bijbel ta menciona “tur nan propiedadnan cu nan a acumula, y e hendenan cu nan a haya na Haran.” (Gen. 12:5) Pa Abraham por a bira un nacion, e tabatin mester di recurso material y sirbidor. No ta tur biaha Jehova sa haci su sirbidornan rico, pero semper e ta duna nan loke nan tin mester pa cumpli cu su boluntad. Pues, bon ekipa y anima, Abraham cu su caravana a sigui cu nan biahe pa un luga desconoci.

18. (a) Ki fecha ta sumamente importante den e historia di Dios su relacion cu su pueblo, y dicon? (b) Cua ta algun otro suceso crucial cu añanan despues a tuma luga riba e fecha ey? (Wak e cuadro “ Un Fecha Importante den Historia di Bijbel.”)

¹⁸ Na un distancia di varios dia for di Haran, bo ta haya Carkemis. Probablemente ta eynan Abraham cu su caravana a crusa Riu Eufrates, mescos cu hopi biahero tabata haci. Esaki a tuma luga na aña 1943 prome cu Cristo, aparentemente riba e di 14 dia di e luna cu despues nan a yama nisan. (Exo. 12:40-43) E tabata un momento sumamente importante den e historia di Dios su relacion cu Su pueblo, ya cu riba e dia ey Dios su pacto cu Abraham a drenta na vigor. Den direccion zuid tabata keda e tera cu Jehova a priminti di mustra Abraham.

19. Kico Jehova a menciona den su promesa na Abraham, y kisas esey a laga Abraham corda riba kico?

¹⁹ Abraham cu su caravana a pasa door di e tera bayendo den direccion zuid, y nan a para cerca di e palonan grandi di More, pega cu Sikem. Eynan Jehova a bolbe papia cu Abraham. E biaha aki, e promesa di  Dios a menciona e descendientenan (of simia) di Abraham cu un dia lo haya e tera ey. Acaso e promesa aki a laga Abraham corda riba e profecia cu Jehova a expresa den Eden, caminda el a menciona un “simia” cu un dia lo rescata humanidad? (Gen. 3:15; 12:7) Probablemente cu si. Kisas el a cuminsa compronde cu di un manera of otro lo el a hunga un papel den e gran proposito cu Jehova tabatin na mente.

20. Con Abraham a demostra aprecio pa e privilegio cu Jehova a dun’e?

²⁰ Abraham tabata hopi agradecido pa e privilegio cu Jehova a dun’e. Pesey, segun cu e tabata pasa door di e tera, el a para y traha altar pa Jehova, prome cerca di e palonan grandi di More, despues cerca di Bet-el. Sin duda el a haci esey cu hopi cautela, pasobra ainda e Cananeonan tabata biba den e tera. Tambe el a invoca e nomber di Jehova, expresando probablemente su gratitud sincero na su Dios segun cu el a medita riba e futuro di su descendientenan. Kisas el a predica tambe na su bisiñanan Cananeo. (Lesa Genesis 12:7, 8.) Claro cu mas despues Abraham su fe lo a ser poni bastante na prueba. Pesey sabiamente, e no a concentra riba e cas y comodidadnan cu el a laga atras na Ur. Mas bien, el a wak padilanti y a enfoca riba e promesa di Jehova. Hebreonan 11:10 ta bisa di Abraham: “E tabata spera e stad cu tin berdadero fundeshi, e stad di cua Dios mes ta e diseñador y constructor.”

21. Compara cu Abraham, cuanto conocemento di e Reino di Dios nos tin, y kico esey ta motiva bo pa haci?

²¹ E sirbidornan di Jehova awe sa hopi mas cu Abraham tocante e “stad” figurativo ey, esta, e Reino di Dios. Por ehempel, nos sa cu e Reino ta gobernando den cielo y cu pronto lo e trece un fin na e sistema di e mundo aki. Tambe nos sa cu Hesucristo—e Simia di Abraham, priminti for di hopi tempo pasa—awor ta Rey di e Reino ey. Esta un privilegio e lo ta di por mira Abraham ora e resucita! E tempo ey lo e compronde plenamente con Jehova su proposito a cumpli, algo cu prome e tabatin djis un idea vago di dje. Abo lo kier mira Jehova cumpli cu delaster un di su promesanan? Wel, ta importante e ora ey pa bo sigui haci loke Abraham a haci: Demostra un spirito di sacrificio propio, obediencia y gratitud profundo pa cualkier asignacion cu Jehova duna bo. Segun cu bo ta imita e fe di Abraham, e, como tata di tur hende cu tin fe, den un sentido lo bira bo tata tambe!