Salmo 36:1-12
Parad direktor. Salmo nen David a lingkor nen Jehova.
36 Diad utel na pusoy mauges, say kasalanan et mitotongtong ed sikato;Anggapoy nanenengneng ton sengegan na itakot tod Dios.+
2 Ta alablabas so pangirarayew tod sarili to,Kanian agto nanengneng tan nabusol so lingo to.+
3 Saray ibabalikas na sangi to et makapasakit tan makapalikdo;Andian na pakatalos nipaakar ed panggaway maong.
4 Sikatoy manplaplano na makapasakit anggan walad dukolan to.
Sikatoy walad dalan ya aliwan maabig;Agto ipupulisay so mauges.
5 O Jehova, say matoor a panangarom et anggad tawen,+Say katooran mo et anggad saray lurem.
6 Say inkatunong mo et singa atataragey a palandey;*+Saray panangukom mo et singa maawa-awang tan araralem a danum.+
Pansiasiansiaen mon mabilay* so too tan say ayep, O Jehova.+
7 Alay kablian na matoor a panangarom, O Dios!+
Diad silong na saray payak mo et pasasalimbengan iray anak na totoo.+
8 Oniinum tan napepenek ira ed dakdakel a bengatla* a walad abung mo,+Tan papainumen mo ra ed ilog na kamaongan mo.+
9 Walad sika so subol na bilay;+Lapud liwawam et makakanengneng kami na liwawa.+
10 Itultuloy mo komon ya ipatnag so matoor a panangarom ed saramay makapikabat ed sika,+Tan say inkatunong mo ed samay maptek-impanpuso.+
11 Agmo komon aabuloyan a gatin-gatinan ak na mapaatageyOdino pataynanen ak na mauges.
12 Saramay manggagaway mauges et atumtumba ra;Niparukol ira tan ag-ira makabangon.+
Paimanod leksab
^ Literal, “singa saray palandey na Dios.”
^ Odino “Isasalbam.”
^ Literal, “ed inkataba.”