E aTémoin ti Jéhovah, e yeke sara kue ti sara ye alingbi na afango ye so Jésus afa lani nga e yeke sara ye tongana ti so abazengele ti lo asara lani. Article so afa na nduru tënë akota ye so e mä na bê na ni.

1.   Nzapa. E yeke voro oko tâ Nzapa, so Ngangu ti lo ahon angangu kue, Lo so acréé aye kue so iri lo ayeke Jéhovah (Psaume 83:18; Apocalypse 4:11). Lo yeke Nzapa ti Abraham, ti Moïse, nga na ti Jésus.​—Exode 3:6; 32:11; Jean 20:17.

2.   Bible. Ti e, Bible ayeke tënë ti yanga ti Nzapa so lo sara ni ndali ti azo (Jean 17:17; 2 Timothée 3:16). Aye so e mä na bê na ni aluti na ndö ti abuku 66 ti Bible ni kue, so ti tene “Ancien Testament” nga na “Nouveau Testament.” Jason David BeDuhn, so ayeke mbeni kota wafango-mbeti na université afa tënë ni tongaso na yâ ti mbeni tënë so lo sû na ndö ti aTémoin ti Jéhovah. Lo tene so “aye so [aTémoin ti Jéhovah] amä na bê na ni nga na asarango ye ti ala ague oko na ye so Bible afa biani.” a

    Atâa so e yeda na atënë kue so ayeke na yâ ti Bible, e yeke pëpe afondamentaliste b. E hinga so ambeni tënë ti Bible ayeke gï atapande wala a sû ni na mbeni fason so alingbi mo comprendre ni gï tongana ti so mo diko so ape.​—Apocalypse 1:1.

3.   Jésus. E yeke mû peko ti aye so Jésus Christ afa nga e yeke mû tapande ti lo. E gonda lo ndali ti so lo yeke Sauveur ti e nga lo yeke Molenge ti Nzapa (Matthieu 20:28; Kusala 5:31). Tongaso, e yeke aChrétien (Kusala 11:26). Me, e manda na yâ ti Bible so Jésus la ayeke pëpe Nzapa so Ngangu ti lo ahon angangu kue nga so ye oko afa na yâ ti Bible ape so tënë ti Trinité ayeke tâ tënë.​—Jean 14:28.

4.   Royaume ti Nzapa. A yeke mbeni vrai gouvernement so ayeke na yayu, me a yeke pëpe na yâ ti bê ti aChrétien. Royaume ni ayeke mû ande place ti agouvernement ti dunia kue nga ayeke sara ye so bê ti Nzapa aye na sese ge (Daniel 2:44; Matthieu 6:9, 10). Royaume ni ayeke sara aye so kue na yâ ti kete ngoi, ndali ti so aprophétie ti Bible afa so e yeke na “lâ ti nda ni.”​—2 Timothée 3:1-5; Matthieu 24:3-14.

    Jésus la ayeke Gbia ti Royaume ti Nzapa so ayeke na yayu. Lo komanse ti komande lani na ngu 1914.​—Apocalypse 11:15.

5.   Salut. A zi e na gbe ti siokpari na kuâ grâce na sandaga so Jésus Christ amû tongana ye so a futa ti zi azo (Matthieu 20:28; Kusala 4:12). Ti wara ye ti nzoni na lege ti sandaga ni, a lingbi e mä na bê na Jésus me nga e changé asarango ye ti e nga e wara batême (Matthieu 28:19, 20; Jean 3:16; Kusala 3:19, 20). Asarango ye ti zo la ayeke fa wala lo yeke na mabe (Jacques 2:24, 26). Me, salut ayeke mbeni ye so e wara ni grâce na “kota nzobe ti Nzapa”.​—aGalate 2:16, 21.

6.   Yayu. Jéhovah Nzapa, Jésus Christ, nga na a-ange so ayeke be-ta-zo ayeke na yayu c (Psaume 103:19-21; Kusala 7:55). Mbeni kete wungo ti azo so ayeke 144 000 ayeke zingo ande ti duti na fini na yayu ti komande na terê ti Jésus na yâ ti Royaume ti Nzapa.​—Daniel 7:27; 2 Timothée 2:12; Apocalypse 5:9, 10; 14:1, 3.

7.   Sese. Nzapa aleke sese ti tene azo asara kodro dä teti lakue lakue (Psaume 104:5; 115:16; Zo-ti-fa-tene 1:4). Nzapa ayeke iri tufa na ndö ti azo so amä yanga ti lo na lege so lo yeke sara si ala duti na nzoni seni nga ala yeke duti na fini lakue lakue na ndö ti sese so aga paradis.​—Psaume 37:11, 34.

8.   Sioni nga na pasi. Aye ni so akomanse na ngoi so mbeni ange asara kpengba-li na Nzapa (Jean 8:44). Ange so, so a sara kpengba-li si a iri lo “Satan” nga “Zabolo,” ahanda lani kozo koli na kozo wali ti mû peko ti lo, na ye so aga na asioni ye na ndö ti ahale ti ala (Genèse 3:1-6; aRomain 5:12). Ti leke atënë so Satan abi na sese, Nzapa azia lege na sioni nga na pasi, me Lo yeke zia ande ni angbâ gï tongaso lakue lakue ape.

9.   Kuâ. Tongana zo akui, lo yeke na fni mbeni ape (Psaume 146:4; Zo-ti-fa-tene 9:5, 10). Lo yeke bâ pasi na yâ ti enfer ape.

   Nzapa ayeke zingo ande azo milliard mingi na kuâ (Kusala 24:15). Me, ti azo so ayeke zingo ande ala na kuâ si na pekoni ala ke ti sara ye so Nzapa ahunda, Nzapa ayeke futi ala biani, na lo yeke kiri ti zingo ala mbeni ape.​—Apocalypse 20:14, 15.

10.   Sewa. E yeke sara ye alingbi na ye so Nzapa azia na sese ândö na ndö ti tënë ti mariage, so ti tene mariage ayeke mbeni ye so abungbi koli oko na wali oko, nga e yeda so oko ye so apeut ti sara si koli na wali asara divorce ayeke tongana mbeni oko agi mbeni koli wala wali nde (Matthieu 19:4-9). E hinga na bê ti e kue so atënë ti ndara so ayeke na yâ ti Bible apeut ti sara si mbeni sewa aduti na ngia.​—aÉphésien 5:22–6:1.

11.   Vorongo so e yeke voro na Nzapa. E yeke voro croix wala mbeni statut ape (Deutéronome 4:15-19; 1 Jean 5:21). Bâ ambeni kota ye so e yeke sara ti voro Nzapa la:

    •   E yeke sambela Nzapa.​—aPhilippien 4:6.

    •   E yeke diko Bible nga e yeke manda ni.​—Psaume 1:1-3.

    •   E yeke gbu li na ndö ti aye so e manda na yâ ti Bible.​—Psaume 77:12.

    •   E yeke bungbi oko na amba ti e ti sambela, ti manda Bible, ti he abia, ti fa atënë ti mabe ti e na gigi, nga ti encouragé amba ti e aTémoin ti Jéhovah nga na ambeni zo nde.​—aColossien 3:16; aHébreu 10:23-25.

    •   E yeke fa “nzoni tënë ti Royaume” na azo.​—Matthieu 24:14.

    •   E yeke mû maboko na azo so ye amanke ala.​—Jacques 2:14-17.

    •   E yeke leke aDa ti Royaume nga na ambeni da so a yeke fa ye na azo na yâ ni, nga e yeke bâ si ada ni angbâ nzoni.​—Psaume 127:1.

    •   E yeke mû maboko na azo so aye ti ngangu tongana ngu so asuku si amû ndo nga yengingo ti sese asi na ndo so ala yeke dä.​—Kusala 11:27-30.

12.   Bungbi ti e. A kangbi yâ ti e par congrégation, na mbeni bungbi ti a-ancien la ayeke bâ lege ti congrégation oko oko. Me, a-ancien ni abâ terê ti ala tongana akota zo so place ti ala ayeke nde ape nga a yeke payé ala ape (Matthieu 10:8; 23:8). Na ngoi ti abungbi ti e, a yeke bi quête ape wala a yeke fono na mbeni ye ti ro nginza na tîti azo ape (2 aCorinthien 9:7). E yeke sara akua ti e kue grâce na a-offrande so azo amû na bê ti ala wani, na a yeke fa pëpe iri ti azo so amû ni.

     Bebungbi, so ayeke mbeni kete groupe ti aChrétien so agbu tënë ti Nzapa ngangu, la ayeke fa ye na aTémoin ti Jéhovah na ndö ti sese kue.​—Matthieu 24:45.

13.   Dutingo beoko ti e. Aye so e kue e mä na bê na ni ayeke oko (1 aCorinthien 1:10). E yeke sara kue ti tene tënë ti kota ndo, ti mara, ti kodro nga na tënë ti kangbi aduti na popo ti e ape (Kusala 10:34, 35; Jacques 2:4). Me so e yeke beoko, a kanga lege na zo pëpe ti soro ye so lo ye. Témoin ti Jéhovah oko oko ayeke mû adesizion alingbi na ye so conscience ti lo so Bible fa lege na ni afa na lo ti sara.​—aRomain 14:1-4; aHébreu 5:14.

14.   Sarango ye ti e. E yeke sara kue ti sara ye na ndoye na yâ ti aye kue so e yeke sara (Jean 13:34, 35). E yeke kpe ti sara aye so Nzapa aye ape, na tapande e yeke mû pëpe mênë (Kusala 15:28, 29; aGalate 5:19-21). E ye siriri nga e yeke mû mbage na yâ ti bira ape (Matthieu 5:9; Ésaïe 2:4). E yeke sara ye alingbi na andia ti kodro so e yeke dä tongana andia ni ahunda na e pëpe ti doro ti Nzapa.​—Matthieu 22:21; Kusala 5:29.

15.   Songo ti e na azo. Jésus amû commandement so lani, lo tene: “Mo ndoye mba ti mo tongana mo wani.” Lo tene nga lani na aChrétien so “ala yeke ti dunia so pëpe.” (Matthieu 22:39; Jean 17:16). E yeke sara kue ti “sara ye ti nzoni na azo kue,” me e yeke yoro yanga ti e pëpe na yâ ti poroso nga e yeke bungbi pëpe na ambeni bungbi ti nzapa nde (aGalate 6:10; 2 aCorinthien 6:14). E yeke ne desizion so azo amû na ndö ti atënë ni so.​—aRomain 14:12.

 Tongana mo yeke na ambeni hunda na ndö ti aye so aTémoin ti Jéhovah amä na bê na ni, mo peut ti gue na ndö ti site ti e ti wara gbâ ti asango, wala mo peut ti iri ndo na mbeni ndokua ti e, wala mo peut ti gue na mbeni Da ti Royaume ti e so ayeke nduru na ndo so mo yeke dä wala mo peut ti sara lisoro na mbeni Témoin ti Jéhovah so ayeke nduru na mo.