Qorontos Tokkoffaa 3:1-23
3 Kanaafuu yaa obbolootaa, ani akka nama hafuuraatti+ isinitti dubbachuu hin dandeenye; kanaa mannaa, Kiristoosii wajjin haala wal qabateen daaʼimman akka taatanitti,+ akka nama fooniittan isinitti dubbadhe.
2 Isin waan hin jabaanneef, ani aannan malee nyaata jabaa isin hin soorre. Ammas taanaan isin hin jabaanne;+
3 sababiin isaas, isin amma iyyuu nama foonii ti.+ Hinaaffaa fi lolli gidduu keessan jiraachuun isaa, nama foonii akka taatanii+ fi akka namoota addunyaatti deddeebiʼaa akka jirtan kan argisiisu mitii?
4 Inni tokko, “Ani kan Phaawulosi,” inni kan biraan immoo, “Ani kan Apholosi”+ yommuu jedhu, isin akkuma namoota kaanii taʼuu keessan mitii?
5 Egaa Apholos eenyu? Phaawulos hoo eenyu? Isaan tajaajiltoota+ hojii Gooftaan isaaniif kenne hojjetanii fi isin karaa isaanii amantoota taatani dha.
6 Ani nan dhaabe,+ Apholos bishaan obaase,+ kan guddise garuu Waaqayyo dha;
7 kanaafuu, ulfina argachuu kan qabu Waaqa isa guddisu+ malee, isa dhaabus taʼe isa bishaan obaasu miti.
8 Inni dhaabus taʼe inni bishaan obaasu tokko dha;* taʼus, namni hundi akkuma hojii isaatti badhaasa isaa ni fudhata.+
9 Nuti warra Waaqayyoo wajjin hojjennu dha. Isin maasii Waaqayyoo isa misoomaa jiru dha, gamoo Waaqayyoo tis.+
10 Ani gaarummaa Waaqayyoo isa guddaa anaaf kennameen akka nama dandeettii ijaarsaa qabuutti* buʼuura kaaʼeera;+ namni kan biraan garuu isa irratti ni ijaara. Haa taʼu malee, namni hundi akkamitti akka isa irratti ijaaru of eeggannoodhaan haa yaadu.
11 Sababiin isaas, buʼuura isa kaaʼame, jechuunis Yesuus Kiristoosiin alatti namni kam iyyuu buʼuura kan biraa kaaʼuu hin dandaʼu.+
12 Namni kam iyyuu buʼuura sana irratti warqiidhaan, meetiidhaan, dhagaa gatii guddaa qabuun, mukaan, citaadhaan yookiin hoffaadhaan yoo ijaare,
13 guyyaan qormaataa sun hojicha waan mulʼisuuf, hojiin nama hundumaa ni mulʼata; sababiin isaas, hojichi ibiddaan mulʼata;+ ibiddichi namni hundi ijaarsa akkamii akka ijaare ni mulʼisa.
14 Namni kam iyyuu ijaarsi inni buʼuura sana irratti ijaare yoo isaaf hafe badhaasa ni argata;
15 haa taʼu malee, namni kam iyyuu hojiin isaa yoo gubate kasaaraan irra gaʼa; taʼus inni ofii isaatii ni oola; garuu akka nama ibidda keessa darbee ooluu taʼa.
16 Isin mana qulqullummaa Waaqayyoo akka taatanii+ fi hafuurri Waaqayyoo akka isin keessa jiraatu+ hin beektanii?
17 Namni kam iyyuu mana qulqullummaa Waaqayyoo yoo diige, Waaqayyo isa ni diiga; sababiin isaas, manni qulqullummaa Waaqayyoo qulqulluu dha, manni qulqullummaa sunis isini.+
18 Namni kam iyyuu of hin gowwoomsin: Isin gidduudhaa namni sirna* kana keessatti ogeessa akka taʼe yaadu, ogeessa taʼuu akka dandaʼuuf gowwaa haa taʼu.
19 Sababiin isaas, “Inni warra ogeeyyii taʼan haxxummaa isaaniitiin isaan qabata”+ jedhamee waan barreeffameef, ogummaan addunyaa kanaa Waaqayyo biratti gowwummaa dha.
20 Akkasumas, “Yihowaan* yaanni namoota ogeeyyii taʼanii gatii akka hin qabne beeka.”+
21 Kanaafuu, namni kam iyyuu namootaan of hin jajin; sababiin isaas, wanti hundi kan keessani;
22 Phaawulos yookiin Apholos yookiin Keefaas*+ yookiin addunyaan yookiin jireenyi yookiin duuti yookiin wantoonni amma jiran yookiin wantoonni dhufuuf jiran, wantoonni hundi kanuma keessani;
23 isin immoo kan Kiristoosi;+ Kiristoos immoo kan Waaqayyoo ti.
Miiljaleewwan
^ Ykn., “kaayyoo tokko qabu.”
^ Ykn., “akka hojii geggeessaa ogeessa taʼeetti.”
^ Ykn., “bara.” Ibsa Jechootaa ilaali.
^ Kutaa Dabalataa A5 ilaali.
^ Pheexiros jedhamees ni waamama.
