Kɛzi ɛte nganeɛ wɔ December 21, 2012, kenle ɛhye mɔɔ menli dɔɔnwo hanle kɛ ɔbava nzenzaleɛ yeara ewiade amuala la anwo ɛ? Kɛzi ɛbule ye biala la, bie a ɛ nwo dɔle wɔ, ɛ rɛle bɔle, anzɛɛ ɛndwenle nwolɛ bieko. Asoo ɔle mekɛ bieko mɔɔ bɛhile kɛ ewiade awieleɛ ne bara mɔɔ yeamba ɔ?

Na “ewiade awieleɛ ne” mɔɔ bɛha nwolɛ edwɛkɛ wɔ Baebolo ne anu la ɛ? (Mateyu 24:3, King James Version) Bie mɔ sulo kɛ bɛbayela azɛlɛ ne. Bie mɔ noko anye die mɔɔ bazi ewiade awieleɛ ne la anwo. Menli dɔɔnwo arɛle ɛbɔ na bɛngulo kɛ bɛte kɛ awieleɛ ne ɛbikye. Asoo ɔbayɛ kɛ edwɛkɛ mɔɔ ɛnle nɔhalɛ la a ɛlɛmaa menli ade nganeɛ zɛhae a?

Bie a mɔɔ Baebolo ne ka ye wɔ ewiade awieleɛ ne anwo la bazi ɛ nwo. Baebolo ne ɛmmaa yɛnnwu deɛmɔti ɔwɔ kɛ yɛ nye da awieleɛ ne ade la ala, eza ɔmaa yɛnwu kɛ bie mɔ bahola ade nganeɛ kɛ awieleɛ ne ɛhyɛ na bɛ rɛle abɔ. Suzu kɛzi Baebolo ne bua ewiade awieleɛ ne anwo kpuyia bie mɔ mɔɔ bɛta bɛbiza la anwo.

BAEBOLO NE BUA KƐ: ‘Nyamenle a wulale azɛlɛ ye adiabo ne mɔ a, amaa bɛangola ye kpusu.’—EDWƐNDOLƐ 104:5.

Bɛnrɛva senle anzɛɛ debie gyɛne biala bɛnrɛzɛkye azɛlɛ ye. Emomu, Baebolo ne kilehile kɛ azɛlɛ ne bayɛ alesama sua nu dahuu. Edwɛndolɛ 37:29 ka kɛ, “Tenlenema bava azɛlɛ ne ayɛ bɛ ɛdeɛ, na bɛadɛnla zolɛ dahuu.”—Edwɛndolɛ 115:16; Ayezaya 45:18.

Nyamenle bɔle azɛlɛ ne wiele la, ɔhanle kɛ ɔle ‘kpalɛ’ na ɔtɛte nganeɛ ko ne ala. (Mɔlebɛbo 1:31) Kɛmɔ ɔnle ye adwenle nu kɛ ɔsɛkye ye la ati, yebɔ ɛwɔkɛ kɛ ‘ɔbazɛkye bɛdabɛ mɔɔ bɛlɛsɛkye azɛlɛ ye la’—ɛhye kile kɛ ɔbabɔ nwolɛ bane amaa bɛanzɛkye ye bɔkɔɔ.—Yekile 11:18.

Noko, bie a edwɛkɛ mɔɔ wɔ 2 Pita 3:7 la bazi ɛ nwo. Baebolo ngyehyɛnu ɛhye ka kɛ: “Bɛhua anwuma nee aze mɔɔ kɛkala wɔ ɛkɛ ne la anwo senle bɛzie ɛkɛ.” Asoo ɛhye ɛngile kɛ bɛbayela azɛlɛ ye? Nɔhalɛ nu, ɔyɛ a Baebolo ne fa edwɛkpɔkɛ “anwuma,” “azɛlɛ,” nee “senle” di gyima wɔ sɛkɛlɛneɛ adenle zo. Kɛ neazo la, mekɛ mɔɔ Mɔlebɛbo 11:1 hanle kɛ: ‘Alumua ne ɛnee azɛlɛ ne azo amra amuala ka aneɛ ko’ la, ɔvale “azɛlɛ” ne ɔgyinlanle ɛkɛ ɔmanle alesama abusua ne.

Edwɛkɛ mɔɔ wɔ 2 Pita 3:7 la kile kɛ anwuma, azɛlɛ, nee senle ne mɔɔ bɛha nwolɛ edwɛkɛ wɔ ɛkɛ la noko le sɛkɛlɛneɛ. Ngyehyɛnu 5 nee 6 ne ka kɛ bɛzɛkyele anwuma nee azɛlɛ dɛba ne wɔ Nowa Azuyilɛ mekɛ ne anu, noko yɛ azɛlɛ ye amminli. Emomu, Azuyilɛ ne zɛkyele amumuyɛma amuala, anzɛɛ “azɛlɛ” ne. Eza ɔzɛkyele “anwuma” bie—menli mɔɔ lile tumi wɔ zɔhane menli ne anwo zo la. (Mɔlebɛbo 6:11) Zɔhane ala a, 2 Pita 3:7 ka kɛzi bɛbazɛkye alesama amumuyɛma nee bɛ tumivolɛma mɔɔ ɛnli nɔhalɛ la bɔkɔɔ kɛ asɛɛ bɛva senle bɛyela bɛ la.

BAEBOLO NE BUA KƐ: “Ewiade nee nuhua atiakunluwɔzo ninyɛne ne mɔ amuala bapɛ nu aze, na sonla ne mɔɔ yɛ Nyamenle ɛhulolɛdeɛ la de aze dahuu.”—1 DWƆN 2:17.

Tɛ “ewiade” ne mɔɔ bapɛ nu aze la a le azɛlɛ ɛhye, emomu, alesama mɔɔ bɛ ɛbɛlabɔlɛ nee Nyamenle ɛhulolɛdeɛ ɛnnyia la. Kɛmɔ dɔketa ye kansa fi wuleravolɛ bie nu amaa yeadɛnla aze la, Nyamenle noko ‘baye’ amumuyɛma avi ɛkɛ amaa  tenlenema adɛnla azɛlɛ ye azo. (Edwɛndolɛ 37:9) Wɔ adenle ɛhye azo, “ewiade awieleɛ ne” le debie kpalɛ.

“Ewiade awieleɛ ne” anwo adwenle kpalɛ zɛhae maa Baebolo bie mɔ ka nwolɛ edwɛkɛ kɛ “ngyehyɛleɛ ɛhye awieleɛ,” anzɛɛ “mekɛ ne awieleɛ.” (Mateyu 24:3; New International Version) Kɛmɔ bɛnrɛzɛkye azɛlɛ ne na alesama banyia bɛ ti la ati, asoo nrɛlɛbɛ ɛnle nu kɛ mekɛ fofolɛ, ngyehyɛleɛ fofolɛ bie baragyinla ɔ gyakɛ anu ɔ? Baebolo ne bua kɛ ɔle zɔ, ɔluakɛ ɔka ‘mekɛ mɔɔ bara la’ anwo edwɛkɛ dɔɔnwo.—Luku 18:30.

Gyisɛse hanle mekɛ zɔhane mɔɔ bara kenlebie la anwo edwɛkɛ kɛ “bɛbayɛ ninyɛne kɔsɔɔti fofolɛ.” Zɔhane mekɛ ne, ɔbamaa alesama anyia tɛnlabelɛ mɔɔ ɛnee Nyamenle kulo kɛ bɛnyia la. (Mateyu 19:28, NIV) Zɔhane mekɛ ne

• Paladaese azɛlɛ mɔɔ banebɔlɛ nee anzondwolɛ wɔ ɛkɛ maa yɛ muala la bara.—Ayezaya 35:1; Maeka 4:4.

• Yɛbayɛ gyima kpalɛ mɔɔ maa ahunlundwolɛ la.—Ayezaya 65:21-23.

• Yɛbanyia ewule biala anloa ayile.—Ayezaya 33:24.

• Kpanyinliyɛlɛ bavi ɛkɛ.—Dwobu 33:25.

• Bɛbadwazo mɔwuamra.—Dwɔn 5:28, 29.

Saa yɛyɛ “Nyamenle ɛhulolɛdeɛ” mɔɔ ɔkpondɛ kɛ yɛyɛ la a, ɔnle kɛ yɛsulo ewiade awieleɛ ne. Emomu, yɛbahola yɛanlea ye ade.

BAEBOLO NE BUA KƐ: “Mekɛ mɔɔ bɛkɛnwu kɛ ninyɛne ɛhye mɔ ɛlɛsisi la, ɛnee bɛnwu ye kɛ Nyamenle Belemgbunlililɛ ne ɛbikye.”—LUKU 21:31.

Wɔ buluku ne mɔɔ se, The Last Days Are Here Again la anu, Benleravolɛ Richard Kyle hɛlɛle kɛ, “nzenzaleɛ mɔɔ ba arɛlevilɛ nu nee menli avinli basabasayɛlɛ maa menli ka kɛ ewiade ne bara awieleɛ,” titile saa ɔyɛ se kɛ bɛbade nzenzaleɛ ne nee basabasayɛlɛ ne abo a.

Noko ngapezoma mɔɔ hanle awieleɛ ne anwo edwɛkɛ wɔ Baebolo ne anu la ambɔ mɔdenle kɛ bɛfa bɛahilehile deɛmɔti ninyɛndane ɛlɛkɔ zo wɔ bɛ mekɛ zo la anu. Emomu, Nyamenle sunsum ne a manle bɛhanle ninyɛne mɔɔ bahile kɛ ewiade awieleɛ ne ɛbikye la. Suzu ngapezo ɛhye mɔ bie anwo na nea kɛ bɛlɛba nu wɔ yɛ mekɛ ye azo a.

•   Konle, ɛhɔne, azɛlɛ ɛkpusulɛ, nee ewule ngakyile mɔɔ yɛ ɛzulolɛ.—Mateyu 24:7; Luku 21:11.

• Amumuyɛ mɔɔ bahɔ ɔ nyunlu.—Mateyu 24:12.

• Azɛlɛ ne mɔɔ alesama ɛlɛsɛkye ye la.—Yekile 11:18.

• Menli mɔɔ kulo bɛ nwo, ezukoa, nee anyelielɛ noko bɛngulo Nyamenle la.—2 Temɔte 3:2, 4.

• Abusua ne mɔɔ bazɛkye.—2 Temɔte 3:2, 3.

• Menli dɔɔnwo bayɛ anyetele wɔ awieleɛ ne mɔɔ ɛlɛbikye la anwo.—Mateyu 24:37-39.

• Nyamenle Belemgbunlililɛ ne anwo edwɛkpa ne mɔɔ bɛbabɔ ye nolo wɔ ewiade amuala.—Mateyu 24:14.

Kɛmɔ Gyisɛse hanle la, saa ‘yɛnwu ninyɛne ɛhye mɔ’ kɛ bɛlɛsisi a, ɛnee ɔwɔ kɛ yɛnwu kɛ ewiade awieleɛ ne ɛbikye. (Mateyu 24:33) Gyihova Alasevolɛ die di kɛ daselɛ ne le nɔhalɛ, na bɛka bɛ diedi ne anwo edwɛkɛ bɛkile awie mɔ wɔ azɛlɛ 236 azo.

BAEBOLO NE BUA KƐ: ‘Mekɛ mɔɔ menli kɛdwenle kɛ akee Azondwolɛ nee banebɔlɛ ɛra la, mekɛ ne anu ala yɛɛ munzule ne bazi a. Biala ɛnrɛvi ɛsalɛ, ɔbayɛ arɛlevilɛ nu kɛ raalɛ mɔɔ ako ɛha ye la.’—1 TƐSALONAEKAMA 5:3.

Baebolo ne fa ewiade ɛzɛkyelɛ ne to awie mɔɔ kɛvo awolɛ zo la anwo—raalɛ ne koati nyanelilɛ ne a ɔnyɛ boɛ yɛɛ ɔba arɛlevilɛ nu. Mekɛ mɔɔ li awieleɛ ne anyunlu la noko le kɛ ɛnrenzɛlɛ la, ɔluakɛ nrenzɛvolɛ ne nwu ye awolɛ ne anwo sɛkɛlɛneɛ mɔɔ ɛlɛkɔ zo la. Ye dɔketa ne bahola ahile kenle mɔɔ ɔbawo la ɛdeɛ; noko saa ɔkyɛ bɔbɔ a, ɔze kɛ ɔnrɛhyɛ biala ɔbawo. Zɔhane ala a, awieleɛ ne anwo edwɛkɛ biala mɔɔ yeanyɛ zɔ la ɛngile kɛ yɛnle “awieleɛ mekɛ ne anu” a.—2 Temɔte 3:1.

‘Saa sɛkɛlɛneɛ mɔɔ kile kɛ awieleɛ ne ɛbikye la anu la ɛkɛ ne wienyi a,’ bie a ɛbabiza kɛ, ‘duzu ati a menli dɔɔnwo ɛnnwu ye ɛ?’ Baebolo ne kile kɛ, saa awieleɛ ne ɛlɛbikye a, menli dɔɔnwo ɛnrɛbu nwolɛ sɛkɛlɛneɛ ne bie. Kɛ anrɛɛ bɛbalie nzenzaleɛ mɔɔ ɛlɛkɔ zo wɔ awieleɛ mekɛ ne anu bado nu la, bɛbagolo nwolɛ kɛ: “Sumunli mɔmoane mɔɔ yɛ nlenya mɔ wule la, kɛ debie biala de, ɔvi aloamɔleɛ la yɛɛ ɔde a.” (2 Pita 3:3, 4) Ɔkile kɛ, bɛbanwu awieleɛ ne anwo sɛkɛlɛneɛ ne wienyi, noko menli dɔɔnwo babu bɛ nye agua zolɛ.—Mateyu 24:38, 39.

 Yɛzuzu Ngɛlɛlera ne anu sɛkɛlɛneɛ bie mɔ mɔɔ kile kɛ awieleɛ ne ɛbikye la anwo wɔ edwɛkɛ ɛhye anu. * Ɛkulo kɛ ɛnwu dɔɔnwo ɔ? Saa ɔle zɔ a, duzu ati a ɛmmaa Gyihova Alasevolɛ nee wɔ ɛnyɛ Baebolo ɛzukoalɛ mɔɔ bɛnlie nwolɛ ɛhwee la ɛ? Bɛbahola bɛ nee wɔ azukoa wɔ wɔ sua nu, ɛleka mɔɔ ɔle kpalɛ ɔmaa wɔ, anzɛɛ wɔ moba zo bɔbɔ. Mɔɔ hyia ala a le wɔ mekɛ, na zolɛ nvasoɛ ne baboa wɔ kpalɛ.