Re ka Tshepa Seo Beibele e se Bolelago
Ga re na bonnete bja gore re tla ba le ditlamorago tše dibotse ge e ba re dira diphetho go ya ka gore rena goba batho ba bangwe ba ikwa bjang. Beibele e re botša lebaka eupša ga e dire seo feela. E na le tlhahlo yeo re ka e tshepago yeo e dirago gore re thabele bophelo.
TLHAHLO YEO RE E HLOKAGO
Beibele e bontšha gore Jehofa a Modimo o be a sa bopela batho gore ba itaole eupša o be a nyaka gore ba nyake tlhahlo go yena. (Jeremia 10:23) Ke ka baka leo a re neilego melao le melao ya motheo ya boitshwaro yeo e lego ka Beibeleng. O a re rata e bile ga a nyake re dira diphetho tšeo di ka dirago gore re be le ditlamorago tše mpe. (Doiteronomio 5:29; 1 Johane 4:8) Le gona ka ge e le Mmopi wa rena yo bohlale le yoo a nago le tsebo, a ka kgona go re fa tlhahlo e botse. (Psalme 100:3; 104:24) Lega go le bjalo Modimo ga a gapeletše batho gore ba phele ka melao ya gagwe ya boitshwaro.
Jehofa o be a file batho ba pele e lego Adama le Efa dilo ka moka tšeo ba bego ba di hloka gore ba thabe. (Genesi 1:28, 29; 2:8, 15) O be a ba file le ditaelo tše bonolo tšeo a bego a nyaka gore ba di latele. Eupša o be a nyaka gore ba ikgethele ge e ba ba tla latela ditaelo tšeo goba go se bjalo. (Genesi 2:9, 16, 17) Ka maswabi Adama le Efa ba ile ba kgetha go se kwe Modimo gomme ba phela ka tsela yeo ba nyakago go phela ka yona. (Genesi 3:6) Mafelelo e bile afe? Na batho ba a thaba ge ba phela ka tsela yeo ba bonago e lokile? Ga go bjalo le gatee. Ge mengwaga e dutše e eya re bone gore go se phele ka melao ya Modimo ya boitshwaro ga go dire gore re dule re thabile le go ba le khutšo.—Mmoledi 8:9.
Beibele e re nea tlhahlo yeo e ka re thušago gore re itshware gabotse go sa šetšwe gore re goletše kae goba gore re tšwa kae. (2 Timotheo 3:16, 17; bona lepokisi leo le rego “ Puku Yeo e Ngwaletšwego Batho ka Moka.”) A re boneng gore Beibele e re thuša bjang.
Ithute ka mo go oketšegilego go bona gore ke ka baka la eng re ka re Beibele ke “lentšu la Modimo.”—1 Bathesalonika 2:13. Bogela bidio yeo e rego Mongwadi wa Beibele ke Mang? go jw.org.
BEIBELE E RE BOTŠA SEO MODIMO A NYAKAGO RE SE DIRA
Beibele e re botša gore Modimo o be a dirišana bjang le batho go tloga mathomong. Ka Beibeleng Modimo o re botša gore ke eng seo se lokilego le seo se sa lokago le gore ke eng seo se ka re holago goba sa re gobatša. (Psalme 19:7, 11) Dilo tšeo re ithutago tšona ka Beibeleng ga di šiiwe ke nako e bile di ka re thuša go dira diphetho tše dibotse tša kamoo re ka itshwarago ka gona letšatši le letšatši.
Ka mohlala nagana ka keletšo yeo e lego go Diema 13:20: “Yo a gweranago le ba bohlale o tla hlalefa, eupša yo a gweranago le ditlaela, dilo di ka se mo sepelele gabotse.” Molao wo wa motheo o sa dutše o šoma le mo mehleng ya rena go etša ge o be o šoma nakong e fetilego. Beibele e na le melao e mengwe ya motheo e bohlokwa yeo e ka re thušago.—Bona lepokisi leo le rego “ Bohlale bjo bo Lego ka Beibeleng Bjoo bo sa Šiiwego ke Nako.”
Eupša o ka ipotšiša gore, ‘Nka kgodišega bjang gore keletšo ya Beibele e ka nthuša gona bjale?’ Sehlogong se se latelago re tlo bona gore Beibele e ile ya thuša bjang batho ba bangwe.
a Jehofa ke leina la Modimo.—Psalme 83:18.
