Mmoledi 8:1-17
8 Ke mang yo a swanago le motho yo bohlale? Ke mang yo a kgonago go rarolla bothata? Bohlale bja motho bo phadimiša sefahlego sa gagwe gomme bja dira gore sefahlego sa gagwe seo se šošobanego se boele sekeng.
2 Ke re: “Theetša ditaelo tša kgoši, ka gobane o dirile keno pele ga Modimo.
3 O se ke wa phakišetša go tloga pele ga kgoši. O se ke wa dulela go dira dilo tše mpe ka gobane kgoši e tla dira selo se sengwe le se sengwe seo e se nyakago,
4 ka ge seo kgoši e se boletšego se swanetše go phethagala. Ke mang yo a ka rego go yona: ‘O dira’ng?’”
5 Yo a theetšago molao a ka se diragalelwe ke selo se sebe, gomme pelo ya motho yo bohlale e tla tseba nako ya maleba le kamoo e ka ahlolago molato o mongwe le o mongwe.
6 Taba e nngwe le e nngwe e na le nako ya yona le mokgwa wa go e ahlola, ka gobane batho ba na le mathata a mantšhi.
7 Ka ge go se na motho yo a tsebago seo se tlago go direga, ke ka baka leo go se nago yoo a ka bolelago kamoo se tlago go direga ka gona.
8 Go no swana le ge go se na motho yo a nago le matla a go laola moya* goba go o thibela mo o yago gona, ga go na motho yo a nago le matla a go thibela letšatši la go hwa. Le gona, go no swana le ge letšatšing la ntwa go se na motho yo a lokollwago, dilo tše mpe le tšona di ka se dumelele bao ba di dirago gore ba phonyokge.*
9 Tše ka moka ke di bone gomme ka naganišiša ka mediro ka moka yeo e dirwago mo lefaseng,* nakong ya ge batho ba buša ba bangwe gore ba ba kweše bohloko.
10 Ke moka ka bona batho ba babe ba bolokwa, e lego bao ba bego ba tlwaetše go tsena le go tšwa lefelong le lekgethwa, gomme e se kgale ke ge ba lebetšwe motseng woo ba ilego ba dira dilo tše mpe go ona. Se le sona ke lefeela.
11 Ka ge batho bao ba tlwaetšego go dira dilo tše mpe ba sa ahlolwe ka pela, batho ba ikemišeditše go dira dilo tše mpe.
12 Le ge modiradibe a ka dira dilo tše mpe ga lekgolo, gomme a phela nako e telele, seo ke se tsebago ke gore bao ba boifago Modimo wa nnete, dilo di tla ba sepelela gabotse ka gobane ba mmoifa.
13 Eupša motho yo mobe dilo di ka se mo sepelele gabotse, e bile a ka se oketše matšatši a bophelo bja gagwe bjoo bo fetago go swana le moriti, ka gobane ga a boife Modimo.
14 Selo se sengwe seo e lego lefeela mo lefaseng ke se: Go na le batho ba go loka bao ba swarwago tše e kego ba dirile dilo tše mpe, e bile go na le batho ba babe bao ba swarwago tše e kego ba dirile dilo tša go loka. Ke re se le sona ke lefeela.
15 Nna ka kgothaletša batho gore ba thabe, ka gobane mo lefaseng ga go na seo se phalago gore batho ba je, ba nwe le go thaba. Ba swanetše go dira dilo tše ge ba dutše ba šoma ka thata matšatšing a bona a bophelo ao Modimo wa nnete a ba filego ona mo lefaseng.
16 Ke be ke ikemišeditše go hwetša bohlale le go bona dilo ka moka tšeo di diregago mo lefaseng, le ge ke be ke sa robale bošego le mosegare.*
17 Ke moka ka bona mediro ka moka ya Modimo wa nnete, gomme ka lemoga gore batho ba ka se kwešiše seo se diregago mo lefaseng. Le ge ba ka leka ka thata ba ka se se kwešiše. Le ge ba ka ipotša gore ba hlalefile kudu gore ba ka se tseba, ba ka se se kwešiše.
Mengwalo ya tlase
^ Goba, “mohemo, phefo.”
^ Goba mohlomongwe, “dilo tše mpe tšeo batho ba babe ba di dirago di ka se ba phološe.”
^ Phetolelo ya lentšu ka lentšu e re, “ka tlase ga letšatši.”
^ Goba mohlomongwe, “batho ba be ba sa robale bošego goba mosegare.”
