1. Lenyalo

Batho ba na le dikgopolo tša go fapafapana ge go tliwa tabeng ya lenyalo le gore ke eng seo se ka dirago gore le thabiše.

LENGWALO LE LE RA GORE: Modimo ke yena a thomilego lenyalo ka gona o a tseba gore ke eng seo se ka dirago gore banyalani ba thabe. (Mareka 10:​6-9) Ge monna goba mosadi a sa inaganele a nnoši e bile a bontšha gore o na le taba le molekane wa gagwe seo se tlo dira gore ba thabele lenyalo la bona. Monna yo a ratago mosadi wa gagwe o tlo mo swara gabotse le go mo hlokomela. Le gona mosadi yo a hlomphago monna wa gagwe o tlo mo thekga le go boledišana le yena gabotse.

KELETŠO YA BEIBELE E A ŠOMA: Quang le Thi bao ba tšwago Vietnam, ba be ba nagana gore ba ka se tsoge ba thabile lenyalong la bona. Quang o be a sa sware mosadi wa gagwe gabotse. O re: “Ke be ke se na taba le gore mosadi wa ka o ikwa bjang e bile gantšhi ke be ke dira dilo tšeo di mo kwešago bohloko kudu.” Thi o be a nyaka go hlala monna wa gagwe. O re: “Ke be ke nagana gore nka se sa kgona go hlompha monna wa ka goba go mo tshepa.”

Ge nako e dutše e eya Quang le Thi ba ile ba ithuta Beibele le go thoma go diriša lengwalo la Baefeso 5:33 lenyalong la bona. Quang o re “Temana ye e nthušitše gore ke kgone go bona bohlokwa bja go swara mosadi wa ka gabotse le go dira gore a ikwe a ratwa le go hlokomelwa mmeleng, maikwelong goba ka dinyakwa tša gagwe. Go dira dilo tše go dira gore mosadi wa ka a nthate le go ntlhompha kudu.” Thi o re, “Ge ke dutše ke diriša lengwalo la Baefeso 5:33 le go hlompha monna wa ka, seo se dira gore a nthate kudu le go dira gore ke ikwe ke šireletšegile le go ba le khutšo.”

 2. Kamoo o Swanetšego go Swara ba Bangwe ka Gona

Gantšhi batho ba swara gampe batho bao ba bogegago ka tsela e itšego, ba merafo e mengwe, bao ba tšwago dinageng tše dingwe, bao ba lego madumeding a mangwe goba di-gay le di-lesbian.

LENGWALO LE LE RA GORE: Beibele ga e re re hloye batho ba merafo e mengwe, ba go tšwa dinageng tše dingwe goba di-gay le di-lesbian. Go e na le moo e re kgothaletša gore re hlomphe batho ka moka go sa šetšwe gore ba tšwa morafong ofe, setšhabeng sefe goba ke bahumi goba badiidi. (Ditiro 10:34) Le ge re sa dumelelane le seo batho ba bangwe ba se dumelago goba go se dira, re swanetše go ba hlompha le go ba swara gabotse.—Mateo 7:12.

KELETŠO YA BEIBELE E A ŠOMA: Daniel o be a rutilwe go lebelela batho bao ba tšwago Asia bjalo ka batho bao ba sa nyakegego nageng ya gabo. O ile a thoma go hloya batho ka moka bao ba tšwago Asia le go ba roga ge a hlakana le bona. O re; “Ke be ke re seo ke se dirago ke go lwela naga ya gešo e bile ke be ke sa bone dilo tšeo ke bego ke di dira le go di nagana e le phošo.”

Ge nako e dutše e eya Daniel o ile a thoma go ithuta Beibele, o re o ile a swanelwa ke go fetoša tsela yeo a bego a nagana ka yona. O re, “Go Modimo batho ka moka ba a swana go sa šetšwe gore ba tšwa kae. Le nna ke be ke swanetše go lebelela batho ka moka ka tsela yeo.” Daniel ge a hlalosa kamoo a ikwago ka gona ge a hlakana le batho o re, “Ga ke sa nagana ka gore ba tšwa kae, ke rata batho ba mehuta ka moka e bile ke na le bagwera ba go tšwa dinageng tše dingwe.”

 3. Tšhelete

Batho ba bantšhi ba nyaka go huma gore ba kgone go thaba le go ba le bokamoso bjo bo kaone.

LENGWALO LE LE RA GORE: Re hloka tšhelete eupša re ka se kgodišege gore e tla dira gore re thabe goba go ba le bokamoso bjo bo kaone. (Diema 18:11; 23:​4, 5) Go e na le moo, gore re hwetše lethabo le bokamoso bjo bobotse re swanetše go diriša seo re ithutago sona ka lentšung la Modimo e lego Beibele.—1 Timotheo 6:​17-19.

KELETŠO YA BEIBELE E A ŠOMA: Monna yo a bitšwago Cardo yo a tšwago Indonesia, o ile a fetša nako ya gagwe e ntšhi a leka go huma. O re; “Ke be ke na le dilo tšeo batho ba bantšhi ba bego ba duma go ba le tšona. Ke be ke kgona go ya mo ke nyakago go ya gona le go reka dilo tša go tura, dikoloi le dintlo. Eupša dilo tšeo ka moka e be e le go no kitimiša phefo, ka ponyo ya leihlo ke e ile ka loba tšhelete yeo ke ilego ka fetša mengwaga e mentšhi ke e šomela. Ke ile ka fetša bophelo bja ka ka moka ke kitimišana le mahumo eupša mafelelong ke ile ka šala ke se na selo ke ikwa ke se na mohola e bile ke nyamile.”

Cardo o ile a thoma go diriša keletšo ya Beibele ge go tliwa tabeng ya tšhelete. Ga a sa senya nako ya gagwe ka go kitimiša mahumo eupša o kgethile go phela bophelo bjo bonolo. O re; “Ga bjale ke a bona gore ga go na mahumo ao a phalago go ba le segwera sa kgauswi le Modimo. Matšatši a, ke robala boroko e bile ke na le lethabo la kgonthe.”

 4. Thobalano

Batho ba na le dikgopolo tša go se swane ge go tliwa ditabeng tša thobalano.

LENGWALO LE LE RA GORE: Beibele e na le melao ge go tliwa ditabeng tša thobalano. Lentšu “bootswa” le akaretša bohlotlolo, go gweba ka mmele, thobalano magareng ga batho bao ba sa nyalanago, bo-gay le bo-lesbian le go ba le thobalano ka tsela yeo e gobogilego goba yeo e feteletšego. (1 Bakorinthe 6:​9, 10) Thobalano ke mpho yeo e tšwago go Modimo yeo a bego a nyaka gore e thabelwe ke monna le mosadi bao ba nyalanego feela.—Diema 5:​18, 19.

KELETŠO YA BEIBELE E A ŠOMA: Mosadi yo a bitšwago Kylie wa go tšwa Australia o re: “Pele ke nyalwa ke be ke nagana gore ge nka ba le thobalano le motho yo mongwe ke tlo ikwa ke ratwa e bile ke šireletšegile. Eupša go e na le gore ke ikwe ka tsela yeo, ke ile ka ikwa ke se ka šireletšega e bile ke kwele bohloko.”

Ge nako e dutše e eya Kylie o ile a ithuta le go diriša seo Beibele e se rutago ka thobalano. O ile a re; “ Bjale gona ke a bona gore Modimo o re file melao yeo e tlago go re šireletša le go dira gore re se ke ra kwa bohloko. Go dira dilo ka tsela yeo Jehofa a e nyakago, go dirile gore ke hwetše monna yo a nthatago le yo a dirago gore ke ikwe ke šireletšegile. Go diriša keletšo ya Beibele go nthušitše gore ke se sa hlwa ke dira dilo tšeo di feleletšago di nkweša bohloko!”