O Swanetše go Itirela Phetho

BAPALA

Tsela yeo o kgethago go itshwara ka yona gona bjale, e tlo kgoma bophelo bja gago ka moka. Jehofa Modimo o tseba seo, ke ka baka leo a nyakago gore o phele ka melao le melao ya motheo ya gagwe.

Jehofa o nyaka gore re phele bophelo bjo bo thabišago le go ba le khutšo.

“Nna, Jehofa, ke Modimo wa lena, Yo a le rutago gore le holege, Yo a le sepedišago tseleng yeo le swanetšego go sepela ka yona. Ge feela le be le ka ela hloko ditaelo tša ka, gona khutšo ya lena e be e tla etša noka gomme go loka ga lena gwa etša maphoto a lewatle.”—Jesaya 48:17, 18.

Bjalo ka ge Jehofa a re bopile, o tseba tsela e kaone yeo re swanetšego go phela ka yona. O nyaka gore re latele tlhahlo ya gagwe ka ge a tseba gore e tlo re hola. Ge e ba re phela ka melao ya Modimo, re ka se tshwenyege ka ditlamorago tša diphetho tša rena. E bile re tlo dula re dira diphetho tše dibotse tšeo di tlo dirago gore re dule re na le khutšo le go thaba.

Jehofa ga a re kgopele gore re dire dilo tšeo re ka se kgonego go di dira.

“Ditaelo tšeo ke le botšago tšona lehono ga di thata e bile le ka kgona go di latela.”—Doiteronomio 30:11.

E le gore re phele ka melao ya Modimo ya boitshwaro, re ka swanelwa ke go fetola tsela yeo re naganago le go dira dilo ka yona. Lega go le bjalo, Jehofa a ka se re kgopele gore re dire dilo tšeo a tsebago gore re ka se kgone go di dira. Ka ge e le Mmopi wa rena, o a tseba gore ke eng seo re ka kgonago go se dira. Le gona ge re dutše re ithuta ka Jehofa, re tlo bona gore “melao ya gagwe ga e thata.”—1 Johane 5:3.

Jehofa o tshepiša gore o tlo thuša bao ba kgethago go phela ka melao ya gagwe.

“Nna Jehofa Modimo wa gago ke go swere ka seatla sa ka sa le letona, yena yo a rego go wena, ‘O se ke wa boifa. Ke tla go thuša.’”—Jesaya 41:13.

Re ka kgona go phela ka tsela yeo Modimo a rego re phele ka yona ka gore re a tseba gore o tla re thuša. A ka re thuša a diriša Lentšu la gagwe e lego Beibele, yeo e re kgothatšago le go dira gore re be le kholofelo.

Batho ba bantšhi ba bone gore go phela ka melao le melao ya motheo ya Modimo go dirile gore ba thabele bophelo. Leka go ithuta ka keletšo e botse yeo e lego ka Beibeleng. O ka thoma go ithuta Beibele o diriša poroutšha ya O ka Thabela Bophelo go ya go Ile! yeo o ka e hwetšago mahala go jw.org. E na le dithuto tšeo di latelago:

Beibele e ka go Thuša Bjang?
Beibele e re Tshepiša Gore Nakong e Tlago re tlo Ipshina ka Bophelo
Na o ka Tshepa Beibele?

Ge o dutše o ithuta lentšu la Modimo e lego Beibele o tlo bona gore dithuto tša yona ga di šiiwe ke nako le gore “di dula di tshepega gona bjale le go ya go ile.” (Psalme 111:8) Ga go na bophelo bjo bo kaone go phala go phela ka melao ya boitshwaro yeo e lego ka Beibeleng. Lega go le bjalo, Modimo ga a re gapeletše go phela ka melao ya gagwe. (Doiteronomio 30:19, 20; Joshua 24:15) Rena re swanetše go ikgethela ge e ba re tla phela ka yona.

MOROKAMI