O ka dira’ng ge e ba o nyaka go ya lefelong leo o sa kago wa ya go lona?

1. 1. Na o tlo sepela ka tsela yeo o naganago gore o swanetše go sepela ka yona?

2. 2. Na o tlo šala ba bangwe morago o holofela gore ba tseba tsela?

3. 3. Goba na o tlo diriša dilo tša go swana le GPS, mmapa goba wa kgopela mogwera yo o mo tshepago gore a go thuše?

Ge e ba re ka kgetha ntlha ya mathomo goba ya bobedi re ka fihla go gongwe eupša re ka no se fihle mo re nyakago go fihla gona. Eupša ge re ka kgetha ntlha ya boraro re a tseba gore re tlo fihla mo re yago.

Bophelo bja rena bo swana le leeto, re nyaka go phela ka tsela yeo e tlago go dira gore re thabe mafelelong. Gore re tle re thabe mafelelong go ithekgile ka gore re nyaka keletšo kae ge re dira diphetho.

Le ge diphetho tše dintšhi tšeo o di dirago di sa kgome bophelo bja gago ka moka, tše dingwe tša tšona di bohlokwa kudu. Diphetho tšeo tše bohlokwa di bontšha gore ke eng seo o naganago gore se nepagetše goba se fošagetše. Diphetho tšeo di tlo kgoma bophelo bja gago le bja batho bao o ba ratago ka tsela e mpe goba e botse. Diphetho tšeo di akaretša dilo tša go swana le:

• Thobalano le lenyalo

• Go botega, mošomo le tšhelete

• Kamoo o ka godišago bana ka gona

• Kamoo re swanetšego go phedišana le ba bangwe ka gona

O ka tseba bjang gore diphetho tšeo o di dirago ge go tliwa dilong tšeo di lego ka mo godimo di tlo dira gore wena le lapa la gago le thabe nakong e tlago?

Potšišo yeo yo mongwe le yo mongwe a ka ipotšišago yona ke gore: Ke eng seo se ka nthušago go dira diphetho tše dibotse?

Makasine wo o tlo re thuša go bona gore ke ka baka la eng re swanetše go tshepa seo Beibele e rego se nepagetše goba se fošagetše.