MWAHA 03
Apwanne Munanwerya Ororomela Yeeyo Piipiliya Onaloceiye?
Piipiliya ookhalano soororomeliha sincipale nave onnavaha miruku sawaaca. Akhweya munnachuna osuwela yeeyo Piipiliya onahusiheiye, nyenya tho muri oopisa murima. Apwanne munnaphwanela ororomela soororomeliha ni miruku soorweela mu liivuru yoola akhalai? Apwanne munanwerya weemererya chiryene yeeyo Piipiliya onaloceiye vooloca sa opuha okumi hiihaano ni omwaahiyu? Amilyawu aachu anneerano. Ninnooceenyeryaani wi mwaalikhele eyo mukhatiinyu.
1. Apwanne miyaha sinaphwanyeya Mpiipiliyani ti seeparipari?
Piipiliya onnooniherya okhala “masu . . . awookololowa ni eeparipari.” (Eklesiyaste 12:10) Owo onnaloca saweereya seeparipari ni achu eeparipari. (Mwaalakhanye Luka 1:3; 3:1, 2.) Alipa a miyaha ni alipa ootholathola ancipale anneemererya waakhwanela wa mahiku, achu, mapuro ni saweereya inalociwa Mpiipiliyani.
2. Ntakhara heeni nnalocaahu wi Piipiliya tamphurelo naamwi ari akhalai?
Wiiliwiili Piipiliya onnaloca ichu seiyo achu yahaasuwenlaaya mu elukuluku aarempweiye. Ntoko yootakiherya, owo onnaloca miyaha sa siyensiya. Ichu sincipale owo onaloceiye hiseemereryiwa wi saari seeparipari wa achu ancipale vaavaa owo aarempweiye. Nyenya mmahiku ahu, siyensiya onneemererya wi yeeyo Piipiliya onaloceiye ti yeeparipari. Owo ‘onniithipela okhala wookhala.’—Salumu 111:8.
3. Ntakhara heeni ninnaphwanela ororomela yeeyo Piipiliya onaloceiye sa omwaahiyu?
Piipiliya ookhalano sooloherya * seiho inaloca sa “ichu seiho sihaakumve weereya.” (Isaiya 46:10) Piipiliya aaloherya mwawaakhwanela ichu sincipale sihaakumve weereya. Owo tho onnathariha mikhalelo sa elapo mmahiku ahu ni sooleeliherya sincipale. Mu mwaha yoola, nnahaala othokororya sooloherya ikina sa Mpiipiliyani. Okhwaanela waya ti wootikhiniha!
OHUSERYA MWAWIISEELA
Muthokororye mukhalelo siyensiya mmahiku ahu oniiwananeiye ni Piipiliya, nave mutholathole sooloherya savakhaani sa Mpiipiliyani.
4. Siyensiya onniiwanana ni Piipiliya
Mmahiku akhalai, achu yeemererya wi elapo yaari vasulu va echu. Moone EXILEMA.
Moone yeeyo erempwe mu liivuru a Yobi mu iyaakha 3.500 ivirale. Mwaalakhanye Yobi 26:7, nave voocharela muthokororye nikoho nla:
-
Ntakhara heeni ennanitikhiniha osuwela wi elapo yeemesiwe “vasiyoni vene”?
Ophiyerya iyaakha masana meeli ivirale ti yiiwexexiwaaya isiikulu ya maahi. Nave, moone yeeyo Piipiliya aalonceiye mu iyaakha 3.500 ivirale. Mwaalakhanye Yobi 36:27, 28, nave voocharela muthokororye makoho ala:
-
Ntakhara heeni otharihiwa wa esiikulu ya maahi ennootikhinihaani?
-
Apwanne soorepa seiha mwaalakhannyaanyu soolipiha omuroromela wanyu Piipiliya?
5. Piipiliya aaloherya saweereya soochuneya
Mwaalakhanye Isaiya 44:27–45:2, nave voocharela muthokororye nikoho nla:
-
Ichu taani Piipiliya aalohenryeiye mu iyaakha masana meeli ahaakumve otoloxiwa Papulu?
Yaweereya ennooniherya wi Siru, Mwene o Persiya, ni anakhoco awe yaavootha epooma yo Papulu mu eyaakha 539 E.E.K. * Awo yaahiperuxa muhice yoowo waakhapelela epooma. Emanle ovolowa mu epooma orweela wa mikhora seiyo sahaawaliwe, awo yaahiphela epooma ehiwaninhe ekhoco. Olelo, sooviravo iyaakha opwaha 2.500, Papulu ari milepe. Vano, muthokororye yeeyo Piipiliya aalohenryeiye.
Mwaalakhanye Isaiya 13:19, 20, nave voocharela muthokororye nikoho nla:
-
Ti mwawiihai yeeyo yeeren’ye ni Papulu ennooniherya waakhwanela wa yooloherya yeela?
Milepe sa Papulu mmahiku ahu o Iraki
6. Piipiliya aaloherya ichu seiho ineereya olelo
Piipiliya onnanleela wi nnakhala “mmahiku ookuchula.” (2 Timóteo 3:1) Moone yeeyo Piipiliya aalohenryeiye vooloca sa mmahiku ookuchula.
Mwaalakhanye Mateu 24:6, 7, nave voocharela muthokororye nikoho nla:
-
Ti mwawiihai Piipiliya onathariheiye mahiku ookuchula?
Mwaalakhanye 2 Timóteo 3:1-5, nave voocharela muthokororye makoho ala:
-
Mikhalelo taani sa achu siri sawunlaana variyari va mahiku ookuchula seiho Piipiliya aalonceiye?
-
Mikhalelo taani wa seiha ilociwe munoonaanyu?
ACHU AKINA ANI: “Piipiliya liivuru a ithale ni miyaha sakhalai.”
-
Mmoonelo anyu, teevi eri yawooniherya yakuru yawi Piipiliya toororomeleya?
MUKWASU
Miyaha, siyensiya, ni soolaiherya soothene seiha sinnooniherya wi nnanwerya omuroromela Piipiliya.
Makoho awuuluulela
-
Apwanne Piipiliya liivuru a saweereya seeparipari naari sawootha?
-
Makupa taani makina siyensiya oniiwananeiye ni Piipiliya?
-
Mano, munuupuwela wi Piipiliya onnaloca sa omwaahiyu? Ntakhara heeni, waakhanle wi hooye ntakhara heeni?
OTHOLATHOLA
Apwanne wookhalavo ohiiwanana siyensiya ni Piipiliya?
“Apwanne Piipiliya Onniiwanana ni Siyensiya?” (Mwaha wa mu interneti)
Ichu taani iri seeparipari vooloca sa “mmahiku ookuchula”?
“6 Profecias Bíblicas Que Estão se Cumprindo Hoje” (Mulipeleli 1 a Maiyu a 2011, a Ekunya)
Muhuserye mukhalelo soolaiherya sa Piipiliya vooloca sa olamulelo wa o Kresiya saakhwanenlaaya.
Moone mukhalelo sooloherya sa Mpiipiliyani saatoronkaaya moonelo wa mulopwana mmoha vooloca sa Piipiliya.
“Nkeemererya wi Muluku Ookhala” (Mulipeleli N.º 5 a 2017, a Ekunya)
