Ngasia la mɔ lengbi ti gbengɔ bɛ mɔ se du ya sãte tɛ mɔ gbɛ̃ na mbala kaka nɛ?

Mɔ ka gãndó ngã kɔi ti kpengbani na mbala kaka wɛ? Nga ma se mɛ mɔ hĩnga na ni se sãte tɛ zo gbɛ̃ ko, ni lengbi ti hɛ̃ngɔ lo pɛnɔ kaya bingangɔ li tɛ lo, sɔngɔ bɛ wa ni lengbi nga ti onzingɔ falanga ti lo. Ye mɛ lengbi ti zangɔ mɔ ya mɔ gbe bɛ mɔ nɛ? Ngasia la mɔ lengbi ti zangɔ zo kɔi ti ndasewa tɛ mɔ bere kwa mɔ kɔi mɛ tɛngbi na lo mɛ ba sãte tɛ lo nɛ? Abɛse du ya ta Ngbangɔ du buku tɛ amɔnganga ma ko, ni na awangɔ ti nzɔ̃ni mɛ alengbi ti zangɔ mɔ ti nɛngɔ ya mɔ gbe bɛ mɔ na ngoi mɛ sãte tɛ mɔ gbɛ̃.

Wangɔ mɛ lengbi ti zangɔ mɔ na ngoi mɛ sãte tɛ mɔ gbɛ̃

Gi sarangɔ tɛrɛ mɔ na lége tɛ amɔnganga

Tɛnɛ mɛ Ngbangɔ tɛnɛ: “Azi ko gbɛ tɛrɛ la nzɔ̃ni ko, ta ala ndodu na gwɛ̃ tɛ mɔnganga ma, bo awa ngã la ndodu na gwɛ̃ tɛ mɔnganga.”—Matie 9:12.

Se mɛ mɔ lengbi ti kpãngɔ wangɔ niko na kwa: Gi ya mɔnganga za mɔ se lengbi.

Tala lingɔ ngaso: Gi mɔnganga mɛ lengbi ti sarangɔ mɔ nzɔ̃ni. Na ya ngoi mɛndɛ̃ mɔ lengbi ti hũngɔ nzɔ̃ni ya mɔ gi nga amɔnganga mɛndɛ̃. (Masese 14:15) Kambisa tɛnɛ yangondo hɛ̃ mɔnganga—Ye na bɛ mɔ kɔi ya mɔ ma tɛnɛ mɛ ala tɛnɛ nzɔ̃ni, wa ala hĩnga nga kpale ti yakere yakere mɛ aba ngã tɛ mɔ. (Masese 15:22) Gi hĩngangɔ ngã tɛ mɔ nzɔ̃ni nga na yɔrɔ mɛ mɔ lengbi ti mungɔ. Ngoi mɛ mɔ hĩnga ngã tɛ mɔ nzɔ̃ni ko, mɔ na lɛkɛngɔ bingangɔ li tɛ mɔ nzɔ̃ni ti nɛngɔ ya mɔ gbe bɛ mɔ na ya ngã tɛ mɔ, wa mɔ na pɔnangɔ nzɔ̃ni se ti sarangɔ tɛrɛ tɛ amɔnganga mɛ mɔ na yengɔ ni.
Ndo li aye mɛ lengbi ti batangɔ sãtɛ tɛ mɔ

Tɛnɛ mɛ Ngbangɔ tɛnɛ: “Akpengba wele mɛ zo ndo le ya gbɛ tɛrɛ ni ati kpengbani.”—1 Timɔte 4:8.

Se mɛ mɔ lengbi ti kpãngɔ wangɔ niko na kwa: Mɔ na luangɔ anzɔ̃ kpale se du ya mɔ ndo li aye mɛ lengbi ti batangɔ sãte tɛ mɔ nga ma se mɛ zo ndo li ngala sisi ti nɛngɔ ya tɛrɛ ni kpengba.

Tala lingɔ ngaso: Ndo li ngalasisi ngoi zu, tɛ tɛ mɛ lengbi ti batangɔ sãte tɛ mɔ wa ndo la langɔ nzɔ̃ni. Abɛse du ya ta mɛsɛnɛngɔ na se mɛ sãte tɛ mɔ gbɛ̃ na ni adu woni ma ko, azi ti kɔdɛ tɛnɛ ya hɛ̃ngɔ ngoi nga na ngunu ti nɛngɔ ya zo li aye mɛ lengbi ti batangɔ sãte ndo za gba. Ta kitɛ da ma hĩnga ya ye zu mɛ mɔ na lingɔ ti nɛngɔ ya mɔ bata sãte tɛ mɔ ko, ni na zangɔ mɔ gba se du ya ni mangbi na yɔrɔ mɛ mɔ ndo mu.
Ye ya azi mɛndɛ̃ za mɔ

Tɛnɛ mɛ Ngbangɔ tɛnɛ: “Bɛta kwa ndo fa songo ngoi zu, lo du nyita mɛ adũ lo na ya ngoi ti pɛnɔ.”—Masese 17:17.

Se mɛ mɔ lengbi ti kpãngɔ wangɔ niko na kwa: Akwa mɔ lengbi ti zangɔ mɔ ya mɔ gbe bɛ mɔ na ya ngoi ti pɛnɔ.

Tala lingɔ ngaso: Kambisa hɛ̃ kwa mɔ mɛ mɔ ndo kpã bɛ mɔ ndo lo tɛnɛ zu mɛ ka bɛ mɔ. Lingɔ ngaso alengbi ti zangɔ mɔ ti nɛngɔ ya mɔ kɛ̃ abingangɔ li nga na asɔngɔ bɛ zu mɛ lengbi ti gbɛ̃ngɔ sãte tɛ mɔ. Akwa mɔ nga na azi ti ndasewa tɛ mɔ lengbi ti sepalangɔ zangɔ mɔ, ngoi mɛndɛ̃ ta ala lengbi ti hĩngangɔ ye mɛ ala li ma. Ni la kambisa hɛ̃ la yangondo ye mɛ ala li ti nɛngɔ ya ala za mɔ. Ta mɔ yɔ nga ye mɛ ɔ nyɔ kpɔ̃ ni ma, wa ndo hɛ̃ nga la siakɔli na lo ti zangɔ mɛ ala ndo za na mɔ. Ta bɛ mɔ li na ni ma ya abɛse du ya akwa mɔ ye zangɔ mɔ ko, na ya ngoi mɛndɛ̃ ala lengbi ti lingɔ ye mɛ alengbi ti hɛ̃ngɔ mɔ pɛnɔ. Na ya angoi mɛndɛ̃ na yɔngɔ ya mɔ lu hɛ̃ la ndia mɛ ba ngoi bere fãni kɛ̃ la ala lengbi ti gangɔ bangɔ mɔ.
Du na bingangɔ li ti nzɔ̃ni

Tɛnɛ mɛ Ngbangɔ tɛnɛ: “Le bɛ mɛ ndo du na dengɔ bɛ adu nga ma yɔrɔ mɛ ndo sara zo, kanda le bɛ mɛ nzɛ̃ ndo onzi ngunu tɛ zo”—Masese 17:22.

Se mɛ mɔ lengbi ti kpãngɔ wangɔ niko na kwa: Dungɔ na bingangɔ li ti nzɔ̃ni nga na nzɔ̃ dangɔ bɛ alengbi ti zangɔ mɔ ya ta bɛ mɔ ngbã ngbũ ma wa mɔ gbe bɛ mɔ na ya pɛnɔ tɛ mɔ.

Tala lingɔ ngaso: Na ngoi mɛ mɔ ndo li zu ti nɛngɔ ya mɔ mɛsɛnɛ na lo ti ya dungɔ lɛ ngɛ̃́ tɛ mɔ mɛ agbinyangbi ko, kpã lɛ mɔ na ndo aye mɛ mɔ lengbi ti lingɔ kanda ta na ndo omɛ mɔ lengbi ti lingɔ ni ma. Kɛ̃ hangɔ tɛrɛ mɔ na azi mɛndɛ̃ nga na dungɔ lɛ ngɛ̃́ mɛndó mɔ na ni uzu ti nɛngɔ ya mɔ ti na ngã. (Galatia 6:4) Se mɔ kpã amɔkanɔ mɛ mɔ lengbi ti kokisangɔ niko, na zangɔ mɔ ya mɔ du na nzɔ̃ dangɔ bɛ na ndo ti bi mɛ na gangɔ. (Masese 24:10) Li lo tɛrɛ azi na bangɔ makoki mɛ mɔ na ni. Dengɔ bɛ ti hɛngɔ ye hɛ̃ azi mɛndɛ̃ na zangɔ mɔ ya mɔ kɛ̃ dangɔ bɛ ti siɔni.—Awa Pangɔ Kwa 20:35.

Nzapa lengbi ti zangɔ mɔ ya mɔ gbe bɛ mɔ na ya pɛnɔ ti ngã tɛ mɔ?

Ngbangɔ pa ya Yehova Nzapa a lengbi ti zangɔ zo ya lo gbe bɛ lo na ya pɛnɔ ti ngã tɛ lo. Abɛse du ya ta e ndo kũ ya Nzapa sara e na ndenge ti kpɛ̃nɛ ma ko, lo ndo za azi ko la ndo vɔrɔ lo na lége ti aye mɛ:

Siriri. Yehova na hɛ̃ngɔ e “bɛ pii mɛ aɔ kɔdɛ tɛ azi.” (Filipɛ 4:6, 7) Bɛ pii niko na zangɔ zo ya ta lo du na sɔngɔ bɛ gba ma. Nzapa ndo hɛ̃ bɛ pii niko hɛ̃ azi ko la ndo kambisa sɔngɔ bɛ tɛ la hɛ̃ lo na ya sambela.—1 Petro 5:7.

Ndara. Yehova lengbi ti hɛ̃ngɔ mɔ ndara ti nɛngɔ ya mɔ mu ekateli ti nzɔ̃ni. (Zaki 1:5) Zo lengbi ti luangɔ ndara ti ngaso na ngoi mɛ lo ndo manda wa lo ndo kpã awangɔ ti ya Ngbangɔ na kwa.

Nzɔ̃ dangɔ bɛ na ndo bi mɛ na gangɔ ndo sa ngunu bɛ. Yehova ko kapa ya na bi mɛ na gangɔ ko, “ta zo kɔi na tɛnɛngɔ ya: ‘Tɛrɛ mbi ndo sɔ ma.’” (Yisaya 33:24) Nzɔ̃ dangɔ bɛ niko ndo za azi gba ya ala du na bingangɔ li ti nzɔ̃ni abɛse du ya ala gã kpengba ngã.—Yirimia 29:11, 12.

a Yehova adu ili Nzapa mɛ kaya Ngbangɔ.—Nzembo 83:18.

Ngasia la mɔ lengbi ti zangɔ kwa mɔ mɛ ndo gbe bɛ lo na ya kpengba ngã nɛ?

Du zo mɛ ndo ma ndo nzɔ̃ni. Kɔi ti aye mɛ mɔ lengbi ti lingɔ ti nɛngɔ ya mɔ za kwa mɔ adu mangɔ lo nzɔ̃ni na ngoi mɛ lo ndo tɛnɛ tɛnɛ hɛ̃ mɔ. Ta na dungɔ nzɔ̃ni ya mɔ gbinya tɛnɛ zu mɛ lo ndo tɛnɛ ma. Ngoi gba alengbi ti dungɔ nzɔ̃ni ya mɔ ma bo lo. Kpã tɛrɛ mɔ na ndo tɛ lo wa ta mɔ be la lo ma. Ta mɔ da bɛ mɔ ya mɔ hĩnga nzɔ̃ni se mɛ kwa mɔ ndo ma na tɛrɛ lo na seni ma se du ya ta ahĩnga ngã tɛ lo nzɔ̃ni ma.—Masese 11:2.

Tɛnɛ tɛnɛ na ndenge mɛ alengbi ti sangɔ ngunu bɛ lo. Ngoi mɛndɛ̃ ta mɔ lengbi ti hĩngangɔ nvɛ̃ni tɛnɛ mɛ mɔ na tɛnɛngɔ hɛ̃ kwa mɔ ma, kanda tɛnɛngɔ hɛ̃ lo ya mɔ hĩnga alo ti pɛnɔ mɛ lo ndo tengbi na ni alengbi ti sangɔ ngunu bɛ lo gba na se lɛ kɛ̃ngɔ tɛnɛngɔ tɛnɛ. Se mɔ gi tɛnɛ ti tɛnɛngɔ hɛ̃ lo gba ko, tala tɛnɛngɔ ngaso: “ta mbi hĩnga tɛnɛ mɛ mbi tɛnɛ hɛ̃ mɔ ma, mɔ hĩnga ya mbi ndo kpã lɛ mbi ndo mɔ.” Kɛ̃ tɛnɛngɔ tɛnɛ mabere “Adu pɛnɔ nvɛ̃ni” bere “Ta mɔ lengbi ti. . . .”

Mɔ na fangɔ ya mɔ ndo kpã lɛ mɔ ndo kwa mɔ se du ya mɔ ndo manda alo mɛ aba ngã tɛ lo. Lo na sepalangɔ na ge ge ge mɛ mɔ ndo li ti nɛngɔ ya mɔ hĩnga se mɛ lo da, wa tɛnɛ tɛ mɔ na tingɔ ngbondoni ka lɛ lo. (Masese 18:13) Ayɔ ya mɔ du na kpengba lɛ ti nɛngɔ ya ta mɔ hɛ̃ lo wangɔ ti wawa wawa ma.

Hɛ̃ lo zangɔ mɛ lo na gwɛ̃ ni. Na se lɛ tɛnɛngɔ hɛ̃ lo ya mɔ hĩnga se ti zangɔ lo ko, hũnda lo ya ye mɛ nvɛ̃ni mɔ li ti nɛngɔ ya mɔ za lo nɛ. Ngoi mɛndɛ̃ kwa mɔ lengbi ti hũngɔ ya ti nɛngɔ ya ta ni du kumba ka tɛ mɔ ma ko, lo lengbi ti kɛ̃ngɔ ya ta mɔ za ni ma. Se lo li ngaso ko, tala zangɔ lo na ya akwa mɛndɛ̃ nga ma vɔ̃ngɔ hɛ̃ lo aye ka ngele, mbongɔ hɛ̃ lo ya da bere lingɔ hɛ̃ lo akwa mɛndɛ̃.—Galatia 6:2.

Ta mɔ zia ma. Na lo mɛ ya kwa mɔ ndo gbe bɛ lo na ya ngã tɛ lo ko, ngoi mɛndɛ̃ lo lengbi ti kɛ̃ngɔ kambisangɔ dangɔ bɛ tɛ lo hɛ̃ngɔ mɔ nga ma se mɛndó lo ndo li na ni uzu. Du na yɔngɔrɔ bɛ wa kpã tɛrɛ mɔ na ndo tɛ lo. Ngbã la kwɛ hɛ̃ngɔ lo aye mɛ lo na gwɛ̃ ni.—Masese 18:24.