Mɔ ka popo tɛ amiliɔ̃ tɛ azi mɛ atengbi na kpale mɛ aba gbɛ̃ngɔ ti klima ná aye mɛ ge lɛ sese? Akpale niko ndo si na apɛnɔ gba. Akpengba yá nga ma ouragans, typhons, cyclones, nga tornades ko, ni ndo si na akpengba kpale gba nvɛ̃ni nga ma, yangɔ ti akpengba mopo ka lɛ tɛ, ningɔ ti akpengba ngu, nga na akpengba yá mɛ ndo gbɛ̃ aye. Ngu ti kpengbani lengbi ti gbɛ̃ngɔ sese wa yá ti kpengbani alengbi nga ti singɔ na awá mɛ ndo li ya, ngɔngɔ gbí. Na ngoi ti bulu, gbingɔ ti kpengbani, nga na akpengba yá lengbi ti singɔ na akpengba kpale gba.

 Na ya ando gba ge lɛ sese ko, gbɛ̃ngɔ ti aklima ná aye ndo li tɛrɛ lo fãni gba nvɛ̃ni. Rapɔrt kɔi ti Fédération international nga ti Sociétés de la Croix-Rouge ná ti Croissant-Rouge apa ya, “Azi mɛ ndo tengbi na kpale mɛ ndo si na bɛ lo ati gba nvɛ̃ni. Na lo mɛ ya, inondations, akpengba yá, hulengɔ ti ando ndo ti bo gba ko, ni li ya, azi ná asa ndo kpili gba na ya bulu kɔi kɔi. Ni la, amiliɔ̃ tɛ azi ná asa ndo zia ndo tɛ lo so gwengɔ dungɔ ka ndo mɛndɛ̃.”

 Na ngoi mɛ akpale ni ndo li tɛrɛ lo ko, ta ni ndo ngbã bo na giangɔ azi ma, kanda ni ndo gia nga bingangɔ li tɛ la. Azi mɛndɛ̃ ndo ma pɛnɔ gba na lo mɛ ya, aye tɛ ala gbɛ̃, ada tɛ ala kala, bere zo tɛ la kɔi ti ndasewa kpi.

 Se du ya, mɔ tengbi nga na kpale mɛ aba gbɛ̃ngɔ ti klima ná akpale mɛ ndo si na bɛ lo ko, hĩnga ya Ngbangɔ lengbi ti zangɔ mɔ ya, mɔ gbe bɛ mɔ. Ni na atɛnɛ ti sangɔ ngunu bɛ, anzɔ̃ kapa, wa ni nga na awangɔ gba mɛ aza azi mɛ atengbi na kpale ti ngaso. (Roma 15:4) Ni ndo hɛ̃ nga gbinya na ndo ahũnda ti ngbondoni mɛ azi gba ndo hũnda, nga ma: Nda mɛ Nzapa zia ya, akpale niko zu ali tɛrɛ lo nɛ? Ni du tumbu tɛ Nzapa?

 Ngbangɔ ndo pa hɛ̃ e ya, ta asiɔ kpale mɛ azi ndo tengbi na ni ndo lo ka tɛ Nzapa ma. Kanda ni pa hɛ̃ e ya ‘Ta zo lengbi ti tarangɔ Nzapa na ye ti siɔni ma, wa ta Nzapa lengbi nga ti tarangɔ zo na kpale ti ngaso ma.’ (Zaki 1:13) Ni fa ya, ta Nzapa la ndo si na agbɛ̃ngɔ ti klima ná akpale mɛ ndo hɛ̃ azi pɛnɔ ndɛ ma.

 Ngbangɔ na apandɛ mɛ ndo fa ya, Nzapa salelandó aye ti ngunu mɛndó lo li so hɛ̃ngɔ asiɔ azi tumbu. Kanda kpale niko aɔngbi na akpengba kpale mɛ gbɛ̃ngɔ ti klima ndo si na ni ndɛ na ngoi tɛ e, na lo mɛ ya, akpale ni ndo si zangangɔ ya, azi hĩnga ni wa ni ndo si na asiɔ azi ná anzɔ̃ azi. Kanda pandɛ ti ya Ngbangɔ pa ya, Nzapa ndo bata ngoi zu anzɔ̃ azi, lo ndo pa ngandó hɛ̃ azi uzu ti lo hɛ̃ngɔ tumbu kɔi, wa lo ndo kambisa nga nda mɛ lo hɛ̃ tumbu ni. Na ndakisa, na ngoi tɛ Noa, Nzapa kambisandó nda mɛ lo ye hongɔ lɛ sese na ngu, lo pandó hɛ̃ azi uzu ti lo lingɔ ni, wa lo batandó Noa ná azi ti ndasewa tɛ lo.—Ebandeli 6:13; 2 Petro 2:5.

 Ti hĩngangɔ nda mɛ e tɛnɛ ya, akpengba kpale mɛ ndo si na bɛ lo ndɛ ta adu tumbu tɛ Nzapa ma ko, ba tɛnɛ mɛ “Biblia elobi nini mpo na makama oyo ebimaka yango moko?”

 Ngbangɔ pa ya, Yehova a Nzapa ndo kpã bɛ lo ndo azi, wa lo ndo kpã nga tɛrɛ lo na ndo tɛ e. Zia e ba atɛnɛ ti sangɔ ngunu bɛ mɛ so ya avɛrse mɛ.

•   Yisaya 63:9: “Ngoi zu ko la ala na pɛnɔ ko, [Nzapa] ndo ma nga pɛnɔ.”

   Afa ya: Yehova ndo ma pɛnɔ ka bɛ lo na ngoi mɛ lo ndo hũ azi ndo hũ pɛnɔ.

•   1 Petro 5:7: ‘Lo ndo kpã lɛ lo ndo ĩ.’

   Afa ya: Yehova ndo ma sɔngɔ bɛ gba na lo tɛ mɔ.

 Yehova ndo za e na lo mɛ ya, lo ndo kpã bɛ lo ndo e, wa lo ndo kpã nga tɛrɛ lo na ndo tɛ e. Lo ndo za e na lége ti Ngbangɔ mɛ asĩ na anzɔ̃ wangɔ nga na akapa mɛ ndo fa ya, na bi mɛ na gangɔ, ta e na hũngɔ pɛnɔ na lo ti kpale mɛ aba gbɛ̃ngɔ ti klima ma.—2 Kɔrinto 1:3, 4.

 Yehova ko kapa ya, “Mbi na hɛ̃ngɔ ĩ nzɔ̃ du na bi mɛ na gangɔ nga nzɔ̃ dangɔ bɛ.” Yirimia 29:11) Lo ye ya, azi du na dengɔ bɛ ge lɛ sese mɛ na tingɔ paradizo, kai ta zo kɔi na kpɛngɔ kpale mɛ aba gbɛ̃ngɔ ti klima ma.—Ebandeli 1:28; 2:15; Yisaya 32:18.

 Nzapa na lingɔ ni na lége ti Lo-lengɔ Gbia tɛ lo mɛ lo kpã Yezo ya, lo du gbia ti gbia ni ka ndozu. (Matie 6:10) Yezo na ndara nga na ngunu ti gbanzingɔ gbɛ̃ngɔ ti klima nga na apɛnɔ mɛ ni ndo si na ni. Ngoi mɛndó lo ge lɛ sese ko, lo fandó ya lo na ngunu ti onzingɔ akpale ni. (Marko 4:37-41) Lo na lengɔ gbia ni na kɔdɛ nga na ndara, wa lo na fangɔ na azi se ti nzɔ̃ni ti batangɔ, ngu, yando bere yá ti nɛngɔ ya ta ala gbɛ̃ ni ma. (Yisaya 11:2) Na gbɛ Lo-lengɔ gbia tɛ Yezo ko, ta azi na hũngɔ pɛnɔ na ndo gbɛ̃ngɔ ti aye mɛ ndo lo na ndo aklima ma.

 Ngoi mɛndɛ̃ mɔ ndo hũnda tɛrɛ mɔ ya, ‘Yezo na salelangɔ ngunu tɛ lo so onzingɔ akpale mɛ ndo si na ndo gbɛ̃ngɔ ti klima lá wa?’ Ti nɛngɔ ya mɔ lua gbinya na ndo hũnda ni ko, ba tɛnɛ mɛ “Ntango nini Bokonzi ya Nzambe ekoyangela mabele?”

 Awangɔ ti ya Ngbangɔ lengbi ti zangɔ mɔ uzu ya akpale ni ali tɛrɛ lo, na ngoi mɛ ni ndo li tɛrɛ lo, nga na gesi.

•   Uzu ti nɛngɔ ya, akpale mɛ ndo si na lo ti gbɛ̃ngɔ ti klima ali tɛrɛ lo: Lɛkɛ tɛrɛ mɔ so lingɔ kpale na kpɛ.

   Tɛnɛ mɛ Ngbangɔ tɛnɛ: “Wa kpengba lɛ ndo hũ siɔ lo na yɔngɔrɔ ni, wa lo hɔndɛ tɛrɛ lo, kanda bubulu ndo gwe bo na ndo li lo, wa lo ti lɛ ni.”—Masese 22:3.

   Afa ya: Ndo gi hĩngangɔ akpengba kpale mɛ alengbi ti singɔ ka ndo mɛ mɔ dati nɛngɔ ya, mɔ li kpale na kpɛ ndoni kɔi na ndasewa tɛ mɔ.

   Tɛnɛ mɛ azi mɛndɛ̃ tɛnɛ: “E sondó kwa ti wá mɛ ndo lo na lo ti gbingɔ ti angɔngɔ na lo mɛ ya, elɛkɛndó tɛrɛ e uzu. E ndó na asaki ti ye mɛ alengbi ti zangɔ e na ngoi mɛ gbɛ̃ngɔ ti akpale mɛ ndo lo na ndo klima ali tɛrɛ lo. Kaya ni e kpãndó ayɔrɔ ná abɔngɔ tɛ e mɛndɛ̃ ti yungɔ. Kɔdɛ kpɛndó li azi mɛ so gunda e, ta ala hĩngandó ye ti lingɔ ma. Kanda e ndo na aye zu mɛ ayɔndó ya e du na ni, ni la ta bɛ mbi na lingɔ na ni bɛ fãni kɔi ma!”—Tamara, California États-Unis.

•   Ngoi ti kpengba kpale: Gi aye mɛ aɔ ngbondoni.

   Omɛ Ngbangɔ tɛnɛ: “Ta sanga ma, bɛ se zo adu na ye sĩ ko, ta du tɛ lo adu na lo ti aye tɛ lo ma.”—Luka 12:15.

   Afa ya: Dungɔ lɛ ngɛ̃́ tɛ mɔ adu ngbondoni ɔngɔ aye mɛ mɔ na ni.

   Tɛnɛ mɛ azi mɛndɛ̃ tɛnɛ: “Ngoi mɛ kpengba yá mɛ ando ili ni ya, Typhoon Lawin b gbɛ̃ndó da tɛ e ko, ta mbi hĩngandó ye ti lingɔ ma. Kanda ye mɛndó mbi li, adu lingɔ sambela na bɛ mbi kɔi hɛ̃ Yehova wa na gesi mbi hũndó ya, aye la agbɛ̃ kanda ta dungɔ lɛ ngɛ̃́ tɛ e ma.”—Leslie, Philippines.

•   Na pɛ akpale mɛ ndo si na lo ti gbɛ̃ngɔ ti klima: Kpã lɛ mɔ na ndo akpale ti ndɛ kanda ta na ndo akpale mɛ aɔ wɛ ma.

   Tɛnɛ mɛ Ngbangɔ tɛnɛ: “Ta bɛ ĩ asɔ na lo ti ndã ma, na lo mɛ ya lá ti ndã na gangɔ nga na pɛnɔ tɛ lo nvɛni, bi kɔi kɔi na pɛnɔ tɛ lo.”—Matie 6:34.

   Afa ya: Ta bɛ mɔ so ɔngɔ nyɔ kpɔ̃ ni na lo ti kpale mɛ na gangɔ ndã ma.

   Tɛnɛ mɛ azi mɛndɛ̃ tɛnɛ: “Na pɛ kpengba yá ti Irma mɛndó agbɛ̃ da tɛ mbi ko, Ayɔndó ya, mbi mu ekateli gba mɛndó ta mbi de mbi mu ni uzu ma. Ni giandóbingangɔ li tɛ mbi nvɛ̃ni. Mbi tarandó landangɔ wangɔ ti ya Ngbangɔ mɛ pa ya, ta bɛ ĩ sɔ na lo ti bi ti ndã ma. Na lége ti lisalisi tɛ Yehova mbi gbendó bɛ mbi na ndenge kɔi mɛ ta mbi ndo dandó na bɛ mbi ma.”—Sally, Florida, États-Unis.

 Ti nɛngɔ ya mɔ hĩnga aye mɛndɛ̃ ti lingɔ ko, ba tɛnɛ mɛ “Ntango likama ebimi—Makambo ya kosala mpo na kobatela bomoi.”