“Ngiyake ngizame ukubala iBhayibhili kodwa ngidondiswe yibukhulu balo.”​—UBriana, oleminyaka engu-15.

 Kuyake kukwenze yini lokhu? Nxa kunjalo isihloko lesi sizakunceda kakhulu!

•  Kungani kumele ubale iBhayibhili?

•  Kumele ulibale njani?

•  Okutshiwo ngabentanga yakho

 Kuyakunzimela yini ukubala iBhayibhili nsuku zonke? Ukubona kungcono yini ukuzibukelela iTV lamavidiyo aku-inthanethi kulokubala ibhuku elilamakhasi adlula 1 000 futhi elingelamifanekiso? Nxa kunjalo ungalahli ithemba.

 Kubone ngalindlela: Nxa ubungathola ibhokisi elidala eligcwele amatshe aligugu lezinye izinto ezidulayo ubungeke ufune ukubona okunye okuphakathi yini?

 IBhayibhili linjengebhokisi leli ngoba limumethe inhlakanipho engakunceda ukuthi:

•   Ukhethe kuhle empilweni

•   Uzwisisane labazali bakho

•   Uthole abangane abahle

•   Ulwisane lokukhathazeka

 Kodwa kungani ibhuku elidala kangaka liluncedo lamuhla? Kungenxa yokuthi “iMibhalo yonke yaphefumulelwa nguNkulunkulu.” (2 KuThimothi 3:16) Yikho amacebo esiwathola eBhayibhilini avela kuNkulunkulu ngokwakhe.

 Ungalibala usukela ekuqaliseni usiya ekucineni. Ukwenza njalo kuzakusiza uzwisise ukuthi iBhayibhili lilawuphi umlayezo oqakathekileyo. Zinengi izindlela zokulibala. Ngokwesibonelo:

•    Ungalibala ngokulandelana kwamabhuku alo, kusukela kuGenesisi kusiya kuSambulo.

•    Ungalibala ngokulandelana kwezindaba ezikulo loba kusiya ngokuthi zabhalwa nini.

 Zama Lokhu: Khangela “Ibhukwana Elisincedisa Ukufunda ILizwi LikaNkulunkulu” ingxenye 4 ukuze uthole okwenzakala kuJesu esesemhlabeni ngokulandelana kwakho.

 Ungakhetha indaba ethile ehambelana lohlupho olalo. Ngokwesibonelo:

•   Udinga abangane abathembekileyo yini? Bala indaba kaJonathani loDavida. (U-1 Samuyeli isahluko 18-​20) Zama ukubona ukuthi yiziphi izimpawu uDavida ayelazo ezingabe zenza uJonathani waba ngumngane wakhe.

•   Udinga indlela yokulwisana lezilingo yini? Bala indaba kaJosefa ukuze ubone ukuthi wazibalekela njani izilingo ayehlangana lazo. (UGenesisi isahluko 39) Ekubaleni kwakho nanzelela ukuthi kuyini okwamnceda ukuthi azimisele ukubalekela izilingo.

•   Ufuna ukuthuthukisa imithandazo yakho yini? Bala indaba kaNehemiya. (UNehemiya isahluko 2) Ngemva kwalokho hlola ukuthi kuyini okwenza umthandazo kaNehemiya waba lohlonzi.

 Zama Lokhu: Bala iBhayibhili usendaweni ethuleyo ukuze ukuzwisise okubalayo.

 Khetha indaba ethile kumbe isahluko esisebhukwini lamaHubo ubusubona ukuthi okubalayo ungakusebenzisa njani. Ngemva kokubala zibuze imibuzo elandelayo:

•    UJehova wayifakelani indaba le eBhayibhilini?

•    Engikubalayo kungifundisani ngoJehova?

•    Ngingakusebenzisa njani empilweni yami?

 Zama Lokhu: Bhala phansi uhlelo lokubala iBhayibhili ozalusebenzisa njalo uhlele ukuthi uzaqalisa nini ukululandela.