Romanos 8:1-39
8 Yejua ika, akin pouij iuan Cristo Jesús amo kiixtaliaj maj kintatsakuiltikan.
2 Porin tanauatil tein kipia ichikaualis Dios tein kichiua maj se nemi itechkopa Cristo Jesús, mitsmakixtij imako itanauatil tajtakol uan itanauatil mikilis.
3 ITanauatil Moisés amo uelik techmakixtij porin tinochin titajtakolejkej. Yejua ika Dios techmakixtij keman kiualtitanik iKoneuj akin tamatia kemej se takat tajtakolej para kiixpolos tajtakol. Ijkon kiixtalij maj ixpoliui tajtakol tein yetok itech tonakayo,
4 para maj tiuelikan tikchiuakan tein kijtoua iTanauatil Moisés porin timoyekanaj ika ichikaualis Dios, uan amo ika tein kinejneki tonakayo.
5 Porin akin moyekanaj ika tein kinejneki ininnakayo, kitayekanaltiaj tein kinejnekij, sayoj ke akin moyekanaj ika ichikaualis Dios, kitayekanaltiaj tein ichikaualis Dios kinyekana maj kichiuakan.
6 Tiktayekanaltiskej* tein kinejneki tonakayo, kichiua maj timikikan, sayoj ke tiktayekanaltiskej tein ichikaualis Dios techyekana maj tikchiuakan, kichiua maj tinemikan uan maj tiyolseujtokan;
7 tiktayekanaltiskej tein kinejneki tonakayo, kichiua maj tikixnamikikan Dios, porin tein kinejneki tonakayo amo kitakamati itanauatil Dios uan nion ueli kitakamati.
8 Yejua ika akin moyekanaj ika tein kinejneki ininnakayo, amo ueli kiyolpaktiaj Dios.
9 Sayoj ke, komo Dios namechmaka ichikaualis, namejuan amo namoyekanaj ika tein kinejneki namonakayo, ta ika ichikaualis Dios. Sayoj ke komo aksa* amo tanemilia kemej Cristo, yejua amo poui iuan.
10 Sayoj ke, komo nanpouij iuan Cristo, maski tajtakol kimiktij namonakayo, ichikaualis Dios kichiua xiyoltokan, porin nanyolmelaujkej iixpan Dios.
11 Ichikaualis Dios kichiuak maj oksepa nemi* Jesús. Komo Dios namechmaka ichikaualis, no ika nejon chikaualis kichiuas maj nemi namonakayo tein miki.
12 Yejua ika nokniuan, moneki amo tikauaskej maj tonakayo techchiualti tein kineki.
13 Komo namoyekanaj ika tein kinejneki namonakayo, xikyekmatikan ke namikiskej. Sayoj ke, komo ika ichikaualis Dios nankimiktiaj tein amo kuali tein nankichiujtokej, nanemiskej.
14 Sayoj ke nochin akin moyekanaj ika ichikaualis Dios, yejuan kemaj ikoneuan Dios.
15 Porin ichikaualis Dios amo kichiua ximoajsikan temako uan oksepa ximoujtokan, ta kichiua maj Dios namechseli kemej ikoneuan, uan nejon chikaualis kichiua maj chikauak tikijtokan: “¡Abba,* noTajtsin!”.
16 Ichikaualis Dios techyekmatiltia ke tejuan tiikoneuan Dios.
17 Yejua ika, komo tiikoneuan, tikseliskej tein yejua kineki techmakas. Yejua techmakas tein kimakas Cristo. Sayoj ke achto moneki titajyouiskej iuan Cristo para maj no techueyitalikan iuan.
18 Yejua ika, niknemilia ke kemej yeskia amo teyi tikijyouijtokej komo titanemiliaj itech tonalmej keman Dios totechkopa kinextis ueyi taxtauil tein techmakas.
19 Porin akin* Dios kinchijchiuak kichixtokej* ika nochi ininyolo maj monextikan ikoneuan Dios.
20 Porin Dios kikauak maj akin kinchijchiuak amo teyi uelikan kichiuakan, amo porin yejuan kinekiaj, ta porin Dios ijkon kiixtalij. Sayoj ke, keman kiixtalij nejon no motenkauak nejin:
21 ke akin Dios kinchijchiuak amo moajsiskejok imako tajtakol nion mikilis.* Ijkon yeskij kemej ikoneuan Dios akin amo yetokej temako. ¡Nejin semi kualtsin!
22 Tikmatij ke akin Dios kinchijchiuak sentayokolchokatokej uan sentajyouijtokej hasta axkan.
23 Sayoj ke axkan tikpiaj ichikaualis Dios, nejin yejua yekinika taman* tein kinextia tein mochiuas satepan. Tiyoltayokolchokaj keman tikchixtokej* ika nochi toyolo maj Dios techseli kemej ikoneuan. Ijkuak, techmakixtis uan kichiuas maj amo tikpiakanok tonakayo tein kipia tajtakol uan miki, porin Cristo taxtauak.
24 Porin keman techmakixtijkej, peuak tikchiaj nejon. Sayoj ke keman aksa kichia tein ueli kiita, amo monekiok maj kichia, ¿melauj?
25 Sayoj ke, komo tikchiaj tein amo tikitaj, titaxikouaj uan tiksentokaj tikchiaj ika nochi toyolo.
26 No ijkon, ichikaualis Dios techpaleuia keman amo tichikaujkej. Porin xa tikmatij ke moneki tikchiuaskej netataujtil, sayoj ke amo tikmatij toni tikijtoskej. Ichikaualis Dios toka motataujtia keman titayokoxtokej uan amo teyi ueli tiktenkixtiaj.
27 Sayoj ke, Dios kiyekita toyolo uan kimati tein ichikaualis tajtantok keman kintajtouia akin moinxelouilij* ijkon kemej Dios kineki.
28 Tikmatij ke Dios kiita* maj kualtsin sentekiti nochi tein kichiua para maj kinpaleui akin kitasojtaj, akin kinnotsak ijkon kemej yejua kiixtalij.
29 Porin akin achto kinitak, no achtoya kinixtalij maj mochiuakan kemej iKoneuj, para maj yejua kinyekana miakej iikniuan.
30 Uan no, akin achtoya kinijitak,* no kinnotsak; uan akin kinnotsak, no kinitak ke yolmelaujkej. Uan akin kinitak ke yolmelaujkej, no kinueyitalij.
31 Komo ijkon, ¿toniok uelis tikijtoskej? Komo Dios touan yetok, ¿akoni uelis techixnamikis?
32 Ta yejua nion tepitsin kinemilij amo kitemaktis iKoneuj, ta kitemaktij maj momikili para techmakixtis tinochin. Komo techmakak iKoneuj, ¿nankinemiliaj ke amo no techmakas ika nochi iyolo nochi okseki taman?
33 ¿Akoni uelis kinteluilis akin Dios kinijitak?* Amo akin, porin Dios kinita ke yolmelaujkej.
34 ¿Akoni kiixtalis maj kintatsakuiltikan? Amo akin, porin Cristo Jesús momikilij, uan amo sayoj nejon, ta oksepa nemik,* yetok iyekmakopa Dios uan no techtajtouia.
35 ¿Toni kichiuas maj Cristo amo techtasojtaok? ¿Komo tikpiaj ouijkayomej oso semi timotekipachojtokej? ¿Komo techtajyouiltiaj oso amo tikpiaj tein tikuaskej nion tein timotaliliskej? ¿Komo tietokej tamouililpan oso kinekij techmiktiskej? ¡Amo teyi kichiuas maj Cristo amo techtasojtaok!
36 Tajkuilolamatsin kijtoua: “Nochipa kinekij techmiktiskej porin tipouij itech moxolal. Techitaj kemej ichkamej* tein kinmiktitij”.
37 Sayoj ke, porin techpaleuia akin techtasojta, titatankej itech nochi nejin.
38 Porin nikyekmati ke nion teyi uelis kichiuas maj Dios amo techtasojtaok: nion komo timikij, nion komo tinemij, nion ángeles, nion tekiuanij, nion tein axkan onkak, nion tein onkas satepan, nion chikaualismej,
39 nion tein moajsi ajko, nion tein moajsi uejkatan, nion okse taman tein Dios kichijchiuak. Nion teyi uelis kichiuas maj Dios amo techtasojta ijkon kemej toTekotsin Cristo Jesús no techtasojta.
Tajtolmelaualismej
^ Oso “Titanemilijtinemiskej itech”.
^ Oso “akin”, “akaj”.
^ Itech griego, “kiajokuik”.
^ Se tajtol hebreo oso arameo tein kikuiaj konemej keman kinotsayaj inintat, tein axkan miakkan mokui kemej papi.
^ Oso “tein”.
^ Oso “kichatokej”.
^ Itech griego, “imako nakat tein uejueliui”.
^ Itech griego, “takilot”.
^ Oso “tikchatokej”.
^ Oso “chipaujkej iixpan”.
^ Oso “kichiua”.
^ Oso “kinixpejpenak”.
^ Oso “kinixpejpenak”.
^ Itech griego, “moajokuik”.
^ Oso “borregos”.
