Romanos 14:1-23
14 Kuali xikselikan akin amo yektakuaujtamati, sayoj ke amo xikijtokan ke amo kuali yetok tein kinemiliaj oksekin.*
2 Xa akin semi takuaujtamati nochi kikua, sayoj ke akin amo yektakuaujtamati xa sayoj kikua kilit.
3 Akin nochi kikua maj amo kiixtopeua akin amo nochi kikua, uan akin amo nochi kikua maj amo kijto ke amo kuali yetok tein kichiua akin nochi kikua, porin Dios kuali kiselijya.
4 ¿Toni tichiujkej tejua para tikijtos ke amo kuali yetok tein kichiua itekitikauj okse? Sayoj iteko kiixejekoua ox kuali tein kichiujtok oso amo. Tein melauj, uelis kuali moajsis iixpan porin Jehová* kipaleuia.
5 Sekin kiitaj ke se tonal okachi tayekantok ke okseki tonalmej; oksekin kiitaj ke nochi tonalmej tamatij kemej okseki tonalmej. Maj sejse kinemili ke tein kineltoka kuali yetok.
6 Akin kiita ke se tonal okachi moneki, kichiua nejon para kiueyitalis Jehová.* No ijkon, akin nochi kikua, kikua para kiueyitalis Jehová,* porin kitasojkamatilia Dios. Uan akin amo nochi kikua, no kiueyitalia Jehová,* uan kitasojkamatilia Dios.
7 Tein melauj, nion semej tinemij sayoj para timoueyitaliskej tejuansan uan amo akin miki sayoj para moueyitalis yejuasan.
8 Porin komo tiyoltokej, tiyoltokej para tikueyitaliskej Jehová,* uan komo timikij, timikij para tikueyitaliskej Jehová.* Yejua ika, komo tiyoltokej oso timikij, tiiaxkauan Jehová.*
9 Tein melauj, yejua ika Cristo momikilij uan oksepa nemik: para yeski ininTeko akin momikilijkejya uan akin yoltokej.
10 Sayoj ke ¿keyej tikijtoua ke amo kuali yetok tein kinemilia mokniuj? ¿Oso keyej no tikixtopeua mokniuj? Porin tinochin tiijkatoskej iixpan Dios, uan yejua kiixtalis tein technamiki tikseliskej.
11 Porin ijkuiliujtok: “Jehová* kijtoua: Uelis nankiyekmatiskej ke niyoltok. Uan no uelis nankiyekmatiskej ke nochin motankuaketsaskej noixpan uan nochin kijtoskej senteixtenoj ke niDios”.
12 Nejin kinextia ke tisejsemej titanankiliskej iixpan Dios por nochi tein tikijtojkej uan tikchiujkej.
13 Yejua ika, maj amo tikijtokanok ke amo kuali yetok tein kinemiliaj oksekin. Okachi kuali, xikixtalikan amo nankichiuaskej maj se tokniuj amo yektakuaujtamatiok oso maj tajtako.
14 Kemej nejua niktojtoka toTekotsin Jesús, nikyekmati ke chipauak nochi tein tikuaj. Sayoj ke keman aksa* kinemilia ke teisa amo chipauak, amo kuali yetokok maj kikua.
15 Yejua ika, komo tikyolkokoua mokniuj ika tein tikua, amo tiknextijtokok ke titetasojta. Cristo no ika momikilij. Amo xikchiua maj mokniuj amo takuaujtamatiok* ika tein tikuas.
16 Yejua ika, amo xikchiuakan maj amo kuali ika tajtokan tein kuali tein nankichiuaj.
17 Para maj aksa kalaki itech iTaixyekanalis Dios, amo tayekantok tein kikuas oso tein tayis, ta okachi moneki yeski yolmelauak, yolseujkanemis uan yolpakis porin Dios kipaleuia ika ichikaualis.
18 Porin akin ijkon kitekitilia Cristo kemej takeual, kiyolpaktia Dios uan oksekin kuali kiitaj.
19 Yejua ika, maj tiksentokakan tikchiuakan tein tapaleuis maj tinochin kuali timouikakan uan maj timosenyolchikauakan.
20 Amo xikchiujtook maj takual kiuejuelo tein Dios kichijchiuak. Tein melauj, nochi uelis se kikuas, sayoj ke amo kuali yetok maj se kikua teisa komo nejon kichiua maj aksa amo yektakuaujtamatiok.
21 Okachi kuali amo xikua nakat, nion xitayi vino nion xikchiua teisa tein kichiuas maj amo yektakuaujtamatiok mokniuj.
22 Tein tikneltokas, sayoj xikmati tejua uan Dios. Yolpaki akin amo moyolkokoua porin kichiua tein kinemilia ke kuali yetok.
23 Komo yejua takua maski omeyoloua, amo kuali yetok porin takua uan amo takuaujtamati. Tein melauj, se tajtakol komo se kichiua teisa uan amo se takuaujtamati.
