Romanos 5:1-21
5 Yejua ika, axkan ke Dios techita ke tiyolmelaujkej porin titakuaujtamatij, maj kuali timouikakan* iuan itechkopa toTekotsin Jesucristo.
2 Kemej titakuaujtamatij iuan Jesús ueli timotokiaj iuan Dios uan Dios ueli techmaka itatiochiualis tein amo technamiki. Maj tiyolpakikan* porin tikchiaj maj Dios techueyitali.
3 Uan amo sayoj nejon, ta maj tiyolpakikan* keman titajyouiskej, porin tikmatij ke keman titajyouiaj techpaleuia maj titaxikokan;
4 keman titaxikouaj techpaleuia maj tikyolpaktikan Dios; keman tikyolpaktiaj Dios, tikchiaj tein kuali,
5 uan tikyekmatij ke mochiuas tein tikchiaj;* porin Dios kikui ichikaualis tein techmaka para technextilis ke techtasojta.
6 Tein melauj, keman amo uelia timopaleuiayaj,* itech tonal tein Dios kiixtalij, Cristo momikilij para kinpaleuis akin tajtakolejkej.
7 Semi ouij maj aksa* momikili para kipaleuis se akin yolmelauak, sayoj ke xa aksa kinekis momikilis para kipaleuis se akin yolkuali.
8 Sayoj ke, Dios technextilij ke techtasojta ijkuin: keman tikatkaj titajtakolejkejok, Cristo toka momikilij.
9 Uan axkan ke iesyo Jesús kichiuak maj Dios techita ke tiyolmelaujkej, okachi uelis tikyekmatiskej ke timakisaskej keman Dios tetatsakuiltis.
10 Maski tikixnamikiaj Dios, peuak kuali iuan timouikaj porin iKoneuj toka momikilij. Uan axkan ke kuali timouikaj iuan Dios okachi uelis tikyekmatiskej ke timakisaskej porin Cristo oksepa yoltok.
11 Uan amo sayoj nejon, tein Dios kichiuak itechkopa toTekotsin Jesucristo kichiua maj tiyolpakikan, porin itechkopa peuak oksepa kuali timouikajya iuan Dios.
12 Yejua ika, tajtakol kalakik nikan taltikpak itechkopa se takat uan tajtakol kichiuak maj se miki, uan ijkon nochin momikilijtiajkej, porin nochin motajtakolmakakej.
13 Porin nochin ipa tajtakolejkejya katkaj achto ke motemakaskia iTanauatil Moisés, sayoj ke amo akin uelis se kipantis* ke kichiuak se tajtakol komo amo onkak nion se tanauatil.
14 Sayoj ke, mikilis taixyekanak kemej tekiuaj desde keman Adán nemia hasta keman nemiko Moisés. Kinixyekanak hasta akin amo tajtakojkaj kemej Adán. Adán katka kemej akin ualaskia satepan.
15 Sayoj ke, tein Dios tetayokolia amo kemej itajtakol Adán. Miakej momikilijkej porin tajtakoj sayoj se takat. Sayoj ke tein Dios tetayokolia uan itatiochiualis tein amo technamiki okachi ueyi uan kinpaleuia okachi miakej. Dios techtayokolia nejin itechkopa itatiochiualis Jesucristo tein amo technamiki.
16 Uan no, tein Dios tetayokolia semi tapaleuia, amo kemej itajtakol sayoj se takat. Satepan ke mochiuak se tajtakol moixtalij maj kintatsakuiltikan nochin, sayoj ke kemej miakej semi motajtakolmakakej, Dios kitetayokolij tein tapaleuij maj kinita ke yolmelaujkej.
17 Kemej sayoj se takat tajtakoj, mikilis peuak taixyekana kemej tekiuaj. Sayoj ke itatiochiualis Dios tein amo technamiki uan tein yejua tetayokolia para techitas ke tiyolmelaujkej, okachi ueyi uan okachi kuali. Akin kiseliskej nejin nemiskej uan taixyekanaskej kemej tekiuanij itechkopa sayoj se takat, Jesucristo.
18 Yejua ika, ijkon kemej sayoj se tajtakol kichiuak maj nochin momikilikan, no ijkon sayoj se taman tein kuali tapaleuia maj Dios kinita ke yolmelaujkej akin pouij itech nochi tataman xolalmej* uan maj nemikan.
19 Porin ijkon kemej miakej peujkej kipiaj tajtakol porin sayoj se takat amo tatakamatik, no ijkon Dios kinitas miakej ke yolmelaujkej porin sayoj se takat tatakamatik.
20 Uan iTanauatil Moisés motemakak para monextis ke nochin semi tajtakolejkej katkaj, sayoj ke kampa onkak miak tajtakol, Dios okachi kinextia itatiochiualis tein amo technamiki.
21 ¿Keyej? Tajtakol uan mikilis taixyekanaj kemej tekiuanij. No ijkon, itatiochiualis Dios tein amo technamiki taixyekana kemej tekiuaj para maj Dios kinita miakej ke yolmelaujkej para maj uelikan nemikan nochipaya itechkopa toTekotsin Jesucristo.
Tajtolmelaualismej
^ Oso xa “tiyolseujtokej”.
^ Oso xa “Tiyolpakij”.
^ Oso xa “tiyolpakij”.
^ Oso “tein tikchiaj amo techpinaujtia”.
^ Itech griego, “amo tichikaujkej tikatkaj”.
^ Oso “akin”, “akaj”.
^ Oso “kitajtakoltis”.
^ Oso “nochi tataman takamej uan siuamej”.
