“ကျွန်မ ကလေးဘဝတုန်းက အစ်ကိုက စကားနဲ့ရော၊ ကိုယ်ထိလက် ရောက်ရော အနိုင်ကျင့်တာ နေ့တိုင်းပဲ။ အိမ်ထောင်ကျသွားတော့လည်း ယောက္ခမနဲ့ ယောက္ခထီးက အနိုင်ကျင့်ပြန်တယ်။ ကျွန်တစ်ယောက်လို ဆက်ဆံတာ။ ကိုယ့်ကိုယ်ကိုယ်သတ်သေဖို့ အကြိမ်ကြိမ် တွေးမိတယ်။” —မာဒူ၊ a အိန္ဒိယ။

“အမျိုးသမီးတွေ အကြမ်းဖက်ခံရတဲ့ကိစ္စဟာ ကမ္ဘာတစ်ဝန်း ပျံ့နှံ့နေတယ်၊” အမျိုးသမီးသုံးဦးမှာ တစ်ဦးလောက်က ကိုယ်ထိလက်ရောက် ဒါမှမဟုတ် လိင်ဆိုင်ရာ အကြမ်းဖက်တာကို တစ်ချိန်မဟုတ်တစ်ချိန် ကြုံရတယ်လို့ ကမ္ဘာ့ကျန်းမာရေးအဖွဲ့က ဆိုတယ်။

သင်လည်း အဲဒီလိုကြုံဖူးတယ်ဆိုရင် ဘယ်သွားသွား စိတ်မလုံမခြုံ ဖြစ်နေမှာပဲ။ စကားနဲ့ဖြစ်စေ၊ ကိုယ်ထိလက်ရောက်ဖြစ်စေ စော်ကားတာ၊ လိင်ဆိုင်ရာ အကြမ်းဖက်တာ ကြုံရမလားဆိုပြီး တွေးပူမိနိုင်တယ်။ လူတွေက ‘အမျိုးသမီးတွေဆို အထင်သေးကြတယ်’ ဆိုပြီး ခံစားမိနိုင်တယ်။ ဘုရားသခင်ကော အမျိုးသမီးတွေကို အလေးထားသလား။

ကျမ်းချက်။ “ဘုရားသခင့် ပုံသဏ္ဌာန်အတိုင်း ယောက်ျားနဲ့မိန်းမကို ဖန်ဆင်းတယ်။”—ကမ္ဘာဦး ၁:၂၇။

အဓိပ္ပာယ်။ ဘုရားသခင်က ယောကျ်ားနဲ့မိန်းမကို ဖန်ဆင်းခဲ့တယ်။ နှစ်ယောက်စလုံးကို လေးစားခံထိုက်သူတွေလို့ ရှုမြင်တယ်။ ခင်ပွန်းသည်တွေကိုလည်း “ကိုယ့်ကိုယ်ကိုယ် ချစ်သလို ဇနီးကို ချစ်” စေချင်တယ်။ ဇနီးကို ကြမ်းကြမ်းတမ်းတမ်း ပြုမူပြောဆိုတာမျိုး မလုပ်စေချင်ဘူး။ (ဧဖက် ၅:၃၃။ ကောလောသဲ ၃:၁၉) အမျိုးသမီးတွေရဲ့ လုံခြုံရေးကို ဘုရား အလေးထားတယ်ဆိုတာ ရှင်းနေပါတယ်။

“ကလေးဘဝမှာ ဆွေမျိုးတွေရဲ့ လိင်ဆိုင်ရာမတော်မတရား ပြုကျင့်တာ ခံခဲ့ရတယ်။ အသက် ၁၇ နှစ်မှာ အလုပ်ရှင်က သူနဲ့ မအိပ်ရင် အလုပ်ထုတ်ပစ်မယ်လို့ ခြိမ်းခြောက်တယ်။ ခင်ပွန်း၊ မိဘနဲ့ အိမ်နီးချင်းတွေကလည်း မလေးစားကြဘူး။ နောက်ဆုံး ဖန်ဆင်းရှင် ယေဟောဝါအကြောင်း သိလာတယ်။ b ဘုရားက အမျိုးသမီးတွေကို လေးစားတယ်ဆိုတာ သိလာတော့ ကျွန်မကို ဘုရားချစ်ပါလား၊ ဘုရားအတွက် ကျွန်မဟာ တန်ဖိုးရှိပါလား ဆိုတာ စိတ်ချသွားတယ်။”—မာရီယာ၊ အာဂျင်တီးနား။

ကျမ်းချက်။ “ညီအစ်ကိုထက် တွယ်တာတဲ့ မိတ်ဆွေလည်း ရှိတယ်။” —ပညာအလိမ္မာ ၁၈:၂၄။

အဓိပ္ပာယ်။ မိတ်ဆွေစစ်ဆိုတာ ကိုယ့်ကို ဖေးမပေးမယ့်သူပဲ။ ဖြစ်နိုင်မယ်ဆိုရင် ယုံကြည်ရတဲ့သူတစ်ယောက်ကို ရင်ဖွင့်ကြည့်ပါ။

“ကလေးဘဝတုန်းက လိင်ဆိုင်ရာ မတော်မတရား ပြုကျင့်ခံခဲ့ရတယ်။ အနှစ် ၂၀ ကြာတဲ့အထိ ဘယ်သူ့ကိုမှ မပြောပြဘဲ တစ်ယောက်တည်း ကြိတ်ခံစားခဲ့ရလို့ စိုးရိမ်ပူပန်၊ စိတ်ဓာတ်ကျပြီး မပျော်မရွှင်ဖြစ်လာတယ်။ နောက်ဆုံး နားလည်ပေးတဲ့သူတစ်ယောက်ကို ရင်ဖွင့်လိုက်မှပဲ ရင်ထဲ ပေါ့သွားတယ်။”—အီလစ်၊ တူရကီ။

ကျမ်းချက်။ ‘စိုးရိမ်ပူပန်စရာ ရှိသမျှကို ဘုရားသခင်ဆီ ပုံအပ်ထားလိုက်ပါ။ ခင်ဗျားတို့ကို ဂရုစိုက်တဲ့အရှင် ဖြစ်လို့ပဲ။’—၁ ပေတရု ၅:၇။

အဓိပ္ပာယ်။ ဘုရားသခင်က သင့်ဆုတောင်းစကားတွေကို နားထောင်ပေးတယ်။ (ဆာလံ ၅၅:၂၂၊ ၆၅:၂) သင်ဟာ သိပ်တန်ဖိုးရှိတဲ့သူတစ်ယောက်ဆိုတာ နားလည်လာအောင် ကူညီပေးနိုင်တယ်။ သင့်ကို ဂရုစိုက်တဲ့အရှင်ဖြစ်နေလို့ပါ။

“စိတ်ဒဏ်ရာ အကြီးအကျယ်ရခဲ့ပေမဲ့ ယေဟောဝါဘုရားအကြောင်း သိလာတဲ့ အခါ ဒဏ်ရာ တဖြည်းဖြည်းသက်သာလာတယ်။ ဘုရားသခင်က ကျွန်မရဲ့ ခံစားချက်တွေကို ကောင်းကောင်းနားလည်ပေးတဲ့ မိတ်ဆွေပါ။ အခုဆိုရင် ရင်ထဲရှိသမျှ ဆုတောင်းပြောပြနိုင်ပြီ။”—အန်နာ၊ ဘလိဇ်။

ကျမ်းချက်။ ‘ယေဟောဝါက မိဘမဲ့ကလေးတွေနဲ့ ဖိနှိပ်ခံရသူတွေအတွက် တရားမျှတစွာ စီရင်ပေးလိမ့်မယ်။ ဒါကြောင့် သေမျိုးဖြစ်တဲ့လူဟာ သူတို့ကို ခြောက်လှန့်နိုင်တော့မှာ မဟုတ်ဘူး။’—ဆာလံ ၁၀:၁၇၊ ၁၈။

အဓိပ္ပာယ်။ အမျိုးသမီးတွေကို အကြမ်းဖက်နှိပ်စက်တာအပါအဝင် မတရားမှုမှန်သမျှကို ဘုရားသခင် မကြာခင် အဆုံးတိုင်စေပါတော့မယ်။

“အမျိုးသမီးတွေ၊ မိန်းကလေးတွေ နှိပ်စက်ခံရတဲ့အဖြစ်ကို ယေဟောဝါဘုရား မကြာခင် ပပျောက်စေမယ်ဆိုတာ သိလိုက်ရတဲ့အခါ စိတ်အေးသွားတယ်။” —ရာဘာတို၊ မက္ကဆီကို။

ကျမ်းစာမျှော်လင့်ချက်အကြောင်း သိအောင်၊ ကျမ်းစာကတိတွေကို ယုံကြည်နိုင်အောင် ယေဟောဝါသက်သေတွေ ကူညီပေးနေပါတယ်။ ထပ်သိချင်ရင် သင့်ဆီ လာရောက်လည်ပတ်ပေးဖို့ တောင်းဆိုပါ။

ဒီဆောင်းပါးကို ပရင့်ထုတ်ဖို့ ကူးယူပါ