Mahery sady mahay lavitra noho ny olombelona ny anjely. (2 Petera 2:11) Mipetraka any an-danitra izy ireo, izany hoe any amin’ny faritra tsy hita maso. (1 Mpanjaka 8:27; Jaona 6:38) Antsoina koa hoe fanahy àry ny anjely.—1 Mpanjaka 22:21; Salamo 104:4.

Ahoana no nampisy ny anjely?

 Noforonin’Andriamanitra ny anjely, ary nampiasa an’i Jesosy izy rehefa namorona azy ireo. Resahin’ny Baiboly fa i Jesosy no “lahimatoa amin’ny zavaboary rehetra”, ka “izy no nampiasaina tamin’ny famoronana ny zavatra hafa rehetra any an-danitra sy etỳ an-tany, dia ny hita sy ny tsy hita”, anisan’izany ny anjely. (Kolosianina 1:13-17) Tsy manambady ny anjely, ary tsy miteraka. (Marka 12:25) Noforonina tsirairay kosa ireny “zanak’Andriamanitra” ireny.—Joba 1:6.

 Efa taloha ela be ny anjely no noforonina, tamin’ny mbola tsy nisy ny tany. “Nihoby” ireo anjely, tamin’Andriamanitra namorona ny tany.—Joba 38:4-7.

Firy ny isan’ny anjely?

 Tsy resahin’ny Baiboly ny isan’izy ireo, fa lazainy fotsiny hoe be dia be izy ireo. Nahita anjely an-jatony tapitrisa, ohatra, ny apostoly Jaona, tao amin’ny fahitana iray.—Apokalypsy 5:11.

Samy manana ny anarany sy ny toetrany ve ny anjely tsirairay?

 Eny. Misy anaran’ny anjely roa ao amin’ny Baiboly, dia i Mikaela sy Gabriela. (Daniela 12:1; Lioka 1:26) a Niteny ny anjely hafa hoe manana anarana izy ireo, nefa tsy nolazainy ilay izy.—Genesisy 32:29; Mpitsara 13:17, 18.

 Samy manana ny toetrany ny anjely. Afaka mifampiresaka izy ireo. (1 Korintianina 13:1) Afaka misaina sy mieritreritra izy ireo, ary afaka manao teny fiderana an’Andriamanitra. (Lioka 2:13, 14) Afaka misafidy koa izy ireo hoe hanao ny tsara sa hanao ratsy. Nisy, ohatra, nanota ka nanaraka an’i Satana Devoly dia nikomy tamin’Andriamanitra.—Matio 25:41; 2 Petera 2:4.

Samy manana ny toerana tanany ve ny anjely?

 Eny. I Mikaela arkanjely no mahery indrindra sy ambony indrindra amin’ny anjely. (Joda 9; Apokalypsy 12:7) Anjely manana toerana ambony koa ny serafima, ary mijoro eo akaikin’ny seza fiandrianan’i Jehovah izy ireo. (Isaia 6:2, 6) Anjely hafa koa ny kerobima, ary manana toerana ambony sy andraikitra manokana. Nisy kerobima, ohatra, niambina ny fidirana nankao amin’ny zaridainan’i Edena, rehefa voaroaka tao i Adama sy Eva.—Genesisy 3:23, 24.

Manampy ny olona ve ny anjely?

 Eny. Ampiasain’Andriamanitra ireo anjely tsy mivadika, mba hanampy ny olona ankehitriny.

•   Andriamanitra no mitarika ny mpanompony amin’ny asa fitoriana ny vaovao tsaran’ny Fanjakan’Andriamanitra, ary mampiasa anjely izy rehefa manao an’izany. (Apokalypsy 14:6, 7) Samy mandray soa amin’izany na ireo mitory na ireo mihaino an’ilay vaovao tsara.—Asan’ny Apostoly 8:26, 27.

•   Ny anjely koa no miaro ny fiangonana kristianina tsy ho voaloton’ny mpanao ratsy.—Matio 13:49.

•   Mitarika sy miaro an’ireo tsy mivadika amin’Andriamanitra ny anjely.—Salamo 34:7; 91:10, 11; Hebreo 1:7, 14.

•   Tsy ho ela ny anjely dia hiaraka amin’i Jesosy Kristy handringana ny mpanao ratsy rehetra.—2 Tesalonianina 1:6-8.

Manana anjely mpiambina ve ny olona tsirairay?

 Manampy ny mpanompon’Andriamanitra ny anjely, kanefa tsy midika akory izany hoe misy anjely iray asain’Andriamanitra hiambina ny Kristianina iray. b (Matio 18:10) Tsy miaro ny mpanompon’Andriamanitra amin’ny zava-tsarotra na fakam-panahy rehetra ny anjely. Resahin’ny Baiboly kosa fa matetika Andriamanitra no ‘manisy lalan-kivoahana’, izany hoe manome fahendrena sy hery mba hiaretana an’ilay zava-tsarotra.—1 Korintianina 10:12, 13; Jakoba 1:2-5.

Hevi-diso momba ny anjely

 Hevi-diso: Afaka mivavaka amin’ny anjely isika mba hangataka fanampiana.

 Ny tena marina: Anisan’ny fanompoana an’i Jehovah Andriamanitra ny vavaka. (Apokalypsy 19:10) Andriamanitra ihany no tokony hivavahantsika, ary tokony hataontsika amin’ny anaran’i Jesosy izany.—Jaona 14:6.